Dual PanelPangihut ni si Daud i Ziklag
1On ma halak na roh marayak si Daud hu Ziklag, sanggah na maningon marponop ope ia i lobei ni si Saul, anak ni si Kis. Masuk do sidea hu bilangan ni puanglima, na mangurupisi i parporangan,
2halak siparpanah, na pandei mangumbalang marsiamun pakon marsambilou ampa mamanahkon panah. Humbani halak Benjamin sanina ni si Saul:
3Si Ahieser, kopala ai, pakon si Joas, anak ni si Seemas halak Gibea: ambahni ai si Jesiel pakon si Pelet, anak ni si Asmawet; si Beraka pakon si Jehu halak Anatot;
4si Jismaya, halak Gibeon, sada puanglima i tongah-tongah ni sitolupuluh halak ai, lanjar ia do pambobai ni sitolupuluh halak ai; ambah ni ai si Jeremia, si Jahasiel, si Johanan, si Josabad halak Gedera,
5Si Elusai, si Jerimot, si Bealya, si Semarya, si Sepatya, halak Harip,
6si Elkana, si Jissia, si Asarel, si Joeser pakon si Jasobeam halak Korah;
7si Joela pakon si Sebatya, anak ni si Jerobeam hun Gedor.
8Age humbani halak Gad adong do na mamulig marayak si Daud hu dolog batu i halimisan, halak na borani, halak siparporang na tarlatih, na pandei manjolom gantar pakon tanja, siparbohi songon bohi ni singa, anjaha lingkat songon balua i atas ni dolog.
9Si Ezer na parlobei, si Obaja paidua, si Eliab paitolu,
10si Masmana paiompat, si Jeremia pailima,
11si Attai paionom, si Eliel paipitu,
12si Johanan paiualuh, si Elisabet paisiah,
13si Jeremia paisapuluh, si Mahbanai paisapuluh-sada.
14Haganupan ai humbani ginompar ni si Gad, kopala-kopala ni bala; sietekan sanggup manlawan saratus halak anjaha sibanggalan manlawan saribu halak.
15Sidea ma na mandipari Jordan bani bulan sada, sanggah sampur ganup topini, anjaha ipardakdak ganup na marianan i pamah ai, maporus dompak hapoltakan pakon hasundutan.
16Roh do homa humbani halak Benjamin pakon halak Juda marayak si Daud hu benteng dolog batu ai.
17Luar do si Daud manjumpahkon sidea, nini ma mambalosi sidea, “Anggo ibagas damei do nasiam na roh in laho mangurupi ahu, ra do ahu marsada ni uhur pakon nasiam; tapi anggo roh do nasiam, laho mantahihon ahu bani munsuhku, age pe seng dong na salah ihorjahon tanganku, Naibata ni ompungta ma na mangidah anjaha na mamapai nasiam.”
18Jadi sogop ma Tonduy ni Naibata hubani si Amasai, pambobai ni si tolu puluh halak ai, nini ma: juakjuakmu do hanami, alo Daud, anjaha hasomannami do ham, ale anak ni si Isai! Damei, damei ma bamu, damei ma homa bani na mangurupi ham! Ai iurupi Naibatamu do ham. Jadi ijalo si Daud ma sidea, gabe ibahen ma sidea pambobai ni balani.
19Humbani Manasse pe adong do deba na lintun hubani si Daud, sanggah roh ia pakon halak Palistim laho marporang dompak si Saul. Tapi seng saud ia mangurupi sidea, ai dob manriah kopala ni halak Palistim, isuruh sidea ma ia mulak, ai nini sidea do: Ulunta do holi na marmara anggo lintun ia hubani si Saul, tuanni ai.
20Sanggah na laho mulak ia hu Ziklag, lintun ma hubani halak Manasse: Si Adna, si Josabad, si Jadiel, si Mikael, si Josabad, si Elihu pakon si Siletai, ai ma pambobai ni halak Manasse mar sasaribu.
21Sidea do na mangurupi si Daud mangimbang hulanan ni halak sipanamun, ai puanglima do sidea haganupan anjaha pambobai ni bala.
22Ai ari-ari do ijai adong na roh hubani si Daud laho mangurupisi, pala gabe sada bala na banggal, songon bala ni Naibata.
Bala ni si Daud i Hebron
23On do bilangan ni halak siparporang, na gopas marsinjata, na roh marayak si Daud hu Hebron, laho mangalihkon harajaon ni si Saul hubani si Daud romban hubani hata ni Jahowa.
24Halak Juda siusung gantar pakon tanja onom ribu ualuh ratus halak, na gopas marsinjata hu parporangan.
25Humbani halak Simeon, halak na pag marporang, pitu ribu saratus halak.
26Humbani halak Levi ompat ribu onom ratus halak.
27Si Joyada, pambobai ni ginompar ni si Aron, tolu ribu pitu ratus halak do hasomanni.
28Si Sadok, sada halak na maposo anjaha na borani, rap pakon sindohorni, dua puluh dua halak kopala-kopala.
29Humbani halak Benyamin, sanina ni si Saul, tolu ribu halak do; ai ronsi nuan buei ope humbani sidea na mangirikkon ginompar ni si Saul.
30Humbani halak Efraim dua puluh ribu ualuh ratus halak, parporang na borani, halak na tarbarita bani ginompar ni ompung ni sidea.
31Humbani satongah marga Manasse sapuluh ualuh ribu halak, pala tarsurat goran ni sidea, ase roh sidea laho pabangkithon si Daud gabe raja.
32Humbani ginompar ni si Isasar, na pandei pasal ari, na mambotoh barang aha maningon sibahenon ni Israel, dua ratus halak pambobai, anjaha ganup sanina ni sidea unduk do bani hata ni sidea.
33Humbani Sebulon, na bingkat hu parporangan, na gopas bei marsinjatahon bagei ni sinjata porang, lima puluh ribu halak, na roh marodor humbani bulat ni uhurni.
34Humbani Naftali saribu halak pambobai, anjaha hasoman ni sidea, na marsinjatahon gantar pakon tanja, tolu puluh pitu ribu halak.
35Humbani ginompar ni si Dan, dua puluh ualuh ribu onom ratus halak, sirsir bingkat hu parporangan.
36Humbani si Asser ompat puluh ribu halak siparporang, na sirsir marporang.
37Humbani halak Ruben pakon Gad ampa satongah marga Manasse hun dipar ni bah Jordan saratus dua puluh ribu halak do, na iparsinjatai marhitei bagei-bagei ni sinjata porang.
38Ganup halak siparporang ai, ipabaris mangihutkon ruhut parporangan roh humbani gok ni uhurni hu Hebron, laho pabangkithon si Daud gabe raja manggomgomi ganup halak Israel; na legan ai pe sauhur do laho pabangkithon si Daud gabe raja.
39Ijai ma sidea rap pakon si Daud tolu ari dokahni, mangan minum, ai domma ipasirsir sanina ni sidea ai hinan bani sidea.
40Age halak na dohor bani sidea das hu Isasar, Sebulon pakon Naftali, roh do mamboan sipanganon i atas ni halode, unta, pakon lombu, ai ma: Sipanganon humbani nitak, kuei humbani buah ni jambu marsampur buah ni anggur, anggur pakon minak, lombu pakon biri-biri buei tumang, ai malas do uhur ni Israel.