Dual PanelItaban Halak Palistim Poti Parpadanan
1Sogop ma hata ni si Samuel bani ganup halak Israel. Bingkat ma halak Israel manjumpahkon halak Palistim laho marporang; marsaran ma sidea i Eben-Eser, anjaha halak Palistim marsaran i Afek.
2Dob ipatitir halak Palistim bala ni sidea mangimbang halak Israel, marsiporangan ma sidea, talu ma halak Israel ibahen halak Palistim; hona bunuh do ibahen sidea halak Israel ompat ribu halak i parmunsuhan ai.
3Jadi dob mulak bangsa ai hu parsaranan, nini pangintuai ni halak Israel ma, “Mase ma ipaturut Jahowa hita sadari on talu ibahen halak Palistim? Alop hita ma hun Silo Poti Parpadanan ni Jahowa, ase roh Ia hu tongah-tongahta, ase ipaluah hita hun bani tangan ni munsuhta.”
4Dob ai isuruh bangsa ai ma hu Silo na mangalop Poti Parpadanan ni Jahowa Zebaot hunjai, na marparatas bani herubim; anjaha ijai do anak ni si Eli na dua ai, si Hopni pakon si Pinehas, rap pakon Poti Parpadanan ni Naibata.
5Jadi dob das Poti Parpadanan ni Jahowa hu parsaranan ai, marsurak ma gogoh halak Israel, pala dugur tanoh ai ibahen.
6Jadi dob ibogei halak Palistim sora surak-surak ai, nini sidea ma, “Sora surak-surak bolon aha do na i parsaranan ni halak Heber ai?” Jadi dob ibotoh sidea, poti ni Jahowa do hape roh hu parsaranan ai,
7mabiar tumang ma sidea, ai nini sidea do, “Domma roh Naibata hu parsaranan ni sidea ai.” Ambahni ai nini sidea ma, “Magou ma hita, ai seng ongga ope masa sonon i lobei ni on.
8Magou ma hita! Ise ma na boi paluahkon hita hun tangan ni Naibata na marmulia on? In ma Naibata, na mamunuh halak Masir marhitei bagei-bagei ni sampar i halimisan.
9Tenger ma uhur nasiam, anjaha patuduh nasiam ma hadalahion nasiam alo halak Palistim, ase ulang iparjabolon sidea nasiam, songon nasiam na marjabolon sidea hinan. Patuduh ma hadalahion nasiam anjaha marporang ma!”
10Jadi jobu ma halak Palistim marmunsuh, gabe talu ma halak Israel, anjaha maporus sidea ganup hu lampolamponi bei. Hataluan banggal do ai, ai radag do hun bani halak Israel tolu puluh ribu halak bala pardalan nahei.
11Dapot do homa pakon Poti ni Jahowa; anjaha na dua anak ni si Eli ai, si Hopni pakon si Pinehas matei do.
12Marlintun ma sada halak Benjamin hun parmunsuhan ai, anjaha das ma ia hu Silo sadari ni ai, marpaheian na nirigatan anjaha tanoh i atas uluni.
13Jadi dob das ia, tonggor ma, hundul bani hundulanni do si Eli i lambung dalan manatap-natap, ai ihoruhon uhurni do Poti ni Naibata. Anjaha dob das halak ai hu huta ai patugahkon barita ai, mandoraki ma ganup parhuta ai.
14Jadi dob ibogei si Eli sora ni doruh-doruh ai, nini ma, “Sora ni hagaoron aha do in?” Mangolos ma halak ai roh patugahkon hu bani si Eli.
15Marumur siah puluh ualuh tahun ma si Eli ijia, anjaha domma rambon matani, seng marpangidah be.
16Nini halak ai ma dompak si Eli, “Na roh hun parmunsuhan do ahu anjaha na maporus hun parmunsuhan do ahu sadari on.” Jadi nini si Eli ma, “Aha do na masa, alo anakku?”
17Jadi nini siboan barita ai ma mambalosi, “Domma maporus halak Israel ibahen halak Palistim, talu tumang do bangsa in, si Hopni pakon si Pinehas matei do, anjaha tarboan do poti ni Naibata.”
18Jadi dob itaringati poti ni Naibata ai, tinggalak ma si Eli hu pudi hun bani hundulanni i lambung ni horbangan ai; simpok ma borgokni lanjar matei, ai domma matua ia anjaha mombur homa, ompat puluh tahun do halak Israel iuhumi.
19Ia parumaenni, ai ma parinangon ni si Pinehas, boratan rumah do ijia, barah ma toras ni omeini. Jadi dob ibogei na dob iboan poti ni Naibata, anjaha na dob matei simatuani dalahi pakon paramangonni, tompas ma ia lanjar mangintubuh; ai sompong do maborit iahap.
20Marayak laho matei ia, nini naboru na jongjong i lambung ni ai ma hu bani, “Ulang mabiar, ai anak do na tinubuhkonmin!” Tapi seng ibalosi, anjaha seng parduli ia ijai.
21Jadi igoran ma dakdanak ai si Ikabod, arti ni hata ai -- Domma masab hamuliaon hun bani Israel -- halani na dob tartaban poti ni Naibata, pakon halani domma matei simatuani dalahi pakon paramangonni.
22Ai nini do, “Domma masab hamuliaon hun bani Israel, ai domma tartaban poti ni Naibata.”