Dual Panel1Roh Allah secare teges nyatayang bahwe lẽq waktu-waktu saq gen dateng, separo dengan gen murtat, terus turut roh-roh penyesat dait pengajahan-pengajahan sẽtan,
2saq tesampẽang langan dengan-dengan saq girang beduste saq atẽ nuranine sampun jari maraq batu.
3Ie pade ngajah dengan adẽqne ndẽq merariq dait ndẽq ngelorang keloran saq tertentu. Padahal keloran nike tecipteang siq Allah adẽqne tekelorang siq ucapan syukur siq dengan-dengan saq sampun percaye tipaq Almasih dait sampun nenaoq kebenaran.
4Selapuq saq tecipteang siq Allah nike solah, dait ndẽq araq sopoq juaq saq harus teanggep haram lamun sampun teterimaq siq rase syukur tipaq Allah.
5Sẽngaq Manik Allah dait do'e miaq keloran nike jari halal.
6Lamun side ngingetang semeton-semetonte mengenai selapuqne nike, side gen jari pelayan Deside Isa Almasih saq solah. Dait side tetep tedidik lẽq hal-hal mengenai iman dait selapuq pengajahan saq solah saq sampun side turut sengonẽq niki.
7Jaoqang cerite-cerite tahyul dait dongẽng-dongẽng leluhur. Latih diriqde jari kehidupan saq beribadah.
8Latihan jasmani sekediq doang manpaatne, laguq ibadah nike bemanpaat dalem selapuq hal, sẽngaq berisi janji, jari idup saq mangkin niki dait jari idup saq gen dateng.
9Hal nike kenaq dait patut teterimaq dait tepercaye sepenoqne.
10Keranaq nike ite bejuang dait pacu-pacu begawẽan, sẽngaq ite beharep sepenoqne lẽq Allah saq idup; Ie Juruselamet selapuq dengan, terutame gati dengan-dengan saq percaye.
11Beriteang dait ajahang selapuqne nike.
12Ndaq alurang sopoq dengan juaq ngerẽmẽhang side lantaran side masih bajang. Sebalikne, side harus jari teladan tipaq dengan-dengan percaye lẽq dalem ucapande, lẽq dalem tingkah laku side, lẽq dalem kasihde, lẽq dalem kesetieande dait lẽq dalem kesuciande.
13Jangke tiang dateng laun, side harus tekun baceang Kitab Suci dait ngebẽng semanget dait ngajah ie pade.
14Ndaq side lupaq ngengadu paice lẽman Roh Allah saq teicanin tipaq side siq nubuat sewaktu pemimpin-pemimpin jemaah noloq imene lẽq atas ulunde.
15Laksaneang selapuqne nike pacu-pacu adẽq kemajuande teserioq siq selapuq dengan.
16Perhatiang pacu-pacu diriqde dait perhatiang ẽndah pengajahan side. Side harus tetep setie ngelaksaneang selapuqne nike, sẽngaq siq care nike side gen nyelametang diriqde mẽsaq dait dengan-dengan saq dengahang side.