Dual PanelSi Daud i Tongah-tongah ni Halak Palistim
1Jadi nini si Daud ma ibagas uhurni, “Sai na matei do ahu barang antigan bahenon ni si Saul; dearan ma nini uhurhu maporus ahu hu tanoh ni halak Palistim, tontu anggo sonai maronti ma si Saul mangindahi ahu i tanoh Israel, gabe maluah ma ahu hun bani tanganni.”
2Dob ai bingkat ma si Daud, laho ma ia pakon hasomanni sionom ratus halak ai hu bani si Akis, anak ni si Maoh, raja ni Gat.
3Jadi marianan ma si Daud rap pakon si Akis i Gat, ia pakon hasomanni, ganup rap pakon rumah tanggani, anjaha si Daud rap pakon parinangonni na dua ai, si Ahinoam na hun Jesreel, pakon si Abigail, parinangon ni si Nabal hinan, halak Karmel ondi.
4Jadi dob ibotoh si Saul, na dob maporus si Daud hu Gat, gabe seng be inunut mangindahisi.
5Sahali nini si Daud ma dompak si Akis, “Sapala domma jumpahan idop ni uhur ahu i lobeimu, mahua bere ham ma sada huta bangku, ase ijai marianan ahu; mase ma pala marianan juakjuakmu rap pakon ham i huta pamatang?”
6Jadi ibere si Akis ma bani sadari ni ai huta Ziklag. Halani ai ronsi sadari on raja hun Juda do simada huta Ziklag.
7Ia dokah ni si Daud marianan i tanoh ni halak Palistim satahun ompat bulan do.
8Dob ai tangkog ma si Daud ampa hasoman-hasomanni, idorab sidea ma halak Gesur, Girsi pakon halak Amalek, ai sidea do siiani tanoh ai hun bani sapari nari, hun Sur das hu tanoh Masir.
9Jadi italuhon si Daud ma tanoh ai, seng ipalopas age sahalak pe na manggoluh, dalahi age naboru, tapi itaban do biri-biri, lombu, halode, unta pakon hiou, dob ai mulak ma ia hu bani si Akis.
10Isungkun si Akis ma ia, “Hunja nasiam martaban sadari on?” Nini si Daud ma mambalosi, “Hun dangsina ni tanoh Juda, atap: Hun dangsina ni tanoh ni halak Jeremeli, atap: Hun dangsina ni tanoh ni halak Keni.”
11Tapi lang ipalopas si Daud manggoluh dalahi atap naboru boanon hu Gat, ai nini uhurni, “Ase ulang iparpatugah sidea pasal hanami, ʻSonon do pambahenan ni si Daud.ʼ” Ase sonai ma pambahenan ni si Daud sadokah marianan ia i tanoh ni halak Palistim.
12Tenger do uhur ni si Akis bani si Daud, ai nini uhurni, “Domma magigi uhur ni bangsa ni halak Israel mangidahsi, halani ai gabe juakjuakku ma ia lalab.”