Dual PanelPasal Jabatan Parmahan Ibagas Kuria
1Hata na sintong do on, “Halak na sihol gabe parmahan ibagas kuria, sipindahi horja na madear do ai.
2Halani ai, ia parmahan ibagas kuria, ulang ma adong sihataon bani, pargotong ni sada naboru, torang maruhur, pandei, hormat marparlahou, sipartamuei, na pandei mangajari,
3ulang parminum, ulang parringis, tapi parlamlam ma, ulang siparingor, anjaha ulang simata duit.
4Halak na pandei mangatur rumah tanggani ma ai, pardakdanak sibalosi ajar, hormat ibagas haganup.
5Ai anggo seng ibotoh manrajai rumah tanggani, sonaha ma boi ia patorsahon kuria ni Naibata?
6Ulang ma halak na baru masuk Kristen, ase ulang gabe gijang uhurni jadi madabuh hubagas uhum ni sibolis.
7Maningon dear baritani bani halak pardarat, ulang madabuh ia jadi sirisaon ampa hubagas siding ni sibolis.”
Pasal Jabatan ni Siparugas
8Sonai homa siparugas maningon hormat do, seng sipardua hata, seng parminum, seng simata duit.
9Maningon marsijoloman sidea bani rusia ni haporsayaon in ibagas panggora ni uhur na borsih.
10Maningon siujion do homa lobei sidea; dob torang nani, seng dong sihataon bani sidea, ai pe ase boi sidea gabe siparugas.
11Sonai homa parinangon ni sidea maningon hormat do, ulang sihata-hatai hasoman, torang maruhur anjaha bujur bani haganup.
12Ia siparugas, maningon paramangon ni sada naboru do, na mambotoh manrajai anakni ampa rumah tanggani.
13Sidalankon horja parugason ai dear-dear, tontu lambin marsangap do, anjaha lambin martenger ni uhur ibagas haporsayaon bani Kristus Jesus.
Rimpun ni Haporsayaon
14Mangarap do ahu, podas do ahu roh marayak ham, tapi husuratkon do on bamu, ase,
15porini hun dokah ahu roh, gabe ibotoh ham sonaha patut marparlahou ibagas Rumah ni Naibata, in ma kuria ni Naibata na manggoluh in, tiang ampa onjolan ni hasintongan in.
16Banggal do tongon rusia ni hadaulaton in, domma talar ibagas daging, iparhatongon hapintoronni marhitei Tonduy, taridah bani malekat, iambilankon bani sipajuh begu-begu, ihaporsayai i dunia on, tarangkat hu hasangapon.