Dual Panel1Bọu ene, iạ nakasilo malạekatẹ̌ ěpạ u katau rụdarisị su pungu anging ěpạ. I sire měmpěnẹ̌naghe anging ěpạ su dunia e tadeạu kumbahangbe piạ anging tumiụ surul᷊unge arau su l᷊audẹ̌, arau su manga kakaluang.
2Mase iạ nakasilo malạekatẹ̌ bal᷊ine sěngkatau siměpụ bọu sẹ̌bangengu ěllo e. I sie měbẹ̌bawa segel'u Mawu Ruata kụ biahẹ̌ e. Dingangu tingihe maihạ malạekatẹ̌ ene nẹ̌kui malạekatẹ̌ ěpạ u katau kụ seng nakahombang kawasa, wọu Ruata baugu i pěnggolang dul᷊unge arau l᷊audẹ̌.
3Malạekatẹ̌ ene nẹ̌bera, "Hědoko wue měnggolang dul᷊unge arau l᷊audẹ̌ arau lai manga kakaluang, kereu i kami e ren tawe něnẹ̌nialan segelẹ̌ su rěhụ u manga mẹ̌tatangkiang Duatang kitẹ e."
4Mase iạ nipaul᷊ikangu piạ taumata i sire 144.000 su kataune nitialaěngu segelẹ̌ bọu Ruata e su rěhụ i sire. I sire ene ute nial᷊ạ bọu kawanuan Israelẹ̌ bọu hěnton sire mapul᷊o dua;
5bọu apang hěnto e nial᷊ạ i sire pẹ̌tahạ 12.000 su kataune. Kụ kai wọu hěnton: Yehuda, Ruben, Gad,
6Asyer, Naftali, Manasye,
7Simeon, Lewi, Isakar,
8Zebulon, Yusup, dingangu i Benyamin.
9Bọu ene iạ němandạ e lai, sěngkakakěllane kawe nạung l᷊audu taumata e kụ tawẹ sihinge kakẹ̌pal᷊e -- kụ tawẹu sarang sěngkatau makarekeng kal᷊awọe. I sire e kai taumata wọu patikụ umatẹ̌, hěnto wansa arau wera. Pakeang i sire mananandu sěmparesẹ̌ mawira dingangu kapěnẹ̌dene manga kal᷊ěpang kalum palěm su l᷊imane, kụ i sire mal᷊awọ ene mạhundarisị tụtatěngo kaderang kawawantugẹ̌ e dingangu tụtatěngo Ahusu Domba e.
10Mase ringangu tingihe maihạ e i sire měmpělẹ̌ěnggahu, "Kasasal᷊amat'i kitẹ e rarěntane kai wọu anun Duatang kitẹ, mạiang su kadera mawantugẹ̌ e, dingangu wọu Ahusu Domba ene!"
11Kal᷊awọu malạekatẹ̌ e kai nạung mạhundarisị mělẹ̌liwung kaderang kawawantugẹ̌ e ringangu manga těmbonange ringangkewen diadikang ěpạ e. Manga malạekatẹ̌ e měngkatewe němpẹ̌těngkasumagẹ̌ sutěngong kaderang kawawantugẹ̌ e, bọu e nẹ̌suba Ruata.
12I sire němpěberang, "Aming! Dalo su Mawu Ruatang kitẹ kasěllahenge ringangu pelesa. I Sie hinong pẹ̌dal᷊emboěngu haghin daralo ringangu pěmamantugẹ̌. I Sie kai kawasa, ringangu matoghasẹ̌ sarang marěngụ-děngụ! Aming."
13Sěngkatau wọu manga těmbonange ene e nakiwal᷊o si siạ, "I sire němpěluheng lakụ e manandụ mawira ini e, i sai wue i sire dingangu kai wọu apa rarěntane?"
14"Iạ běga wue, tuang! I tuang sẹ̌sane masingkạ," ungkuěngku. Tangu i sie nẹ̌berạ e si siạ, "Ini e kai i sire apang seng nasal᷊amatẹ̌ bọu kal᷊awọu tatumbiagẹ̌ gaghaghuwạ. I sire seng bọu němpanguhasẹ̌ lakụ i sire niapakawiran dahan Ahusu Domba e.
15Hakịu ene i sire mạhundarisị su těngong kaderang kawawantugu Ruata e, ringangu měkẹ̌kal᷊iomaneng si Sie baewe ěllo arau hěbi su ral᷊ungu Wal᷊em Mawu. Dingangu i Sie kụ mạiang su kaderang kararatuang'E sarung sumongo ringang i sire mědeạu maněntanudẹ̌ si sire.
16I sire semben tawe saụ makapěndang mahutung arau marou; matangěllo arau pědisẹ̌ maihạ e semben tawe makahěngisẹ̌ si sire,
17batụu Ahusu Domba e kụ mạiang sutal᷊oarang kaderang kawawantugẹ̌ e sarung makoạ měngangahạ i sire. I Sie sarung měngahạ i sire sol᷊ong simbul᷊u akẹ u pẹ̌bawiahẹ̌. Kụ Duata e sarung mangěmụ kal᷊awọu akẹ u mata wọu matan sire."