Dual PanelSi Daud i Huta Nob
1Dob ai das ma si Daud hu Nob, hu bani Malim Ahimelek. Tapi songgotan ma si Ahimelek manjumpahkon si Daud, jadi nini ma hu bani, “Mase punjung sahalak ham, seng dong hasomanmu age sahalak?”
2Dob ai nini si Daud ma dompak malim Ahimelek, “Itonahkon rajanta do sada hata hu bangku, anjaha nini do hu bangku, ʻSeng bulih botohon ni atap ise pasal hata na hutonahkon in bam. Domma hutotapkon ianan parjumpahan hu bani hasomanku.ʼ
3On pe, aha do na dong bamu? Bere ham ma bangku lima ruti, atap aha pe na dong ijon.”
4Nini malim ai ma mambalosi si Daud, “Seng dong ruti na somal bangku, pitah ruti na mapansing hansa; asal ma tarpadaoh halak dirini hun bani naboru.”
5Jadi nini si Daud ma mambalosi malim ai, “Tongon tumang, domma dua ari daoh do naboru hunbennami, sanggah bingkat ahu; pansing do tong badan ni halak ai, age pe pardalanan na somal; ai lang daoh mapansingan badan ni sidea sadari on?”
6Dob ai ibere malim ai ma hu bani ruti na pansing ai; ai seng dong ruti ijai sobali ni ruti sigalangkonon ai, ai ma ruti na binuat hun lobei ni Jahowa, laho manggantihon ai marhitei ruti na milas bani ari ibuat ruti ai.
7Tapi adong do ijai sadari ni ai sahalak hun bani jabolon ni si Saul, na tartutup i lobei ni Jahowa, si Doeg do goranni, halak Edom, kopala ni parmahan ni si Saul.
8Dob ai nini si Daud ma dompak si Ahimelek, “Atap adong do iponopkon ham ijon tanja barang podang? Ai seng sampang huboan podangku barang sinjatangku, halani mangolos mandalankon hata ni raja ai.”
9Nini malim ai ma mambalosi, “Podang ni Goliat, halak Palistim ai, na binunuhmu i habungan Elah, tonggor ma, ijon do ibaluti ibagas hiou, i pudi ni baju epod; anggo sihol buatonmu ai, buat ma, ai seng dong na legan sobali ai ijon.” Nini si Daud ma, “Seng dong na usih hujai, bere ham ma in bangku.”
Si Daud Rap pakon Raja Akis
10Dob ai bingkat ma si Daud, maporus sadari ni ai hun lobei ni si Saul, anjaha laho ma ia hu bani si Akis raja ni Gat.
11Tapi nini juakjuak ni si Akis ma hu bani, “Ai lang on do si Daud, raja ni nagori ai? Ai lang pasal ia do mandoding marsibalos-balosan sidea sanggah na manortor ai: Marribu-ribu do italuhon si Saul, tapi marlaksa-laksa do italuhon si Daud.”
12Iparuhurhon si Daud do hata ai, gabe mabiar tumang ma ia bani si Akis, raja ni huta Gat ai.
13Jadi ipalegan ma parlahouni i lobei ni sidea, anjaha ipapodou-podou ma dirini; margonrang-gonrang ma ia bani labah ni horbangan ai, anjaha dehdehan tijurni hu bani gumisni ibahen.
14Dob ai nini si Akis ma hu bani juakjuakni ai, “Tonggor ma, podouan do halak in; mase ma ibobahon hanima ia bangku?
15Ai hurangan gakni ahu bani halak na podouan, ase iboan hanima halak in, laho patuduhkon podouni ai bangku? Tor halak sisonon ma masuk hu rumahku?”