Dual Panel1Mangkin tipaq pare pemimpin jemaah saq araq lẽq antare side pade, tiang ngebẽng nasẽhat. Tiang, sebagẽ dengan saq mimpin jemaah ẽndah, saq sampun nyaksiang mẽsaq selapuq kesengsarean Almasih, dait saq pade-pade mauq bagian lẽq dalem kemuliean saq gen tenyatayang ẽraq.
2Side pade harus bimbing dengan-dengan saq tepercayeang siq Allah lẽq side pade, pade maraq pengarat saq ngarat dombe-dombe. Ndaq lantaran terpakse, laguq secare ihlas, sesuai kance pekayunan Allah; ndaq lantaran side mẽlẽ boyaq keuntungan, laguq lantaran side pacu-pacu ngelaksaneang hal nike.
3Ndaq side pade piaq maraqne side pade mẽlẽ mrẽntah ie pade saq tepercayeang tipaq side pade, laguq side pade harus jari teladan umaq ie pade.
4Dait lẽq waktu Pengarat Agung nike rauh ẽraq, side pade gen nerimaq mahkote kemuliean saq ndẽq iniq layu.
5Maraq nike ẽndah side pade, dengan-dengan bajang, side pade harus tunduk lẽq dengan-dengan lingsir. Side selapuq harus ngerendahang diriq dait saling ngelayanin secare rendah atẽ. Sẽngaq, "Allah nentang dengan saq sombong, laguq periak lẽq dengan saq rendah atẽ."
6Keranaq nike, rendahang diriqde lẽq bawaq gading Allah saq kuat, adẽq Ie ninggiang side pade lamun sampun waktune.
7Serahang selapuq kekuatirande tipaq Allah, sẽngaq Ie saq meliharaq side.
8Side pade harus tetep sadar dait bejage-jage, sẽngaq Belis nike musuhde. Ie maraq singe saq lampaq lito-latẽ sambil ngaum boyaq mangse jari tekaken.
9Lawan ie siq iman saq kuat, sẽngaq side pade nenaoq bahwe selapuq semetonde lẽq seantẽro dunie ẽndah menderite maraq side pade.
10Dait Allah, sumber selapuq rahmat, saq sampun ngemanikang side lẽq dalem Almasih tipaq kemuliean-Ne saq kekel, gen nyempurneang, neguqang, nguatang dait ngukuhang side.
11Ie saq bekuase jangke selaẽq-laẽqne! Amin.
12Surat tiang saq singket niki tiang tulis tipaq side siq bantuan Silwanus, saq tiang anggep semeton seiman saq bau tepercaye. Tiang mẽlẽ ngebẽng semanget lẽq side dait ngeyakinang side pade bahwe napi saq tiang tulis niki berite saq kenaq mengenai rahmat Allah. Side pade harus pacu-pacu percaye lẽq rahmat Allah nike.
13Semeton-semetonte lẽq Babilon, saq tepilẽq ẽndah siq Allah, ngirim salam tipaq side; maraq nike ẽndah bije tiang Markus.
14Pade besalam-salaman sopoq kance saq lainne siq penoq kasih. Damẽ sejahtere araq bareng side selapuq saq araq lẽq dalem Almasih. Amin.