Dual PanelIsiapkon si Jehu Ganup Ginompar ni si Ahab
1Tapi adong do pitu puluh anak ni si Ahab i Samaria. Jadi isurat si Jehu ma surat, anjaha itongos ma ai hu Samaria, hu bani pangintuai-pangintuai pakon hu bani siramotkon anak ni si Ahab, nini,
2“Ia dob das surat on bani nasiam, mangidah halani pakon nasiam do anak ni tuan nasiam, anjaha adong do bani nasiam gareta pakon huda, sonai homa huta na marbatar-batar pakon sinjata,
3pilih nasiam ma sidearan pakon sitalupan hun bani anak ni tuan nasiam, anjaha pahundul nasiam ma ia bani paratas ni bapani, anjaha marporang ma nasiam mangkopkop ginompar ni tuan nasiam.”
4Tapi mabiar tumang ma sidea, nini ma, “Tonggor ma, gari na dua raja ai seng tahan i lobei ni, lambin sonaha ma partahanta?”
5Dob ai isuruh kopala ni rumah bolon pakon kopala ni huta rap pakon pangintuai-pangintuai ampa siparramotkon ai ma suruhanni hu bani si Jehu, nini ma, “Juakjuakmu do hanami, anjaha sagala sihatahononmu bannami, sai bahenonnami do. Seng ra hanami pabangkitkon atap ise gabe raja, bahen ham ma barang aha na madear nini uhurmu.”
6Dob ai itongos ma hu bani sidea surat na paduahon, nini ma, “Anggo hampit ahu do nasiam, anjaha anggo ra do nasiam mambalosi ahu, buat nasiam ma ulu ni anak ni tuan nasiam, anjaha roh ma nasiam hu bangku hu Jesreel sonon patar. Ia anak ni raja na pitu puluh halak ai, rap pakon halak na marsangap ni huta ai do, ai do na pagodang-godangkon sidea.”
7Jadi dob das surat ai bani sidea, itangkap sidea ma anak ni raja ai, ibunuh ma sidea na pitu puluh halak ai, inahkon ma ulu ni sidea hubagas raga anjaha itongos ma ai hu bani si Jehu i Jesreel.
8Dob das suruhan ai anjaha ipatugah bani, “Domma iboan sidea ulu ni anak ni raja ai, nini ma, ʻNahkon nasiam ma ai gabe dua gugunan i lambung ni labah ni horbangan ai ronsi patar.ʼ”
9Dob ai patarni ai, sanggah na luar ia, jongjong ma ia, anjaha nini ma hu bani ganup halak simbuei ai, “Seng marsalah nasiam. Ahu do na martahi-tahi dompak tuanku, anjaha na mambunuhsi; tapi ise do na mambunuh haganup on?
10Botoh nasiam ma, na so adong labuh hun bani hata ni Jahowa, na hinatahon ni Jahowa pasal ginompar ni si Ahab; ai ipasaud Jahowa do, na dob hinatahon ni juakjuak-Ni si Elias.”
11Jadi ibunuh si Jehu ma ganup na tading hun bani ginompar ni si Ahab i Jesreel, sonai homa ganup halak na pinasangapni, huan-huanni pakon malimni, sahalak pe lang tading ibahen.
12Dob ai bingkat ma ia laho hu Samaria. I tongah dalan, sanggah das ia hu Bet-Eked ianan ni parmahan,
13pajumpah ma si Jehu pakon sanina ni si Ahasya, raja ni Juda, jadi nini ma, “Ise do ham?” Nini sidea ma mambalosi, “Sanina ni si Ahasya do hanami, anjaha tuad do hanami laho marayak anak ni raja in pakon anak ni inangni.”
14Nini si Jehu ma, “Tangkap ma sidea manggoluh.” Jadi itangkap ma sidea manggoluh, lanjar ibunuh, dob ai isampakkon ma sidea hubagas parigi na i Bet-Eked, ompat puluh dua halak, anjaha sahalak pe lang dong na maluah hun bani sidea.
15Jadi dob bingkat ia hunjai, pajumpah ma ia pakon si Jonadab, anak ni si Rehab, na roh manjumpahkonsi; jadi itabi ma ia anjaha nini ma hu bani, “Bonar do uhurmu hu bangku, songon bonar ni uhurhu bamu?” Nini si Jonadab ma mambalosi, “Eak!” Nini si Jehu ma, “Anggo sonai do, bere ma tanganmin bangku!” Jadi isurdukkon ma tanganni. Itarik si Jehu ma ia hu atas, rap pakonsi hu atas gareta ai.
16Anjaha nini ma, “Rap ma hita laho, ase iidah ham ringisku halani Jahowa.” Jadi rap ma sidea laho margareta.
17Jadi dob das ia hu Samaria, ibunuh ma haganup simasima ni si Ahab i Samaria, siap tumang do sidea ibahen, romban hu bani hata ni Jahowa, na hinatahon-Ni hu bani si Elias.
Isiapkon si Jehu Malim-malim ni Baal
18Dob ai ipatumpu si Jehu ma bangsa ai, anjaha nini ma hu bani sidea, “Hurang do pambalosi ni si Ahab bani Baal, tapi bujuran do si Jehu mambalosi.
19Halani ai dilo nasiam ma hu lambungku sagala nabi ni baal, sagala na marugas bani pakon sagala malim-malim; sahalak pe lang bulih tading, ai sihol bahenonku do panggalangan bolon hu bani Baal; barang ise na so dihut, maningon marutang hosah do ia.” Tapi akal-akal ni si Jehu do ai ase ibahen sonai, ase boi siapkononni sagala sisumbah baal ai.
20Dob ai iparentahkon si Jehu ma, “Tingtingkon nasiam ma sada tumpuan na majombut bani baal!” Jadi itingtingkon sidea ma ai.
21Anjaha isuruh si Jehu ma suruhanni hu sab Israel, jadi roh ma ganup siparugas bani baal, sahalak pe lang dong na tading, na so roh hujai. Imasuki sidea ma rumah ni baal ai, gabe gok tumang ma rumah ni baal ai.
22Nini ma hu bani sijaga rumah pakeian, “Boan ma hudarat pakeian bani haganup siparugas bani baal ai!” Jadi ipadarat ma pakeian ai bani sidea.
23Jadi masuk ma si Jehu rap pakon si Jonadab, anak ni si Rehab, hu rumah ni baal ai, “Pangkei ma nasiam ase ulang adong juakjuak ni Jahowa ijon i tongah-tongah nasiam, tapi pitah sibalosi Baal hansa!”
24Jadi masuk ma ia manggalangkon galangan pakon galangan situtungon. Tapi domma iatur si Jehu hinan ualuh puluh halak i darat, anjaha domma iparentahkon, “Barang ise na palopaskon maluah hun bani sidea, na dob huondoskon ai hubagas tangan nasiam, maningon hosahni do dangdang ni hosahni ai.”
25Jadi siapkonsi ia na manggalangkon galangan situtungon ai, nini si Jehu ma hu bani bala ai pakon pambobaini, “Masuk ma nasiam anjaha bunuhi ma sidea, sahalak pe lang bulih maluah!” Jadi dob itampuli sidea haganup marhitei podang, ipanggijigkon bala pakon pambobai ai ma sidea hu darat, dob ai masuk ma sidea hu kamar parbagas ni rumah ni baal ai,
26gabe ipadarat sidea ma Ashera na ibagas rumah ni baal ai, anjaha itutung sidea ma ia.
27Iropuki sidea ma gana-gana baal ai, iropuki sidea ma rumah ni baal ai, anjaha ibahen ma ai gabe ianan ni tompoh ronsi sadari on.
28Ase sonai ma paniapkon ni si Jehu bani baal hun Israel.
29Tapi seng itundalhon si Jehu anggo dousa ni si Jerobeam, anak ni si Nebat, na mambahen Israel mardousa, ai ma lombu omas na i Betel pakon i Dan.
30Dob ai nini Jahowa ma hu bani si Jehu, “Halani dear pambahenanmu, ai ma marhitei na mandalankon na pintor bani pangidah-Ku, anjaha ibahen ho do hu bani ginompar ni si Ahab romban hu bani haganup na ibagas uhur-Hu, maningon anakmu do ronsi sundut na paompatkon hundul bani paratas ni Israel.”
31Tapi seng marsijoloman uhurni si Jehu manramotkon titah ni Jahowa, Naibata ni Israel, hun bani gok ni uhurni; seng itundalhon dousa ni si Jerobeam, na mambahen Israel mardousa.
32Bani ari ai ipungkah Jahowa ma paetekkon Israel. Italuhon si Hasael ma sidea bani ganup tanoh parbalogan ni Israel;
33hampit hapoltakan ni Bah Jordan ganup tanoh Gilead, tanoh ni halak Gad, Ruben pakon Manasse, singgan ni Aroer na i lambung ni habungan Arnon, ai ma Gilead pakon Basan.
34Barita ni si Jehu na tading ai pakon ganup na binahenni ampa haganup hagarangonni, ai lang tarsurat do ai ibagas buku barita ni Raja-raja Israel?
35Dob ai modom ma si Jehu rap pakon ompungni, gabe itanom sidea ma ia i Samaria. Jadi si Joahas, anakni ai ma bangkit raja manggantihsi.
36Ia dokah ni si Jehu manrajai Israel i Samaria dua puluh ualuh tahun do.