Dual Panel1Sesampun nike tiang serioq sopoq malaẽkat saq lain turun lẽman sorge. Ie bedowẽ kekuasean saq belẽq, dait kemulieanne miaq selapuq gumi jari menah.
2Siq suare saq belẽq, ie bekuih, "Sampun runtuh! Babel belẽq sampun runtuh! Mangkin ie jari taoq ndot sẽtan-sẽtan dait roh-roh jahat. Lẽq dalemne idup segale macem kedit saq najis dait saq temeriq siq dengan.
3Sẽngaq selapuq bangse sampun nginem anggur napsu perbuatanne saq cabul. Raje-raje dunie gawẽq perbuatan saq cabul kance ie, dait pedagang-pedagang lẽq gumi jari sugih siq napsune saq ndẽq bau teandek."
4Terus tiang dengah suare saq lain lẽman sorge, "Pade sugul, umat Tiang! Sugul lẽman dalemne! Ndaq side pade turut dose-dosene, dait milu nanggung hukumanne!
5Sẽngaq dosene betumpuk-tumpuk jangke dateng langit, dait Allah ẽndah iling lẽq kejahatanne.
6Perlakuang ie maraq ie sampun perlakuang side pade; bales ie due kali lipet selapuq saq sampun ie laksaneang. Isiqang cawanne siq ineman saq due kali kerasan lẽman ineman saq ie sadangang umaq side pade.
7Bẽng ie penderitean dait dukecite saq pade luwẽqne kance kemuliean dait kemẽwahan saq ie bẽng tipaq diriqne mẽsaq. Sẽngaq ie tetep doang bebase lẽq diriqne, 'Tiang niki ratu saq mrẽntah! Tiang ndẽq bebalu; tiang ndẽq gen ngalamin kesedihan!'
8Lantaran nike, make dalem sejelo doang ie gen tetimpe siq bahle -- penyakit, kesedihan, dait kelapahan. Dait ie gen tekotongang siq api, sẽngaq Tuhan Allah bekuase hakimin ie."
9Raje-raje dunie saq milu lẽq dalem perbuatan-perbuatan saq cabul dait idup lẽq dalem napsu dengan nine nike, gen tangisin dait ẽroq asẽq lẽq kote nike lamun ie pade serioq pendet nyempuq lẽman api saq ngotongang ie.
10Ie pade gen nganjeng lẽman jaoq sẽngaq ie pade takut kene siq penderiteanne. Basen ie pade, "Aduh, celake gati kote saq kesohor niki -- kote Babel saq kuat! Dalem sejam doang hukumande sampun telaksaneang!"
11Pare pedagang lẽq gumi ẽndah nangis dait bedukecite lantaran dengan nine nike, sẽngaq ndẽq araq sopoq dengan juaq saq bau malik beli barang-barang dagangan ie pade.
12Ndẽq araq saq beli emas, perak, permate, dait mutiare ie pade; lakar lẽnen, lakar warne lempok lomaq, sutre dait lakar warne bẽaq toaq; segale macem kayuq saq sengẽh ambune, barang-barang lẽman gading gajah dait lẽman kayuq-kayuq saq mahel-mahel, lẽman tembage, besi, dait pualam;
13lẽndong kayuq manis, ragi-ragian, sesengẽhan, mur, dait menyan; anggur dait minyak, tepung dait gandum; sampi dait dombe, jaran dait kerẽte, hambe-hambe, malahan nyawe manusie.
14Pedagang-pedagang nike bebase lẽq dengan nine nike, "Selapuq saq side melẽtang sampun ndẽq araq malik, dait selapuq saq solah dait mẽwah sampun telang. Side ndẽq gen ndait ie malik!"
15Pare pedagang saq sampun jari sugih lantaran bedagang lẽq kote nike gen nganjeng lẽman jaoq, sẽngaq ie pade takut kene siq penderiteanne. Ie pade gen nangis dait ẽroq asẽq,
16terus bebase, "Aduh, celake gati kote saq kesohor niki! Biasene ie ngengadu kelambi lẽnen, lakar warne lempok lomaq dait lakar warne bẽaq toaq; biasene ie penoq siq periasan emas, permate, dait mutiare!
17Laguq dalem sejam doang ie sampun kẽlangan selapuq kesugihanne nike!" Selapuq kapten kapal, penumpang, dait anak buah kapal, dait selapuq dengan saq pemẽtaqne lẽq segare, nganjeng lẽman jaoq.
18Dait bekuih sewaktu ie pade serioq pendet nyempuq lẽman api saq julatang kote nike. Ie pade bekuih, "Ndẽq uwah araq kote lain maraq kote saq belẽq niki!"
19Make ie pade sawur awu-awu lẽq ulu ie pade jari tande dukecite, terus nangis dait ẽroq asẽq bekuih-kuih, "Aduh, celake gati kote saq belẽq niki! Kesugihanne sampun miaq selapuq dengan saq bedowẽ kapal-kapal lẽq segare jari sugih! Laguq dalem sejam doang, ie sampun kẽlangan selapuq-lapuqne!"
20Hai sorge, pade besukecite lantaran keancuran kote nike! Hai dengan-dengan saq tehususang bagi Allah, rasul-rasul, dait nabi-nabi, pade besukecite! Sẽngaq Allah sampun ngukum ie jari pembalesan lẽq napi saq sampun ie laksaneang tipaq side pade!
21Sesampun nike, sopoq malaẽkat saq perkase ngangkat sopoq batu -- saq belẽqne maraq batu gilingan saq belẽq terus tesaut ojok segare, dait bebase, "Maraq niki entane kote Babel saq kesohor nike gen tesaut sehingge ndẽq gen tedait malik.
22Suare kecapi, penyanyi-penyanyi, dait peniup-peniup suling dait terompẽt ndẽq gen kedengahan malik lẽq dalemde, ndẽq gen tedait ẽndah sopoq dengan saq ahli lẽq bidang kesenian lẽq derike, dait suare batu penggilingan ẽndah ndẽq gen kedengahan malik.
23Dengan ndẽq gen serioq malik cahaye dilah lẽq dalemde; dait ndẽq gen kedengahan ẽndah suare dengan begawẽ ngawinang lẽq derike. Pedagang-pedagang nike dengan-dengan saq paling tehormatin lẽq gumi, dait siq ilmu-ilmu sẽhẽrde side nipu selapuq bangse lẽq dunie!"
24Babel tehukum sẽngaq lẽq dalem kote nike sampun kendaitan daraq nabi-nabi, daraq dengan-dengan saq tehususang bagi Allah, dait daraq selapuq dengan saq sampun tematẽq lẽq gumi.