Dual Panel1Terus tiang dengah suare saq belẽq lẽman dalem Gedẽng Suci Allah bemanik tipaq kepituq malaẽkat nike, "Silaq lumbar dait tumpahang isi kepituq cawan murke Allah nike ojok gumi!"
2Malaẽkat saq penembẽq lumbar, dait numpahang isi cawanne ojok gumi. Make tiwoq budun-budun saq nakutang dait bahaye lẽq selapuq dengan saq bedowẽ tande binatang nike, dait lẽq dengan-dengan saq nyembah tetatone.
3Sesampun nike malaẽkat kedue numpahang isi cawanne ojok segare. Make aiq segare jari daraq, maraq daraq dengan ninggal, dait matẽ ẽndah selapuq mahluk saq idup lẽq dalem segare.
4Beterus malaẽkat saq ketelu numpahang isi cawanne ojok kokoq-kokoq dait ojok pengembulan-pengembulan aiq, make selapuq aiqne jari daraq.
5Tiang dengah malaẽkat saq bekuase lẽq aiq nike bebase, "Hukuman saq Deside turunang nike adil, Deside saq Mahesuci, Allah saq araq, dait saq sampun araq!
6Sẽngaq ie pade sampun numpahang daraq dengan-dengan saq tehususang bagi Allah dait daraq nabi-nabi; mangkin Deside ngicanin ie pade nginem daraq. Mule hal nike patut umaq ie pade!"
7Terus tiang dengah suare lẽman mẽje taoq kurban, "Ya Allah, Tuhan Saq Mahekuase, kenaq dait adil selapuq keputusan Deside!"
8Sesampun nike malaẽkat keempat numpahang isi cawanne ojok jelo, make jelo ẽndah teijinang ngotongang manusie siq api.
9Manusie tekotongang siq panas jelo saq keras nike, dait ie pade ngutuk pesẽngan Allah, saq bekuase lẽq bencane-bencane nike. Timaq maraq nike, ie pade ndẽq mẽlẽ tobat lẽman dose-dose ie pade dait ndẽq mẽlẽ mulieang Allah.
10Terus malaẽkat kelime numpahang isi cawanne ojok tahte binatang nike. Make selapuq kerajaan binatang nike jari peteng, dait manusie ngakoq ẽlaqne mẽsaq lantaran sakitan.
11Terus ie pade ngutuk Allah lẽq sorge lantaran ie pade sakitan dait lantaran budun-budun ie pade. Laguq ie pade ndẽq mẽlẽ ẽndah tobat lẽman perbuatan-perbuatan ie pade saq jahat.
12Sesampun nike malaẽkat keenem numpahang isi cawanne ojok kokoq Eprat saq belẽq nike. Make kokoq nike gero sehingge raje-raje lẽman timuq bau liwat.
13Terus tiang serioq telu roh jahat saq ruene maraq lẽpang. Sopoq-sopoq lẽpang nike sugul lẽman biwih nage, lẽman biwih binatang, dait lẽman biwih nabi palsu.
14Ie pade roh-roh sẽtan saq miaq keajaipan-keajaipan. Ketelu roh nike lalo ojok selapuq raje lẽq seantẽro dunie dait ngumpulang ie pade jari betempur lẽq jelo saq belẽq, nike jelo Allah Saq Mahekuase.
15"Pade dengahang! Tiang dateng maraq maling! Bahagie dengan saq tetep bejage-jage dait jagaq kelambine, sehingge ie ndẽq lampaq bekelombas dait jari ilaq lẽq julun dengan luwẽq!"
16Beterus roh-roh nike ngumpulang raje-raje nike lẽq sopoq taoq saq dalem base Ibrani aranne Harmagedon.
17Sesampun nike malaẽkat kepituq numpahang isi cawanne ojok awang-awang. Make kedengahan suare saq belẽq lẽman tahte lẽq Gedẽng Suci Allah, "Sampun inggas!"
18Terus araq kisap saling samber dait suare guntur saq begeruduk dait lindur saq belẽq. Ndẽq uwah araq lindur saq maraq nike lẽman manusie tecipteang. Niki lindur saq paling belẽq!
19Kote saq belẽq nike towẽq jari telu bagian, dait kote-kote bangse-bangse saq lain ancur. Terus Allah iling lẽq Babel saq belẽq nike. Make Allah ngicanin ie nginem anggur lẽman cawan anggur murke-Ne.
20Selapuq pulao telang, dait selapuq gunung ẽndah musnah.
21Ujan ẽs saq belẽq, saq sopoq-sopoq beratne sẽket kilo, geriq lẽman langit nimpe dengan-dengan. Make ie pade ngutuk Allah lantaran bencane ujan ẽs saq belẽq gati nike.