Dual Panel1Ahirne rase kangen tiang pade ndẽqne bau tetahen malik. Keranaq nike tiang pade mutusang araqan tiang pade ndot mẽsaq lẽq Atena,
2terus tiang pade ngutus semetonte Timotius. Timotius nike pelayan Allah saq begawẽan bareng kance tiang pade jari beriteang Kabar Solah mengenai Almasih. Tiang pade ngutus Timotius tipaq side, adẽq ie neguqang atẽ side pade dait ngebẽng nasẽhat mengenai iman side pade.
3Siq care nike ndẽq araq sopoq dengan juaq lẽman side pade saq bimbang imanne lantaran penderitean-penderiteante niki. Side mẽsaq nenaoq bahwe penderitean-penderitean nike sampun jari rencane Allah lẽq ite.
4Sewaktu tiang pade masih araq bareng kance side pade, sampun tiang pade badaq side bahwe ite gen menderite. Dait mule hal nike tetu-tetu sampun telaksane; side pade ẽndah sampun nenaoq hal nike.
5Keranaq nike tiang ngutus Timotius, sẽngaq tiang melẽt gati nenaoq berembẽ imande. Tiang kuatir Belis berhasil gode side pade sehingge selapuq usahe tiang pade jari sie-sie.
6Mangkin Timotius sampun tulak dait sampun nyampẽang berite gembire lẽq tiang pade mengenai iman dait kasih side pade. Ie badaq tiang pade bahwe side pade tetep inget tiang pade lẽq angende. Dait side pade melẽt bedait kance tiang pade, pade maraq tiang pade ẽndah melẽt bedait kance side pade.
7Keranaq nike, semeton senamian, lẽq dalem selapuq kesusahan dait penderitean tiang pade, tiang pade merase tehibur siq berite mengenai side pade dait siq iman side pade,
8sehingge mangkin tiang pade idup malik, asal side pade tetep araq lẽq dalem Tuhan.
9Berembẽ belẽq ucapan syukur tiang pade lẽq Allah siq selapuq sukecite saq tiang pade alamin lẽq arepan-Ne lantaran side pade.
10Kenjelo kekelem tiang pade pacu-pacu bedo'e, adẽq tiang pade bau bedait langsung kance side pade, jari cukupang napi saq kurang lẽq iman side pade.
11Semoge Allah Bapante mẽsaq, dait Junjungante Saq Mulie Deside Isa ngicanin tiang pade langan jari bedait kance side pade.
12Semoge Tuhan ngeromboqang dait pebelẽq kasih side pade sopoq kance saq lainne dait tipaq selapuq dengan, pade maraq tiang pade ẽndah ngasihin side.
13Siq care nike Tuhan gen neguqang atẽnde, sehingge side pade suci dait ndẽq bedowẽ cacat cele lẽq arepan Allah Bapante, lẽq waktu Junjungan Saq Mulie Deside Isa rauh teiring siq selapuq dengan saq jari dowẽ-Ne.