Dual PanelSi Ahas Raja ni Juda
1Pasapuluhpitutahunkon dob gabe raja si Peka, anak ni si Remalya, bangkit raja ma i Juda si Ahas, anak ni si Jotam.
2Marumur dua puluh tahun do si Ahas sanggah na bangkit raja ai ia, anjaha sapuluh onom tahun do dokahni manrajai i Jerusalem; seng dong ihorjahon rosuh ni Jahowa, Naibatani, songon ompungni si Daud,
3tapi sai mardalan do ia bani dalan ni raja-raja ni Israel. Ia pe itutung do anakni bahen galangan romban hu bani adat hagigian ni bangsa-bangsa, na pinabali ni Jahowa i lobei ni halak Israel.
4Ambahni ai manggalang anjaha manutung dahupa do ia bani ianan panumbahan, na i atas buntu-buntu, i atas dolog pakon i toruh ni ganup hayu na ratah.
5Ijia ma tangkog si Resin, raja ni Aram, pakon si Peka, anak ni si Remalya, raja ni Israel, laho marporang dompak Jerusalem, gabe ihubu sidea ma si Ahas, tapi seng tartaluhon sidea ia.
6Bani panorang ia ipasuang raja ni Edom ma Elat mulak hu bani Edom, anjaha ipabali halak Juda hun Elat; roh ma halak Edom hu Elat, lanjar marianan ijai ronsi sadari on.
7Tapi isuruh si Ahas ma suruhanni marayak Tiglat-Pileser, raja hun Assur, nini ma hu bani, “Jabolonmu anjaha anakmu do ahu. Tangkog ma ham, anjaha paluah ham ma ahu hun bani tangan ni Raja Aram, pakon hun bani tangan ni Raja Israel, na roh tangkog mangimbang ahu.”
8Ibuat si Ahas ma pirak pakon omas na jumpah ibagas Rumah ni Jahowa pakon ibagas kamar parartaan ni rumah ni raja ai, anjaha itongoskon ma ai bahen siluah hu bani raja ni Assur.
9Jadi ibalosi raja ni Assur ma pangindoanni ai; tangkog ma Raja Assur marporang dompak Damaskus lanjar italuhon, anjaha pangisini ai ibuangkon ma hu Kir, anjaha ibunuh do anggo si Resin.
Parubahan na Binahen ni si Ahas i Rumah Panumbahan
10Dob ai laho ma si Ahas manjumpahkon Tiglat-Pileser, raja ni Assur hu Damaskus. Jadi dob iidah sada anjapanjap i Damaskus, itongoskon Raja Ahas ma sibaran pakon usihan ni anjapanjap ai palgei-palgei hu bani Malim Uria.
11Jadi ipauli Malim Uria ma sada anjapanjap romban hu bani haganup na tinongos ni Raja Ahas hun Damaskus, sonai do ipauli Malim Uria, taram lape roh Raja Ahas hun Damaskus.
12Dob roh raja ai hun Damaskus, anjaha iidah anjapanjap ai, gabe ipadohor ma hu bani anjapanjap ai, lanjar naik ma ia hu atas.
13Dob ai itutung ma galangan situtungonni pakon galangan sipanganonni, iuseihon ma galangan siinumonni, anjaha ipispiskon ma daroh ni galangan hatarimakasihonni hu bani anjapanjap ai.
14Anjaha anjapanjap tombaga, na i lobei ni Jahowa, iosor ma ai hun lobei ni rumah ai, hun bani ianan na i holangkolang ni anjapanjap na baru ai pakon Rumah ni Jahowa, anjaha inahkon ma ai hampit utara ni anjapanjap ai.
15Dob ai iparentahkon Raja Ahas ma hu bani Malim Uria, “Maningon i atas ni anjapanjap na bolon in do tutungonmu galangan situtungon sogod pakon galangan sipanganon bodari, galangan situtungon ni ganup bangsa pangisi ni tanoh in pakon ganup galangan sipanganon ampa galangan siinumon ni sidea; anjaha maningon pispiskononmu do hu atas ni ganup daroh ni galangan situtungon pakon galangan sisayaton, tapi pasal anjapanjap tombaga ai marpingkir ope ahu.”
16Jadi ibahen Malim Uria ma ganup romban hu bani na hinatahon ni Raja Ahas.
17Isuruh Raja Ahas ma homa na manrampingkon lais-lais ni hajongjongan ni parburihan ai, anjaha iosor ma parburihan ai hun datas ni, ipatoruh ma homa bongbongan ai hun datas ni lombu tombaga ai, na i toruh ni ai, anjaha ibahen ma dasor batu hajongjonganni.
18Sonai homa surambih ari Sabat, na pinauli i rumah panumbahan pakon labah hamasukan ni raja hun darat laho hu Rumah ni Jahowa, ipaubah do ai laho mambuat uhur ni Raja Assur.
19Barita na legan ai ope pasal si Ahas pakon ganup na hinorjahonni, ai lang tarsurat do ai ibagas buku Barita ni Raja-raja Juda?
20Dob ai modom ma si Ahas rap pakon ompungni, anjaha itanom rap pakon ompungni i huta ni si Daud, jadi si Hiskia anakni ai ma bangkit raja manggantihsi.