Dual PanelPartalu ni Huta Rabba
1Dob salpu satahun, sanggah panorang ni raja-raja bingkat marmunsuh, ibobahon si Joab ma bala ai, anjaha isiapkon ma tanoh ni halak Ammon; dob ai roh ma ia mangkubu huta Rabba, tapi tading i Jerusalem do anggo si Daud. Jadi italuhon si Joab ma huta ai anjaha iboiskon.
2Ibuat si Daud ma sortali ni raja ai humbani uluni; satalenta omas do boratni, anjaha adong do sada mata intan ijai; inahkon ma ai bani ulu ni si Daud, anjaha buei tumang do taban-taban iboan hun huta ai.
3Anjaha halak pangisi ni huta ai, iboan do, anjaha ibahen ma horjani sidea manjolom gargaji, gaer-gaer bosi pakon hapak; anjaha sonai do homa ibahen si Daud hubani ganup huta ni halak Ammon. Dob ai mulak ma si Daud rap pakon ganup bala ai hu Jerusalem.
Parporangan ni si Daud dompak Halak Palistim
4Dob salpu ai tubuh ma use parporangan i Geser dompak halak Palistim; ibunuh si Sibekkai, halak Husati ai do ijia si Sipai, ai ma sada humbani raksasa ai, gabe tunduk ma halak Palistim ai.
5Dob ai tubuh ma use parporangan dompak halak Palistim, gabe ibunuh si Elhanan, anak ni si Jair ma si Lakmi, sanina ni si Goliat, halak Gat ai; ia suhul ni tanjani ansa basikah do.
6Tubuh use ma parporangan i Gat; adong do ijai sada raksasa, onom bei do jari-jari ni tanganni pakon naheini, gabe dua puluh ompat ma ganup; ia pe ginompar ni raksasa do.
7Jadi sanggah na iapasini ai halak Israel, gabe ibunuh si Jonatan, anak ni si Simea, abang ni si Daud ma ia.
8Ganupan sidea ai ginompar ni raksasa do i Gat; jadi matei ma sidea ibunuh si Daud pakon juakjuakni ai.