Dual Panel1Sesampun nike tiang serioq sopoq malaẽkat turun lẽman sorge. Lẽq imene ie negel kunci jurang maut dait sopoq rantẽ saq belẽq.
2Terus ie bau nage, ulah toaq nike, -- nike Belis dait Sẽtan nike -- dait sẽkoqne siyu taun ngonẽqne.
3Beterus malaẽkat nike tetẽh nage nike ojok dalem jurang maut, dait lentingne jurang nike dait tesẽgel, adẽq nage nike ndẽq bau malik nyesatang bangse-bangse sendẽqman tutuq waktu saq siyu taun nike. Sesampun nike ie harus telepas, laguq waktune singket.
4Beterus tiang serioq tahte-tahte, dait dengan-dengan saq tokol lẽq tahte-tahte nike teicanin kuase jari mutusang hukuman. Tiang serioq ẽndah jiwe-jiwe dengan-dengan saq sampun tepeleng belongne lantaran ie pade ngebẽng kesaksian mengenai Deside Isa, dait nyampẽang Manik Allah. Dengan-dengan nike ndẽq nyembah binatang, atao tetatone. Ie pade ndẽq uwah nerimaq tande binatang nike lẽq telakar dait lẽq ime ie pade. Make ie pade idup malik dait mrẽntah jari raje bareng Almasih siyu taun ngonẽqne.
5Niki penembẽqne dengan-dengan ninggal teidupang malik. (Laguq dengan-dengan ninggal saq lainne ndẽqman teidupang lẽq waktu saq siyu taun nike.)
6Bahagie dengan-dengan saq milu teidupang malik lẽq waktu saq penembẽq nike. Ie pade patut jari dowẽn Allah. Kematẽan saq kedue ndẽq bekuase malik lẽq ie pade. Ie pade gen jari imam-imam Allah dait imam-imam Almasih; dait ie pade gen mrẽntah bareng Almasih siyu taun ngonẽqne.
7Sesampun tutuq waktu saq siyu taun nike, Belis gen telepas lẽman bui,
8dait ie gen lalo nyesatang bangse-bangse saq nyebar lẽq seantẽro gumi, nike Gog dait Magoq, dait ngumpulang ie pade jari perang dait jumlah ie pade luwẽq gati, maraq gerẽs lẽq segare.
9Beterus ie pade bepencar-pencar ojok seantẽro gumi, terus ngepung kẽmah dengan-dengan saq tehususang bagi Allah dait kote saq tetunah siq Allah. Laguq api turun lẽman langit dait musnahang ie pade.
10Beterus Belis saq nyesatang ie pade nike, tesaut ojok segare api dait urirang. Lẽq derike taoqne binatang dait nabi palsu nike tetetẽh, dait ie pade gen tesiksaq kenjelo kekelem jangke selaẽq-laẽqne.
11Sesampun nike tiang serioq sopoq tahte putẽq saq belẽq dait Ie saq melinggih lẽq atasne. Langit dait gumi musnah lẽman arepan-Ne, sehingge ndẽq penggitan malik.
12Dait tiang serioq dengan-dengan ninggal, belẽq dait kodẽq, nganjeng lẽq arepan tahte nike. Make kitab-kitab tebukaq. Terus sopoq kitab saq lain tebukaq ẽndah, nike kitab kehidupan. Beterus hukuman tetimpeang tipaq dengan-dengan saq ninggal, setimpal kance perbuatan ie pade maraq saq tecatet lẽq dalem kitab-kitab nike.
13Beterus segare nyerahang dengan-dengan ninggal saq araq lẽq dalemne. Maut dait Alam Maut ẽndah nyerahang dengan-dengan ninggal saq araq lẽq ie. Dait dengan-dengan ninggal nike selapuqne tehukum siq hukuman saq setimpal kance perbuatan ie pade.
14Beterus Maut dait Alam Maut nike tetetẽh ojok segare api. (Segare api niki kematẽan saq kedue.)
15Dengan-dengan saq aranne ndẽq tetulis lẽq kitab kehidupan, tetetẽh ojok dalem segare api.