Dual PanelPartubuh ni si Samuel
1Adong ma sada halak hun Ramataim-Zofim, hun Dolog Efraim, na margoran si Elkana, anak ni si Jeroham, anak ni si Elihu, anak ni si Tohu, anak ni si Zuf, halak Efrata.
2Dua do parinangonni, goran ni na sada si Hanna, goran ni na sada nari si Peninna. Tubuhan tuah do si Peninna, tapi anggo si Hanna seng tubuhan tuah.
3Sai tangkog do halak ai ganup tahun hun hutani laho marsombah pakon manggalang hu bani Jahowa Zebaot i Silo; ijai do anak ni si Eli na dua ai, si Hopni pakon si Pinehas, malim bani Jahowa.
4Bani ari panggalangonkon ni si Elkana, ibere ma hu bani si Peninna, parinangonni ai pakon hu bani ganup anakni ampa boruni rupeini bei;
5tapi anggo hu bani si Hanna lompit do ibere rupeini, ai haholonganni do ia, age pe lambang ia ibahen Jahowa.
6Seda do uhurni ibahen imbangni ai marhitei hata salig-salig, halani na lambang ai ia ibahen Jahowa.
7Sai sonai do masa ganup tahun; barang piga hali ia tangkog hu Rumah ni Jahowa, sai isalig-salig do ia, gabe sai tangis ma ia anjaha seng ra mangan.
8Jadi nini si Elkana, paramangonni ai ma hu bani, “Alo Hanna! Mase sai tangis ham? Anjaha mase lang ra ham mangan? Mase sai horu uhurmu? Ai lang harganan do ahu iahap ham hun bani sapuluh anak?”
9Bani na sahali, dob salpu mangan ampa minum halak i Silo, jongjong ma si Hanna, hundul do anggo Malim Eli bani hundulanni i lambung ni tiang ni Rumah ni Jahowa;
10ibagas pusok ni uhurni martonggo ma ia bani Jahowa anjaha tangis-tangis.
11Dob ai marbagah-bagah ma ia, nini ma, “Ham Jahowa Zebaot, anggo itatap Ham do hasombuhan ni jabolon-Mu naboru on, anjaha idingat Ham do ahu, anjaha seng ihalupahon Ham jabolon-Mu naboru on, tapi ra Ham mambere bani jabolon-Mu naboru on sada anak, jadi bereonku ma ia hu bani Jahowa, sadokah manggoluh ia anjaha seng anjai dais pisou parsuhur bani uluni.”
12Sanggah sai na inunut ai martonggo i lobei ni Jahowa, sai ipardiatei si Eli do pamanganni.
13Martonggo ibagas uhurni do si Hanna; pitah bibirni do na mubit-ubit, anjaha sorani seng tarbogei; halani ai iagan si Eli do na mabuk ia.
14Jadi nini si Eli ma hu bani, “Sadiha dokah on do ham mabuk? Padaoh ma hamabukon in hun bamu!”
15Tapi nini si Hanna ma mambalosi, “Lang tuannami, naboru na marpusok ni uhur do ahu; seng na minum anggur barang siinumon na koras ahu on, uhurhu do na huuseihon i lobei ni Jahowa.
16Ulang ma iagan ham naboru na jahat jabolonmu naboru on, ai hun bani gok pakon pusok ni uhur na banggal in do ahu marsahap ronsi nuan.”
17Nini si Eli ma mambalosi, “Laho ma ham ibagas damei, sai na bereon ni Naibata ni Israel do bamu na pinindomu in hun Bani.”
18Jadi nini si Hanna ma, “Sai dapotan idop ni uhur ma tongon jabolonmu naboru on i lobeimu.” Dob ai laho ma naboru ai mannunuti dalanni anjaha mangan, seng be marposi bohini.
19Patarni ai girah ma ia puho laho marsombah i lobei ni Jahowa, dob ai mulak ma sidea hu rumah ni sidea i Rama. Iparayak si Elkana ma si Hanna parinangonni ai, jadi idingat Jahowa ma ia;
20gabe boratan rumah ma ia, anjaha itubuhkon sada anak, anjaha ibahen ma goran ni si Samuel, ai nini do, “Hun bani Jahowa do ia hupindo.”
21Tangkog ma use si Elkana rap pakon ganup parrumahni, laho manggalangkon bani Jahowa galangan tahunan pakon bagah-bagahni.
22Tapi seng tangkog anggo si Hanna, nini ma dompak paramangonni ai, “Dob pe sirang minum dakdanak on, ase boanonku ia, ase mangadap ia hu lobei ni Jahowa, anjaha tading ia ijai tongtong.”
23Nini si Elkana paramangonni ai ma hu bani, “Bahen ma na ija sidearan nini uhurmu; paima ma, ronsi sirang minum ia; sai ipasaud Jahowa ma hata-Ni.” Jadi tading ma naboru ai painumkon anakni ai paima sirang minum ia.
24Ase dob sirang minum ia, iboan ma ia rap pakon sada anak ni lombu na marumur tolu tahun, sada efa nitak pakon sahadingan anggur; iboan ma ia hu Rumah ni Jahowa i Silo, tapi poso ope dakdanak ai.
25Isayat sidea ma anak ni lombu ai, anjaha iboan ma dakdanak ai hu bani si Eli.
26Nini ma, “Santabi, tuannami! Songon sintongni manggoluh ham, tuannami, ahu do naboru na jongjong ijon ijia i lobeimu, martonggo hu bani Jahowa.
27Dakdanak on do, na hutonggohon ijia, gabe ilayak-layakkon Jahowa hu bangku na pinindo ni uhurhu hun Bani.
28Halani ai ondoskononku ma ia bani Jahowa. Sai ondos bani Jahowa ma ia, sadokah ia manggoluh.” Jadi lanjar manombah ma sidea bani Jahowa ijai.