Dual Panel1Pilemon, batur dait dengan saq bareng begawẽan kance tiang pade! Tiang, Paulus, sopoq tahenan lantaran Deside Isa Almasih, bareng kance semetonte Timotius, nulis surat niki tipaq side,
2dait tipaq jemaah saq bekumpul lẽq balẽnde; dait ẽndah tipaq semetonte saq nine Apia, dait tipaq Arkipus, batur saq pade-pade bejuang kance ite.
3Rahmat dait damẽ sejahtere lẽman Allah, Bapante dait lẽman Junjungan Saq Mulie Deside Isa Almasih araq bareng kance side.
4Tiang ngucap syukur tipaq Allah tiang, sebilang tiang inget side lẽq dalem do'e tiang.
5Sẽngaq tiang dengah mengenai kasihde tipaq selapuq dengan suci dait mengenai imande lẽq Deside Isa Almasih Junjungan Saq Mulie.
6Tiang bedo'e semoge hubungante besemeton lẽq dalem iman gen ngasilang pengertian saq sayan luwẽq mengenai sebilang hal saq solah lẽq antare ite bagi Almasih.
7Pilemon, lantaran kasihde, tiang mauq penghiburan dait kekuatan sẽngaq atẽ dengan-dengan suci sampun side hibur.
8Keranaq nike, timaq lẽq dalem Almasih tiang bedowẽ kebẽbasan jari mrẽntah side napi saq harus side laksaneang,
9laguq lantaran kasihde nike, tiang cume tunas doang. Tiang, Paulus, saq sampun toaq dait mangkin tiang kenyeke tetahen lẽq dalem bui lantaran Deside Isa Almasih,
10ngajuang sopoq petunasan lẽq side mengenai bije tiang lẽq dalem Almasih saq sampun tiang mauq sewaktu tiang araq lẽq dalem bui niki, aranne Onesimus.
11Laẽq ie ndẽq araq manpaatne lẽq side, laguq mangkin ie bemanpaat, ndẽqne cume lẽq side doang, laguq lẽq tiang ẽndah.
12Mangkin ie saq tiang kasihin nike tiang suruq tulak malik tipaq side.
13Setetune tiang melẽt suruq ie ndot kance tiang jari penggentiq side, adẽq ie bau nulung tiang, sengonẽq tiang araq lẽq dalem bui niki lantaran beriteang Kabar Solah lẽman Allah.
14Laguq tiang ndẽq mẽlẽ ngelaksaneang napi-napi lamun side ndẽqman setuju, adẽq saq solah nike ndaq side laksaneang secare terpakse, laguq secare ihlas.
15Sang Onesimus bekelin lẽman side cume sementare waktu, adẽq side bau miaq ie tulak malik selaẽq-laẽqne.
16Mangkin Onesimus nike ndẽqne sekedar hambe doang, ie lebihan lẽman nike. Ie jari semeton saq pade-pade ite kasihin, secare manusie dait lẽq dalem Tuhan. Ie bemanpaat gati umaq tiang, lebih-lebih lẽq side! Pasti ie bemanpaat gati jari pelayan atao jari semeton lẽq dalem Tuhan!
17Lamun side anggep tiang baturde saq seiman, side harus terimaq malik Onesimus maraq side nerimaq tiang.
18Lamun ie salaq atao berutang lẽq side, alurang tiang saq nanggung selapuqne nike.
19Tiang, Paulus, nulis kadu ime tiang mẽsaq: lunasang selapuqne. Tiang ndẽqne perlu ingetang bahwe side mẽsaq berutang lẽq tiang, nike diriqde mẽsaq.
20Semeton tiang Pilemon, semoge lẽq dalem Tuhan side bemanpaat umaq tiang, adẽq angen tiang jari gembire lẽq dalem Almasih.
21Tiang tulis surat niki lantaran yakin bahwe side gen ngelaksaneang napi saq tiang tunas. Malahan tiang nenaoq side gen ngelaksaneang saq lebihan lẽman nike.
22Selain nike, tulung sedieang tiang taoq jari madẽq lẽq balẽnde, sẽngaq tiang beharep adẽq langan do'e-do'ende tiang gen tetulakang tipaq side.
23Epapras, saq araq bareng kance tiang lẽq dalem bui lantaran Almasih, ngirim salam tipaq side.
24Terimaq ẽndah salam batur-batur tiang: Markus, Aristarkus, Demas dait Lukas.
25Rahmat Junjungan Saq Mulie Deside Isa Almasih araq bareng roh side.