Dual PanelSijaga Horbangan, Siramotkon Ugas-ugas pakon Sipangatur
1Pasal parbagi ni sijaga horbangan. Humbani ginompar ni si Korah: Si Meselemya, anak ni si Kore, humbani, ginompar ni si Abiasap.
2Anak ni si Meselemya ai ma: Si Sakarya, bunga tubuhni, si Jediael paidua, si Sebaya paitolu, si Jatniel paiompat.
3si Elam pailima, si Johanan paionom, lsi Elyoenai paipitu.
4Anak ni si Obed-Edom ai ma: Si Semaya bunga tubuhni, si Josabad paidua, si Joah paitolu, si Sahar paiompat, si Netaneel pailima.
5si Amiel paionom, si Isasar paipitu, si Peuletai paiualuh, ai ipasu-pasu Naibata do ia.
6Anak ni si Semaya pe tubuhan anak do, na manrajai ginompar ni ompungni, ai halak na margogoh do sidea.
7Anak ni si Semaya ai ma: Si Otni, si Repael, si Obed pakon si Elsabad, anjaha anggi ni sidea, ai ma si Elihu pakon si Semakya, halak na pantas.
8Ganupan ai ginompar ni si Obed-Edom rap pakon anak ni sidea, sanina ni sidea, halak na pantas mandalankon jabatan ni; onom puluh dua halak humbani ginompar ni si Obed-Edom.
9Anak ni si Meselemya pe ampa saninani, halak na pantas do, tumpu sapuluh ualuh halak.
10Anak ni si Hosa, ginompar ni si Merari, ai ma: Si Simri, kopalani, age pe seng ia bunga tubuhni, ipabangkit bapani do ia gabe kopala;
11si Hilkia paidua, si Tebalya paitolu, si Sakarya paiompat. Ganup anak pakon anggi ni si Hosa sapuluh tolu halak do.
12Ganup parbagian ni sijaga horbangan on, na binagi domu hubani kopalani, adong do horjani usih songon saninani, ai ma marugas i Rumah ni Jahowa.
13Idabuh sidea do ruji-ruji dos bani na etek pakon bani na banggal, mar sasaompung, bani ganup horbangan ai.
14Ruji-ruji ni horbangan parhapoltakan madabuh hubani si Selemya. Idabuh sidea do homa ruji-ruji bani anakni, si Sakarya, sada panuturi na maruhur, gabe madabuh bani ruji-ruji ni horbangan parutara.
15Madabuh do bani si Obed-Edom horbangan na hampit dangsina, anjaha bani anakni, rumah parugasan.
16Bani si Supim pakon si Hosa, ai ma horbangan na hampit hasundutan, i lambung ni horbangan Salehet, bani dalan na laho tangkog ai. Patontang do panjagaan ai.
17Hampit hapoltakan onom halak ganup ari, hampit utara ompat halak ganup ari; anjaha hampit dangsina ompat halak ganup ari; anjaha i lambung ni rumah parugasan dua-dua halak do,
18anjaha bani Parbar hampit hasundutan, ompat halak bani dalan na bolon anjaha dua halak bani Parbar.
19On ma parbagi ni halak sijaga horbangan humbani ginompar ni si Korah pakon ginompar ni si Merari.
20Ia halak Levi, sanina ni sidea, sidea do haondosan ni ugas-ugas i Rumah ni Naibata ampa ugas-ugas humbani sibere-bere na pinapansing.
21Ginompar ni si Laedan halak Gersom ai, kopalani humbani si Laedan, halak Gersom ai, ai ma si Jehiel.
22Anak ni si Jehiel ai ma: Si Setam pakon si Joel saninani ai, ai ma haondosan ni ugas-ugas ni Rumah ni Jahowa.
23Humbani ginompar ni si Amram, si Jisehari, si Hebron pakon si Usiel, ai ma:
24Si Subael, anak ni si Gersom, anak ni si Musa, kopala ni siramotkon ugas-ugas.
25Saninani: Humbani si Elieser, anak ni ai si Rehabya, anak ni ai si Jesaya, anak ni ai si Joram, anak ni ai si Sikri, anak ni ai si Selomit.
26Ia si Selomit pakon saninani, ai ma haondosan ni sagala ugas-ugas, humbani sibere-bere na pinapansing, ai ma na pinapansing ni Raja Daud, ampa kopala ni mar sasaompung, kopala ni sisaribu pakon sisaratus halak ampa kopala ni bala.
27Ipapansing sidea do taban-taban na dapot i parporangan, laho patorsahon rumah panumbahan.
28Sonai homa haganup na dob pinapansing ni si Samuel, halak na marpanonggoran ai, pakon si Saul anak ni si Kis, pakon si Abner anak ni si Ner, ampa si Joab anak ni si Seruya; sagala ugas-ugas na dob pinapansing ondos do bani si Selomit pakon hubani saninani.
29Humbani ginompar ni si Jisehari, si Kenaya pakon saninani do ipabangkit, mangkorjahon horja pardarat bani halak Israel, songon gamot-gamot ampa panguhum.
30Humbani ginompar ni si Hebron: Si Hasabya ampa saninani, saribu pitu ratus halak bueini, halak na pantas; sidea do na mangatur halak Israel, hampit hasundutan ni Jordan, mandalankon ganup horja bani Jahowa ampa siugashonon bani raja ai.
31Humbani halak Hebron: si Jerya do kopala (ia pasal ginompar pakon marga ni halak Hebron, ipareksa do bani paompatpuluh-tahunkon, dob gabe raja si Daud, gabe jumpah ma i tongah-tongah ni sidea halak na pantas i Jaeser, na i Gilead)
32pakon saninani, dua ribu pitu ratus halak bueini, halak na pantas, kopala ni mar sasaompung; ipabangkit Raja Daud ma sidea mangatur halak Ruben, Gad pakon satongah marga Manasse, mandalankon sagala horja bani Naibata ampa siugasonkon bani raja ai.