Dual Panel1(12-18) Mase nagạ ene rimarisị su apeng. (13-1) Bọu e iạ nakasilo piạ binatang sěmbaụ ěndaị siměpụ bọu ral᷊ungu sasị. I sie piạ sungene mapul᷊o ringangu těmbọ e pitu. Suapan sungene nahiạ u makotane, dingangu suapan těmbọ e niwohekangu areng sěmbaụ sasamedẹ̌ su Mawu Ruata.
2Binatang kụ takụ kinasilo ene luhude měpẹ̌papangawẹ gahịu masang kambal᷊ọ, laede kere laedu běruang, dingangu sasimụe kere sasimụ u singa. Mase binatang ene nionggol᷊angu nagạ e kuate sẹ̌sane ringangu kaderang kawawantuge, ringangu kawasane masěllahẹ̌.
3Sěmbaụ bọu binatang těmbọe pitu ene kakěllaěng kere piạ lesẹ e gẹ̌guwạ-guwạ, kaiso sembeng naul᷊e. Kạguwạu dunia e měngkate rụdal᷊inaụ apidu kạpahuntol᷊ene binatang ene.
4Kụ i sire měmpẹ̌sẹ̌suba su nagạ ene batụu i sie seng nẹ̌gěllịu kawasane su binatang ene. Kụ i sire mal᷊aing měmpẹ̌sẹ̌suba binatang ene. Ungkuěng i sire, "Tawẹ apa kụ mẹ̌sul᷊ungu binatang ini! Tawẹu makatohạ mẹ̌sekẹ dumokạ si sie!"
5Binatang ene měngkate niwala mohonge měbẹ̌bera wawera mal᷊aotohẹ̌ dingangu manungkeang Mawu. I sie niapakawala mẹ̌parenta karěngụ u ěpạ u pul᷊o dua su wul᷊ange karěngụ e.
6Mase i sie nanětạ e něhinakang Duata dingangu mạnal᷊amạ arengu Ruata. Kerene lai tampạ katatanakengu Mawu Ruata, dingangu patikụ apạeweng tumanạu sorga e nasuen tungkeange.
7I sie mal᷊aing niapakawala rumokạ kawanuan Duata kụ apạmatạ si sire. Dingangu mẹ̌kawasa su wowom patikụ hěnto, wansa, ringangu wera, ringangu umatẹ̌ kụ seng nisarakang si sie.
8Binatang ene sarung subaěngu patikụ taumata apang měbẹ̌biahẹ̌ su wowon dunia, tabeạu ketewe taumata apang arenge seng kạdarol᷊ẹ̌ kal᷊amonan dunia niriadi e, su ral᷊ungu bukẹ̌ u taumata wiahẹ̌ tẹ̌taghuanengu Ahusu Domba e kụ seng bọu pinotọ.
9Ual᷊ingu ene, kereu i kamene makakoạ dumaringihẹ̌, ute pěmpẹ̌daringihẹ̌ko habarẹ̌ ini:
10"Taumata kụ hinong itaweng, mang sarung tawengang. Dingangu taumata kụ hinong pateěngu papilị, mang sarung pateěng pilikang. Kai ual᷊ingu ene hakịu kawanuan Duata e hinon mẹ̌dararagẹ̌ dingangu satia."
11Mase iạ nakasilo binatang sěmbaụ bal᷊ine siměpụ bọu ral᷊ungu dunia. Piạ sungene rarua mẹ̌sul᷊ungu sungen anạ u domba. Tingihe mẹ̌sul᷊ungu tingihu nagạ.
12Su těngon binatang humotong ene i sie měpẹ̌pakẹ u kawasa masaria mal᷊aing kinahombange wọu binatang ene. Kaguwạu dunia ringangu patikụ mětatumanạ e, sẹ̌sihasaěngu harusẹ̌ měmpẹ̌suba binatang humotong, kụ hempange seng napia.
13Binatang karuane e nẹ̌koạ e manga hal᷊ẹ̌ makạdal᷊inaụ gaghuwạ. Su těngong kěbị taumata e i sie napakanawọen putung bọu langị sol᷊ong dunia e.
14Kụ kěbị taumata apang měmpěbẹ̌biahẹ̌ su wowon dunia e lẹ̌akal᷊engu manga karal᷊inaụ kụ kẹ̌koatenge su těngon binatang humotonge. Kụ i sire kěbị e niorone apẹ̌děndarisị u tul᷊adang binatang sěmbaụ kụ seng bọu nilesẹ u warạ e, katewe mang těbe wiahẹ̌.
15Binatang karuane ene niapakawala mapẹ̌biahu tul᷊ada e, hakịu tul᷊ada ene wotonge mẹ̌bisara ringangu mamate kěbị taumata apan tawe mapulu měmpẹ̌suba si sie.
16Kěbị taumata e, baẹ gaghuwạ arau rarodọ, kalạ dingangu kasiang, ěllang arau kawanua, isẹ̌sihasan binatang ene mědeạu pěnẹ̌narimạ u tatiala su l᷊imang sire koaneng arau su rěhụ i sire.
17Tawẹu sarang sěngkatau makapěmělli arau makapẹ̌bal᷊ụ u apa-apa, kereu i sie tawẹ tatialane; mangal᷊ene arengu binatang ene hala e, arau rekenangu arenge.
18Sini e hinong piạ katatahuěnna. I saing kụ matahuěnna ute makarekeng mangal᷊eng dekenangu binatang ene batụu rekenang ene kai arengu taumata sěngkatau. Dekenange tangu kai 666.