Dual PanelGuguan Pajongjong Rumah Panumbahan
1Dob ai nini Raja Daud ma dompak ganup tumpuan ai, “Ia si Salomo anakkin, na dob pinilih ni Naibata sandiri, poso ope ia anjaha seng marpangalaman, tapi borat do ia horja ai; ai seng bahen haporluan ni jolma rumah on, tapi bani Naibata do.
2Halani ai domma hupasirsir humbani ganup gogohku parugas hubani Rumah ni Naibatangku, ai ma omas bani parugas omas, pirak bani parugas pirak, tombaga bani parugas tombaga, bosi bani parugas bosi pakon hayu bani parugas hayu, ambahni ai batu soham sitatahkonon bani intan, batu sibirong ampa na marrupa-rupa, bagei-bagei ni mata intan na maharga ampa batu marmar buei tumang.
3Ambahni ai, halani malas ni uhurhu mangidah Rumah ni Naibatangku, omas ampa pirak na dong bangku, berehononku do ai bahen guguan bani Rumah ni Naibatangku, tambah ni haganup, na dob hupasirsir hinan hubani rumah na mapansing ai,
4ai ma tolu ribu talenta omas, omas na hun Opir, pakon pitu ribu talenta pirak, na dob pinapitah, silampiskononkon bani dingding ni kamarni.
5Omas bani parugas na humbani omas, pirak bani parugas na humbani pirak, pakon bani haganup na pinauli ni tukang. On pe, ise do nuan na marosuh, mamberehon sibere-bereni sadari on bani Jahowa?”
6Jadi mangaku bei ma kopala ni mar sasaompung, kopala ni ganup marga ni Israel, kopala ni sisaribu halak pakon sisaratus halak ampa kopala bani horja ni raja ai.
7Ibere sidea do guguan bani Rumah ni Naibata lima ribu talenta pakon sapuluh ribu darik omas, sapuluh ribu talenta pirak, sapuluh ualuh ribu talenta tombaga, anjaha saratus ribu talenta bosi.
8Anjaha barang ise simada intan, ipadas do ai hu parugasan na i Rumah ni Jahowa, na ibagas panjagaan ni si Jehiel, halak Gerson ai.
9Tapi malas bei do uhur ni bangsa ai, halani ringgas bei do sidea na margugu ai, ai humbani gok ni uhurni bei do sidea na margugu ai bani Jahowa; age Raja Daud malas tumang do uhurni.
Doding Puji-pujian ni si Daud
10Halani ai ipuji si Daud ma Jahowa i lobei ni ganup tumpuan ai, nini ma, “Pinuji ma Ham alo Jahowa, Naibata ni Israel, Bapanami humbani sadokah ni dokahni ronsi sadokah ni dokahni.
11Ai gok Bamu do, alo Jahowa, habanggalon pakon hasangapon, hagogohon pakon hamuliaon, hamonangan ampa hajombuton; ai Ham do simada haganup na i nagori atas ampa na i tanoh on, ai Ham do simada harajaon, alo Jahowa, anjaha ipatimbul Ham do diri-Mu mangatasi haganup.
12Marharorohan hun Bamu do habayakon pakon hamuliaon, anjaha Ham do manggomgomi haganup. Gok Bamu do hagogohon pakon kuasa; gok Bamu do patimbulhon ampa pagogohkon ganupan ai.
13On pe tarima kasih ma Bamu, Ham Naibatanami, anjaha ipuji hanami ma goran-Mu na marmulia in.
14Ai ise ma ahu, anjaha aha ma bangsangkin, ase boi hanami margugu humbani nionjar ni uhur sonin? Ai marharorohan hun Bamu do ganup, anjaha na humbani tangan-Mu in do na binerenami in Bamu.
15Ai halak dagang do hanami i lobei ni bohi-Mu anjaha panginsolat, songon bapanami, usih songon halinoh tumang do ari-arinami i atas tanoh on, seng dong siarapkonon.
16Ham Jahowa Naibatanami, haganup guguan, na dob ipasirsir hanami laho pajongjong sada rumah bani goran-Mu na mapansing in, marharorohan hun Bamu do in, anjaha Ham do simada in ganup.
17Torang do hubotoh, alo Naibatangku, Ham do siuji uhur, anjaha hasintongan do rosuh ni uhur-Mu; ibagas sintong ni uhurhu do hugalangkon ganupan on, anjaha domma huidah bangsa-Mu in, na tumpu ijon nuan, humbani malas ampa nionjar ni uhurni do sidea mambere Bamu.
18Ham Jahowa, Naibata ni ompungnami si Abraham, si Isak pakon si Israel, sai patotap Ham ma ronsi sadokah ni dokahni hauhuron ampa pingkiran na sonai ibagas uhur ni bangsa-Mu, anjaha togu-togu Ham ma uhur ni sidea Bamu!
19Anjaha bere Ham ma bani anakku si Salomo uhur na totap manjolom tonah-Mu pakon aturan-Mu, laho mangkorjahon ganupan ai pakon pajongjongkon rumah panumbahan on; domma pala hupasirsir parugas hujai.”
Parbangkit ni si Salomo, Parmatei ni si Daud
20Dob ai nini si Daud ma dompak ganup tumpuan ai, “Sai puji nasiam ma Jahowa, Naibata nasiam.” Jadi ganup tumpuan ai ipuji ma Jahowa, Naibata ni ompung ni sidea, ipaunduk sidea ma uluni, manrogop ma sidea i lobei ni Jahowa pakon i lobei ni raja ai.
21Dob ai igalangkon sidea ma galangan sisayaton bani Jahowa, anjaha patarni ai igalangkon sidea ma bani Jahowa galangan situtungon saribu lombu, saribu biri-biri tunggal, saribu anak ni biri-biri rap pakon galangan siinumonni, ambahni ai galangan sisayaton buei tumang bani ganup Israel;
22jadi mangan anjaha minum ma sidea bani na sadari ai i lobei ni Jahowa ibagas malas ni uhur banggal. Anjaha ipabangkit sidea ma padua-halihon si Salomo, anak ni si Daud, gabe raja i lobei ni Jahowa anjaha si Sadok gabe malim.
23Jadi hundul ma si Salomo i atas paratas ni Jahowa gabe raja, gantih ni si Daud bapani ai; mardohar do ia, anjaha ganup Israel mangunduk do bani.
24Haganupan kopala ronsi puanglima ampa ganup anak ni raja Daud mangunduk do bani raja Salomo.
25Dob ai ipasangap Jahowa ma si Salomo, gabe timbul tumang i lobei ni ganup Israel, anjaha ilayak-layakkon do bani hamuliaon ni harajaon, na so ongga jinujung ni barang ise humbani raja na parlobei manggomgom Israel.
26Ase si Daud, anak ni si Isai do raja manggomgom ganup Israel.
27Ia dokahni manggomgom Israel, ompat puluh tahun do; i Hebron do ia manrajai pitu tahun, anjaha i Jerusalem tolu puluh tolu tahun.
28Dob ai matei sayur matua ma raja ai, dob sombuh uhurni bani hagoluhan on, bani habayakon pakon bani hamuliaon; jadi si Salomo, anakni ai ma bangkit raja manggantihsi.
29Tapi anggo barita ni Raja Daud, humbani bonani ronsi ujungni, tonggor ma, tarsurat do ai ibagas buku Barita ni Nabi Samuel, Nabi Natan ampa ibagas buku Barita ni Nabi Gad.
30sonai homa ganup barita ni panrajaionni pakon kuasani ampa ganup na masa hu bani pakon bani Israel, ampa hubani haganup harajaon ni ganup nagori na legan ai.