Dual PanelHalak Korint do Surat Hasaksian bani si Paulus
1Ai na mamuji-muji diri do hanami use? Atap na porlu do bannami surat hasaksian bani nasiam atap humbani nasiam, songon bani na deba?
2Nasiam do suratnami, na dob sinurat ibagas uhurnami, na tinanda anjaha na binasa ni haganup halak,
3anjaha tanda do nasiam surat ni Kristus, na sinuratnami, na sinurat sedo marhitei tinta, tapi marhitei Tonduy ni Naibata na manggoluh in do; seng bani panuratan batu, tapi bani panuratan daging do, ai ma pusu-pusu.
Surung ni Padan Na Baru Martimbangkon Padan Na Basaia
4Sonai do tenger ni uhurnami marhitei Kristus bani Naibata.
5Seng mangasup hanami humbani dirinami mamingkiri atap aha pe humbani dirinami, tapi Naibata do na mambahen mangasup hanami.
6Ia do na mambahen mangasup hanami gabe siparugas bani padan na baru, sedo bani surat, tapi bani Tonduy in do, ai na mamunuh do surat, Tonduy in do na pagoluhkon.
7Ai gari parugason hamatean, na marsurat, na niuhir bani batu, marhasangapon do, pala seng tarbahen halak Israel mangkawahkon bohi ni si Musa halani sangap na ra salpu na bani bohini ai,
8ai lang sangapan ma parugason bani Tonduy in?
9Ai anggo sangap parugason na bani uhum, ai lang sangapan ma parugason na bani hapintoron?
10Tongon, seng sangap be na marsangap hinan ijai, halani surung ni hasangapon on.
11Ai anggo sangap na ra salpu, jadi lobihan ma sangap ni na manongtong.
12Halani adong bannami pangarapan na sonai, pag tumang do hanami,
13seng songon si Musa, na mambahen panrungkub bani bohini, ase ulang tarkawahkon halak Israel ujung ni na laho salpu ai.
14Tapi gabe hengkeng do uhur ni sidea. Ai ronsi sadari on, anggo ibasa sidea padan na basaia, tong do rungkub ai; lanjar seng ibuha ope, halani marhitei Kristus do hansa tarpadaoh ai.
15Tongon, ronsi sadari on, tibal do panrungkub ai i atas uhur ni sidea, anggo ibasa surat ni si Musa.
16Tapi sadihari mulak uhur ni sidea bani Tuhan in, ibuat ma panrungkub ai.
17Ia Tuhan in Tonduy do in; anjaha ija Tonduy ni Tuhan in, ijai do haluahon.
18Tapi hita haganup, marbohi na so marpanrungkub, mangidah hasangapon ni Tuhan in songon ibagas sormin, gabe salih songon rupa-Ni, humbani hasangapon hu hasangapon, halani Tuhan, Tonduy in.