Alkitab Mobile SABDA
[VER] : [SANGIR]     [PL]  [PB] 
 <<  Wahyu 9 >> 

1Bọu e malạekatẹ̌ kal᷊imane nẹ̌tiụeng napirine, kụ iạ nakasilọ e wituing sěmbaụ nanawo wọu l᷊angị sol᷊ong bowon dunia. Bituing ene nighělirangu kakunsị'u tigal᷊ụ'u papate e.

2Tangu wituing ene e nělekese tigal᷊ụ u papate e, kụ tipu e siměbangke wọu ral᷊unge kere tipun sunggilẹ̌ gagherẹ. Matangěllo ringangu winangaeng narěndungken tipu wọu tạgial᷊ụ ene.

3Mase wọu ral᷊ungu tipu e nahunsěbangke manga kal᷊imbotong kụ diměllusẹ̌ sol᷊ong dunia e. Manga kal᷊imbotong ene nighěllirangu kawasa mẹ̌sul᷊ungu kere nighěllị su manga wakunang.

4I sire isẹ̌sěding měmate rěmpugẹ̌, arau manga kakaluang, arau mangạewe sasuang bal᷊ine. I sire kětạeweng botonge tuměmbo taumata su apang děhụ e tawẹ segele wọu Mawu Ruata.

5Manga Kal᷊imbotonge tawe nipakawala měmate si sire ene, kaiso kětạben pěmẹ̌manti si sire gěnnangu l᷊ima wul᷊ang. Giadu pananunsarang manga kal᷊imbotonge mẹ̌sul᷊ungu ghiadu kiking bakunang.

6Su ghěnnangu l᷊ima wul᷊ang ene, i sire mětẹ̌tawakal᷊i sarang měmpẹ̌kate, kaiso i sire mang tawe měmpẹ̌kate; i sire mapulu mate, kaiso papate e kai marau wọ'i sire.

7Kakakoạ u kal᷊imbotong e mạnihing kawal᷊o kụ seng sadia měmpẹ̌sekẹ. Su těmbọ i sire kai piạ apa kere makota wul᷊aeng. Gatin sire mẹ̌sul᷊ungu ghatin taumata.

8Utạ i sire mẹ̌sul᷊ungu utạ u manga wawine, ringangu isin sire mẹ̌sul᷊ungu isin singa.

9Sěbạ i sire nihawengangu apa mangawẹ lakụ uase. Tingihu papanid'i sire e mẹ̌sul᷊ungu tingihu ghapaěngu kareta wẹ̌bol᷊engangu kawal᷊o kụ němpěngalo su ral᷊ungu pẹ̌seketang.

10Piạ tol᷊en sire ringangu piạ sasipị e kere sasipị u wakunang. Kụ su tol᷊ene ene e piạ toghase ipanunsara taumata su ghěnnangu l᷊ima wul᷊ang.

11Piạ datun sire kụ měpẹ̌parenta si sire, kụ datu ene ute malạekatẹ̌ ěndaị mětẹ̌tal᷊ung tigal᷊ụ u papate. Arenge su werang Ibrani e Abadon; dingangu su werang Yunani e Apolion (kụ mangal᷊ene "Měnggaghoghahẹ̌").

12Silakạ humotonge nal᷊iụ e. Bọu ene piạko l᷊ai silakạ darua himombang.

13Tuhụ e malạekatẹ̌ kaěnnunge nẹ̌tiụ e napirine. Tangu iạ e nakaringihe tingihẹ̌ nasẹ̌bang bọu wukung pananěmbaěng bul᷊aeng ěpạ e su těngon Mawu Ruata.

14Tingihẹ̌ ene e nẹ̌bera su malạekatẹ̌ kaěnnunge u, "Lukako malạekatẹ̌ ěpạ kạl᷊aikị su Sal᷊ụ u Efrat e!"

15Kụ malạekatẹ̌ ěpạ e nịdal᷊ukạ e. I sire seng niriahi nipẹ̌tatudẹ baugu orasẹ̌, ěllo, wul᷊ang dingangu taung ipạmate sěngkatěllung bahageange wọu patikụ taumata.

16Iạ e nipaul᷊ikangu kakěpal᷊u mẹ̌sasekẹ su wowong kawal᷊o e rua hasụ su yutane.

17Kụ su ral᷊ungu papasilo, tinganengku e ute kai manga kawal᷊o ene ringangu manga sumasakene. Manga sumasakene měmpělẹ̌luhen lakụ uase awạe mahamụ sal᷊a ruděllị birụ mẹ̌sul᷊ungu watung paramata, ringangu maririhẹ̌ kere malelang. Těmbọu manga kawal᷊ọ e měpẹ̌papangawẹ u těmbọ u singa ringangu wọu mohonge sěsẹ̌bangengu putung, tipu ringangu malelang.

18Sěngkatěllung bahageange wọu taumata nate ual᷊ingu hombang tatěllu e; putung, tipu ringangu malelang kụ sụsěbang bọu mohongu manga kawal᷊o ene.

19Katatoghasu manga kawal᷊o ene kai su mohong i sire ringangu su tol᷊en sire. Tol᷊en sire e kai mẹ̌sul᷊ungu těmpu piạ těmbọ e. Kụ dingangu tol᷊en sire tangu kawal᷊o e mạnunsara taumata.

20Kai lěmben taumata apan ta nikapateng hombang ene, tawe lai měmpěněntangu koạ u l᷊imang sire hala e. I sire tawe měmpangědo mẹ̌suba manga rohkẹ̌ dal᷊akisẹ̌ dingangu manga pakal᷊uang bọu wul᷊aeng, sal᷊aka arau tambaga, watu ringangu kalu kụ tawe makasilo ringangu makaringihẹ̌, arau l᷊ai makaral᷊eng.

21I sire mal᷊aing tawe měněntangu kakanoạ i sire ral᷊akisẹ̌ kere, pěmamate, daghusẹ̌, pẹ̌sasundal᷊ẹ̌ dingangu tako.


  Share Facebook  |  Share Twitter

 <<  Wahyu 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran