Dual PanelParmatei ni Raja Daud
1Jadi dob lambin dohorni ajal ni si Daud, martonah ma ia hu bani anakni si Salomo, nini ma,
2“Na laho mando ahu marayak dalan ni haganup jolma na i atas tanoh on. Tenger ma uhurmu anjaha margogoh ma ho,
3anjaha jolom ma paraturan ni Jahowa Naibatamu, mardalan ma ho bani dalan-Ni, ramotkon titah-Ni, uhum-Ni pakon hasaksian-Ni, songon na tarsurat bani titah ni si Musa, ase maruntung ho bani ganup silahoanmu pakon bani ganup sidalananmu;
4ase ipatotap Jahowa hata-Ni, na dob pinarbagah-bagah-Ni hu bangku, ʻAnggo iramotkon anakmu do dalan ni sidea, marhitei na marparlahou sidea i lobei-Hu ibagas hasingtongan hun bani gok ni uhur ni sidea pakon hun bani gok ni tonduy ni sidea, seng anjai rotap hunbam dalahi, na hundul bani paratas ni Israel.ʼ
5Ambah ni ai ibotoh ho do na binahen ni si Joab, anak ni si Seruya hu bangku, naha pambahenni hu bani dua halak pambobai ni bala ni Israel, ai ma hu bani si Abner, anak ni si Ner pakon si Amasa, anak ni si Jeter, ai ma na binunuhni, ibalaskon do sanggah damei daroh ni halak, na dob madurus sanggah porang, anjaha ilapuhon daroh na so marpipot bani gondit na i binongeihu, pakon bani sipatu na bani naheihu.
6Antong bahen ma romban hu bani hapentaranmu, tapi ulang ma palopas uluni na ubanon ai marsonang-sonang tuad hu nagori toruh.
7Tapi maridop ni uhur ma ho hu bani anak ni si Bersillai, halak Gilead ai, lopas ma sidea saor hu bani halak na rap mangan pakon ho, ai sonai do pangalo-alo ni sidea bangku, sanggah na maporus ahu i lobei ni si Absalom abangmondi.
8Anjaha tonggor ma, i lambungmu do homa si Simei, anak ni si Gera, halak Benyamin na hun Bahurim, na mamurai ahu parah bani ari parporushu hu Mahanaim; tapi sanggah tuad ia manjumpahkon ahu hu Bah Jordan, hubijahon do bani marhitei goran ni Jahowa, ningku do, ʻSeng anjai bunuhonku ho marhitei podang!ʼ
9Tapi ulang ma lang hona uhum ia ipaturut ho, ai halak na maruhur do ho, ibotoh ho do, aha sibahenonmu bani, maningon marabul daroh do bahenonmu uluni na ubanon ai tuad hu nagori toruh.”
10Dob ai modom ma si Daud rap pakon ompung-ompungni, anjaha itanom ma ia i huta ni si Daud.
11Ia dokah ni si Daud manggomgom halak Israel ompat puluh tahun do, pitu tahun dokahni ia manrajai i Hebron, anjaha tolu puluh tolu tahun i Jerusalem.
12Ase si Salomo ma na hundul bani paratas ni si Daud, bapani ai, anjaha lambin jonamni do harajaonni ai.
Hona Bunuh si Adonia
13Dob ai roh ma si Adonia, anak ni si Hagit, marayak si Batseba, inang ni si Salomo. Jadi nini ma, “Damei do na hinarohkonmon?” Balosni, “Damei do.”
14Dob ai nini ma use, “Adong do sihatahononku bamu.” Nini si Batseba, “Hatahon ma!”
15Nini ma, “Ibotoh ham do, ahu do simada harajaon in, anjaha ganup halak Israel mangarap, ahu do gabe raja; tapi nuan domma minsah harajaon in bani anggingku, halani Jahowa do na patuduhkon ai bani.
16On pe adong do sada pangindoanku bamu, ulang paila ham ahu.” Nini ma hu bani, “Patugah ma!”
17Dob ai nini si Adonia ma, “Mahua parsahapkon ham ma lobei Raja Salomo, ai seng anjai juaonni ham, ase ibere bangku si Abisag na hun Sunem ai bahen parinangonku.”
18Jadi nini si Batseba ma, “Dear, huparsahapkon pe raja ai, pasal ai.”
19Dob ai laho ma si Batseba marayak Raja Salomo, sihol marsahap pakonsi pasal si Adonia. Jadi jongjong ma raja ai manjumpahkonsi anjaha mangunduk ma ia bani; dob ai hundul ma ia bani paratasni, anjaha isuruh raja ai ma homa na mambuat hundulan bani inangni, jadi hundul ma ia bani siamunni.
20Dob ai nini ma, “Adong do otik sipangindoanku bam; ulang ma tulak ahu.” Dob ai nini raja ai ma hu bani, “Patugah ham ma pangindoanmu ai inang, seng anjai tulakonku ham.”
21Nini ma, “Mahua bere ma si Abisag, na hun Sunem bahen parinangon ni si Adonia saninamai!”
22Nini si Salomo ma mambalosi inangni ai, “Mase ma pitah si Abisag na hun Sunem ipangindo ham? Pangindo ham ma homa harajaon in bani; ai ia do abangku, anjaha hapitsi do Malim Abyatar pakon si Joab, anak ni si Seruya.”
23Dob ai ibijahon si Salomo ma ibagas goran ni Jahowa, “Sai ibahen Jahowa ma hu bangku sonai, anjaha lobih ope tene, anggo seng matei si Adonia halani on.
24On pe, songon sintongni manggoluh Jahowa, na patotapkon ahu anjaha na pahundul ahu bani paratas ni bapa, si Daud, anjaha na pajongjong bangku sada rumah, songon na pinarbagah-bagah-Ni ai: Maningon sadari on do matei si Adonia.”
25Dob ai isuruh si Salomo ma si Benaya anak ni si Joyada, itikam ma ia, lanjar matei.
26Tapi anggo hu bani Malim Abyatar, nini raja ai ma, “Laho ma ho hu Anatot, hu ladangmu; patut do namin marutang hosah ho. Tapi seng bunuhonku ope ho sadari on, halani na niusungmu Poti ni Tuhan Jahowa i lobei ni bapa, si Daud, anjaha halani na rap marsitaronon do ho pakon bapa na ijia.”
27Jadi ibuangkon si Salomo ma si Abyatar, ase ulang be malim ni Jahowa ia, gabe saud ma hata ni Jahowa, na dob nilumbahon-Ni hinan pasal ginompar ni si Eli i Silo.
Hona Bunuh si Joab
28Dob das barita ai hu bani si Joab (ai domma marbalik si Joab mangirikkon si Adonia, tapi seng marbalik ia mangihutkon si Absalom), mintor maporus ma ia hu lampolampo ni Jahowa, irohop ma tanduk ni anjapanjap ai.
29Dob ipatugah halak hu bani Raja Salomo, “Domma maporus si Joab hu lampolampo ni Jahowa, anjaha tonggor ma, i lambung ni anjapanjap ai do ia.” Gabe isuruh si Salomo ma si Benaya, anak ni si Joyada, nini ma, “Laho ma ho, tobak ma ia!”
30Jadi dob das si Benaya hu lampolampo ni Jahowa, nini ma hu bani, “Sonon do hata ni raja in, ʻLuar ma ho!ʼ” Tapi nini ma, “Lang, ijon ma ahu matei.” Jadi ipatugah si Benaya ma use hata ai hu bani raja ai, “Sonon do hata ni si Joab, anjaha sonon do balosni hu bangku.”
31Nini raja ai ma mambalosi, “Bahen ma songon na hinatahonni ai, tobak ma ia anjaha tanom, ase mapurpur hun bangku pakon hun bani ginompar ni bapa sapata ni daroh na so marpipot, na niduruskon ni si Joab, age pe seng marhala.
32Jahowa ma mambalaskon hu bani pambahenanni na masambor ai, ai ma na tinobakni ai dua halak na ubanon, na daoh dearan marparuhuran hun bani, anjaha ibunuh do sidea marhitei podang seng ibagas botoh ni bapa, si Daud, ai ma si Abner anak ni si Ner, pambobai ni bala ni Israel pakon si Amasa, anak ni si Jeter, pambobai ni bala ni Juda.”
33Ase marsapata ma daroh ni sidea hu bani ulu ni si Joab pakon hu bani ginomparni ronsi sadokah ni dokahni; tapi anggo hu bani si Daud, pakon ginomparni ronsi pangisi ni rumahni pakon paratasni, sai jumpahan damei ma hun bani Jahowa ronsi sadokah ni dokahni.
34Jadi tangkog ma si Benaya, anak ni si Joyada, itobak ma ia lanjar matei; gabe itanom ma ia ibagas rumahni i halimisan.
35Dob ai ipabangkit raja ai ma si Benaya anak ni si Joyada gabe gantihni, mambobahon bala ai, homa ipabangkit raja ai ma Malim Sadok gantih ni si Abyatar.
Hona Bunuh si Simei
36Dob ai isuruh raja ai ma na mangalopi si Simei, nini ma hu bani, “Pajongjong ma bam sada rumah i Jerusalem, ase ijai ho marianan, anjaha seng bulih ho luar hunjai barang huja pe.
37Anjaha botoh ma, sadihari ho luar mandipari Bah Kidron ai, maningon matei do ho; marsapata hubam ma darohmu.”
38Nini si Simei ma hu bani raja ai, “Dear do na hinatahonmu ai; songon hinatahon ni tuannami, sonai do bahenon ni jabolonmu on.” Jadi marianan i Jerusalem ma si Simei, hundokah do.
39Hape dob salpu tolu tahun, lintun ma dua halak jabolon ni si Simei hu bani si Akis, anak ni si Maaka, raja ni Gat. Jadi adong ma na patugahkon hu bani si Simei, “Tonggor ma, i Gat do jabolonmu ai.”
40Jadi laho ma si Simei, ipalanai ma halodeni, sihol bingkat hu Gat marayak si Akis mangindahi jabolonni ai. Jadi dob das si Simei, iboan ma jabolonni ai mulak hun Gat.
41Jadi adong ma na patugahkon hu bani si Salomo, na dob laho si Simei hun Jerusalem hu Gat, anjaha mulak use.
42Dob ai isuruh raja ai ma na mangalopi si Simei, anjaha nini ma hu bani, “Ai lang domma pala hupabija ho bani Jahowa, anjaha husaksihon bam sonon, ʻSadihari ho luar anjaha laho barang huja, botoh hinan ma, maningon matei do ho?ʼ Anjaha ihatahon ho do bangku ijia, ʻDear do hatamu ai, domma hubogei.ʼ
43Mase ma lang idingat ho bulawanmu bani Jahowa pakon na huparentahkon ai bam?”
44Ambahni ai, nini raja ai ma hu bani si Simei, “Ho pe, ibotoh ho do ibagas uhurmu sagala hajahaton, na binahenmu hu bani bapa, si Daud. Halani ai Jahowa ma na mambalaskon hajahatonmai bam.”
45Tapi dapotan pasu-pasu ma Raja Salomo, anjaha jonam ma paratas ni si Daud i lobei ni Jahowa ronsi sadokah ni dokahni.
46Dob ai ihatahon raja ai ma si Benaya. Anak ni si Joyada, luar laho manobaksi, gabe matei ma ia. Jadi totap ma harajaon ai ibagas tangan ni si Salomo.