Alkitab Mobile SABDA
[VER] : [SIMALUNGUN]     [PL]  [PB] 
 <<  1 Timotius 6 >> 

Sipaingat bani Jabolon

1Sagala halak na marhorja songon jabolon, ihira ma tuanni patut sipasangapon ibagas haganup, ase ulang hona risa goran ni Naibata ampa ajaran in.

2Tapi jabolon, na martuankon halak na porsaya, ulang ma moru parpasangapni bani, halani sanina ia; tapi lambin ibalosi ma ia, halani na porsaya ia anjaha sanina na hinaholongan, na buei marsilayak-layak. In ma ajarhon anjaha podahkon.

Podah na Kahou; Ulih ni Uhur na Sabar

3Barang ise na mangajarhon ajaran na legan, na so romban hubani hata hasintongan ni Tuhanta Jesus Kristus ampa ajaran na mardomu hubani hadaulaton in,

4na pajuntul-juntulhon diri do ai, anjaha na so marpambotoh, na gila marsual-sual do ai ampa martongkar, na parohkon subil, paringoran, risa-risa, tukas-tukas na jahat,

5ampa parsalisihan na manorus humbani halak na dob seda uhurni, na dob magouan hasintongan in, na mangagan pansarian do hadaulaton in.

6Pansarian banggal do tongon hadaulaton in, anggo marhasoman uhur na sonang.

7Ai seng adong iboan hita hu tanoh on anjaha aha pe lang tarboan hita laho luar.

8Halani ai, anggo adong banta sipanganon ampa parhiouon, hasonangkon hita ma in.

9Ia halak na sihol bayak, madabuh do hubagas parlajouan ampa siding ampa bagei ni hisap-hisap haotoon, na mangagou anjaha na mandabuhkon jolma in hubagas hamagouan ampa hasedaon.

10Ai urat ni sagala hajahaton do uhur na holongan bani duit, in do isura-surahon na deba, mambahen kahou humbani haporsayaon, gabe iaikkon buei sitaronon bani dirini.

Podah bani si Timoteus

11Tapi ham, siminik ni Naibata, maporus ma ham hunjai. Parayak ma hapintoron, hadaulaton, haporsayaon, holong ni uhur, hasabaron ampa lamlam ni uhur.

12Habujurhon ma porang haporsayaon na madear in, tangkap hagoluhan sisadokah ni dokahni, ai hujai do ham idilo, anjaha ibahen ham do pangakuan na madear in i lobei ni buei saksi.

13Huparentahkon ma bam i lobei ni Naibata, sipagoluh haganup, ampa i lobei ni Kristus Jesus, na mambahen hasaksian na madear i lobei ni si Pontius Latus:

14Dalankon ma titah in, seng martikas, seng panurakon, ronsi talar Tuhanta Jesus Kristus.

15Ai jumpahkonsi panorangni, talar ma la bahenon ni Na Martuah in, Pargogoh Sisada-sada in, Raja ni sagala raja anjaha Tuhan ni sagala tuan,

16na sada in, na so ra matei, siiani haliharon na so tardohori, na so ongga nididah ni jolma, anjaha seng boi idahon. Bani ma hasangapon ampa hagogohon sadokah ni dokahni. Amen.

17Hatahon ma bani na bayak i dunia on, ulang gijang uhur ni sidea, ulang marhatengeran bani habayakon na so totap in; tapi bani Naibata ma martenger ni uhur, na unjah mamberehon banta sihamalaskononta.

18Mangkorjahon na madear ma sidea, bayak bani horja na madear, paruhur na unjah anjaha ringgas marsilayak-layak,

19ai ma parhiteian bani sidea, patumpuhon arta na madear bani panorang na sihol roh, ase itangkap sidea goluh na sintong.

20Ale Timoteus, ramotkon ma na dob jinalomu; lembangi parsahapan na so daulat ampa parsual-sualan, na salah ginoran “habotohon.”

21In do iirikkon deba halak, gabe manlembang humbani haporsayaon. Idop ni uhur ma mangkasomani nasiam!


  Share Facebook  |  Share Twitter

 <<  1 Timotius 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran