Alkitab Mobile SABDA
[VER] : [SASAK]     [PL]  [PB] 
 <<  2 Timotius 1 >> 

1Timotius, bije tiang saq tiang kasihin! Surat niki lẽman tiang, Paulus, rasul Deside Isa Almasih saq tepilẽq siq Allah jari nyampẽang janji mengenai idup lẽq dalem Deside Isa Almasih.

2Allah Bapa dait Deside Isa Almasih Junjungante Saq Mulie ngicanin side berkah, rahmat dait damẽ sejahtere.

3Tiang besyukur lẽq Allah saq tiang layanin siq angen saq tulus, maraq saq telaksaneang siq pare leluhur tiang laẽq. Tiang tetep besyukur lẽq Allah sebilang tiang inget side lẽq dalem do'e, timaq kenjelo atao kekelem.

4Tiang inget lẽq kesedihan atẽnde. Keranaq nike tiang melẽt gati serioq side malik adẽq tiang bau tetu-tetu jari gembire.

5Tiang inget lẽq imande saq tulus ihlas, pade maraq iman niniqde saq nine Lois dait Eunike inaqde. Dait tiang yakin bahwe iman nike ẽndah idup lẽq dalem diriqde.

6Keranaq nike, tiang ingetang side adẽq side terus idupang paice saq teicanin siq Allah tipaq side sewaktu tiang noloq ime tiang lẽq atasde.

7Sẽngaq Roh saq Allah icanin tipaq ite, ndẽqne Roh saq miaq ite jari penakut. Sebalikne Roh Allah nike miaq ite jari kuat, penoq siq kasih dait tao nahen diriq.

8Keranaq nike, ndaq ilaq besaksi mengenai Tuhante, dait ndaq ẽndah ilaq mengenai tiang, saq tebui lantaran Ie. Sebalikne siq kekuatan lẽman Allah, side milu menderite lantaran Kabar Solah nike.

9Allah nyelametang ite dait ngemanikang ite siq care saq suci. Ie ngelaksaneang hal nike nẽnten tedasarang siq napi saq sampun ite laksaneang, laguq tedasarang siq rencane-Ne mẽsaq dait rahmat-Ne. Allah ngicanin ite rahmat-Ne langan Deside Isa Almasih sendẽqman dunie niki tecipteang.

10Dait mangkin, Allah nyatayang rahmat-Ne nike tipaq ite siq kerauhan Juruselamette, Deside Isa Almasih. Deside Isa ngalahang kuase kematẽan dait datengang idup saq kekel langan Kabar Solah nike.

11Jari Kabar Solah niki tiang sampun tetentuang sebagẽ dengan saq beriteang kabar nike, sebagẽ rasul dait sebagẽ guru.

12Lantaran selapuqne nike tiang nerimaq penderitean niki, laguq tiang tetep ndẽq ilaq, sẽngaq tiang nenaoq gati sai saq tiang percaye. Tiang yakin bahwe napi saq sampun Ie percayeang lẽq tiang, Ie ẽndah sanggup jagaq jangke Jelo Tuhan.

13Turut pacu-pacu pengajahan saq kenaq saq sampun tiang sampẽang tipaq side. Dait side harus tetep percaye lẽq iman dait kasih lẽq dalem Deside Isa Almasih.

14Siq bantuan lẽman Roh Allah saq idup lẽq dalem ite, side harus jagaq napi saq solah saq sampun tepercayeang tipaq side.

15Side nenaoq bahwe selapuq dengan lẽq daẽrah Asia Kodẽq sampun bilin tiang, lantong Pigelus dait Hermogenes.

16Laguq keluarge Onesiporus sampun pire kali miaq angen tiang seneng. Semoge Tuhan kayun nyatayang rahmat-Ne tipaq ie pade. Timaq tiang lẽq dalem bui, Onesiporus ndẽqne ilaq lẽq keadaan tiang nike.

17Sewaktu tiang dateng lẽq Roma, ie tetep berusahe boyaq tiang jangke ie bedait kance tiang.

18Dait side nenaoq bahwe lẽq Epesus, ie luwẽq gati nulung tiang. Semoge Tuhan nyatayang rahmat-Ne tipaq ie lẽq jelo Almasih rauh malik.


  Share Facebook  |  Share Twitter

 <<  2 Timotius 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel