Dual Panel1Titus, bije tiang! Tiang, Paulus, nulis surat niki sebagẽ hambe Allah dait rasul Deside Isa Almasih. Tiang tepilẽq dait teutus jari meliharaq iman dengan-dengan saq sampun tepilẽq siq Allah, dait jari meliharaq penenaoq mengenai kebenaran saq nyate lẽq ibadahte.
2Pengajahan nike tedasarang lẽq pengharepan bahwe ite gen nerimaq idup sejati dait kekel. Allah sampun janjiqang idup nike sendẽqman awal jaman -- dait Allah ndẽqne mungkin beduste.
3Lẽq waktu saq sampun Ie tentuang, Allah nyatayang janji-Ne nike lẽq dalem manik-Ne. Manik nike sampun tepercayeang lẽq tiang, dait tiang nyampẽang manik nike sesuai kance prẽntah Allah, Juruselamet ite.
4Titus, bije tiang saq sah lẽq dalem imante saq pade. Rahmat dait damẽ sejahtere lẽman Allah Bapa dait Deside Isa Almasih, Juruselamette araq bareng kance side.
5Tiang bilin side lẽq Kreta adẽq side bau ngurus hal-hal saq masih perlu teatur. Dait adẽq side ngangkat pemimpin-pemimpin jemaah lẽq sebilang kote, maraq saq sampun tiang pesen lẽq side:
6Dengan saq jari pemimpin jemaah harus dengan saq ndẽq bedowẽ cacat cele; ie harus bedowẽ cume sopoq senine; bije-bijene harus idup lẽq dalem iman dait ndẽqne tekenal jari kanak tele dait saq ndẽq bau teatur.
7Pengawas jemaah nike dengan saq ngurus karye Allah, ie ndẽqne kanggo bedowẽ cacat cele. Ie ndẽq kanggo sombong atao becat sili, atao girang bowos, atao girang besiaq atao serakah.
8Laguq ie harus demen bẽng dengan nyodoq lẽq balẽne, demen lẽq hal-hal saq solah, bijaksane, adil, solẽh dait tao nahen diriq.
9Ie harus bedowẽ keyakinan saq teguq lẽq pengajahan saq kenaq, maraq saq sampun teajahang lẽq ie. Siq care nike ie sanggup ngebẽng nasẽhat lẽq dengan tedasarang ajahan nike, dait ngeyakinang dengan-dengan saq nentang ie.
10Sẽngaq araq luwẽq dengan saq ndẽq mẽlẽ teatur, terutame lẽq antare ie pade saq ngelaksaneang hukum sunat. Ie pade nyesatang dengan lain siq raos saq ndẽq araq manpaatne.
11Dengan-dengan saq maraq nike harus tetungkem biwihne, sẽngaq ie pade miaq kaco luwẽq keluarge siq pengajahan-pengajahan saq ndẽq-ndẽq. Ie pade ngelaksaneang nike cume lantaran mẽlẽ boyaq keuntungan saq ndẽq patut!
12Laẽq ie pade sampun bedowẽ sopoq nabi, saq asalne lẽman Kreta ẽndah, bebase, "Dengan-dengan Kreta girang beduste, dait maraq binatang buas saq serakah dait mayus."
13Napi saq teucapang siq nabi nike mule kenaq. Keranaq nike side harus peringet ie pade secare teges; adẽq ie pade jari sẽhat lẽq dalem iman
14dait ndẽqne malik percaye lẽq dongẽng-dongẽng Yahudi, atao aturan-aturan saq tepiaq siq dengan-dengan saq ndẽq mẽlẽ nerimaq kebenaran.
15Selapuq-lapuqne suci umaq dengan-dengan saq suci. Laguq umaq dengan-dengan saq kotor pikiranne dait saq ndẽq beriman, ndẽq araq napi juaq saq suci, sẽngaq pikiran dait atẽ nurani ie pade sampun kotor!
16Ie pade bebase bahwe ie pade kenal kance Allah, laguq siq perbuatan ie pade, ie pade nilas Ie. Ie pade bejat, durhake dait ndẽqne sanggup ngelaksaneang hal-hal saq solah.