Dual PanelSi Manasse Raja ni Juda
1Sapuluh dua tahun do umur ni si Manasse sanggah na bangkit raja ai ia, anjaha lima puluh lima tahun do ia manrajai i Jerusalem. Si Hepsiba do goran ni inangni.
2Ihorjahon do sogam ni uhur ni Jahowa, romban hu bani pambahenan hagigian ni bangsa sipajuh begu-begu na pinabali ni Jahowa hun lobei ni Israel.
3Ai iulaki raja ai do paulihon panumbahan na i atas buntu-buntu, na dob pinarseda ni si Hiskia, bapani ai; anjaha ipajongjong do anjapanjap bani baal, i bahen do sada Ashera, songon na binahen ni si Ahab, raja ni Israel, isombah do ganup bala ni langit anjaha ibalosi do ai.
4Ipajongjong do anjapanjap sisonai ai ibagas rumah ni Jahowa; pasal ai domma ihatahon Jahowa hinan, ʻI Jerusalem do pajonamon-Ku goran-Ku.ʼ
5Ipajongjong do anjapanjap bani ganup bala ni langit bani alaman ni Rumah ni Jahowa na dua ai.
6Itutung do anakni bahen galangan, ihorjahon do hadatuon pakon partondungon, anjaha ipiara do halak paniaran pakon sipanjahai. Buei do sogam ni uhur ni Jahowa ihorjahon, laho mamuhoi ringis-Ni.
7Anjaha ipauli do gana-gana Ashera, anjaha inahkon ma ai i Rumah ni Jahowa; pasal ai domma ihatahon Jahowa hinan hu bani si Daud pakon hu bani si Salomo anakni ai, ʻPajonamon-Ku do goran-Ku sadokah ni dokahni ibagas rumah on pakon i Jerusalem na dob hupilih in hun bani ganup marga ni Israel;
8anjaha seng be paosoron-Ku nahei ni Israel hun tanoh na dob Hulayak-layakkon hu bani ompung ni sidea, asal ma ihaporluhon mangkorjahon romban hu bani na dob Hutonahkon hu bani sidea, pakon romban hu bani haganup titah na dob tinonahkon ni juakjuak-Ku si Musa hu bani sidea.ʼ
9Tapi seng itangihon sidea hata ai, ai kahou do sidea ibahen si Manasse, gabe bueinan do ihorjahon sidea hajahaton ase bangsa na dob niraseihon ni Jahowa ilobei ni halak Israel.
10Ai do ase ilumbahon Jahowa marhitei nabi-nabi, juakjuak-Ni ai, nini,
11“Halani ihorjahon si Manasse, raja ni Juda, sagala hagigian on, anjaha ihorjahon do hajahaton bueinan hun bani ganup halak Amori na parlobei hun bani, anjaha ibahen homa Juda mardousa marhitei gana-ganani ai,
12halani ai sonon do hata ni Jahowa, Naibata ni Israel, ʻTonggor ma, parohon-Ku ma hamagouan hu Jerusalem pakon hu Juda, pala marnginging pinggol ni ganup halak na mambogei ai haduasi.
13Anjaha pagistangon-Ku do hu atas ni Jerusalem tali sibar-sibar na hu Samaria hinan pakon batu sibar-sibar na hu bani rumah ni si Ahab, anjaha apusan-Ku do Jerusalem songon pangapus ni halak bani pinggan, dob iapus gabe ipalangkob.
14Anjaha buangkonon-Ku do simasima ni parbagianan-Ku, anjaha ondoskonon-Ku do sidea hubagas tangan ni munsuh ni sidea, gabe taban pakon sirampason ni ganup munsuh ni sidea,
15halani na binahen ni sidea ai sogam ni uhur-Hu, anjaha pinuhoanni ai ringis-Ku, singgan ni parluar ni ompung ni sidea hun Masir ronsi sadari on.
16Ambahni ai buei do daroh ni halak na so marpipot iduruskon si Manasse, pala gok Jerusalem ibahen hun ujung na sada hu ujung na sada nari, sobali dousa ni na mambahen Juda mardousa, gabe ihorjahon sidea sogam ni uhur ni Jahowa.ʼ”
17Barita na legan ai pasal pambahenan ni si Manasse pakon ganup na hinorjahonni, ai lang tarsurat do ai ibagas buku Barita ni Raja-raja Juda?
18Dob ai modom ma si Manasse rap pakon ompungni, gabe itanom ibagas pohon ni rumah ni ai, ibagas pohon ni si Usa; gabe si Amon, anakni ai ma gabe raja manggattihsi.
Si Amon Raja ni Juda
19Dua puluh dua tahun do umur ni si Amon sanggah na bangkit ai ia gabe raja, anjaha dua tahun do ia manrajai i Jerusalem. Si Mesulemet do goran ni inangni, boru ni si Harus, hun Jotba.
20Ihorjahon do sogam ni uhur ni Jahowa, songon na binahen ni si Manasse, bapani ai.
21Iirikkon do ganup dalan na nidalanan ni bapani, ibalosi do naibata na legan na binalosan ni bapani, marsombah do ia hujai;
22itadingkon do Jahowa, Naibata ni ompungni, anjaha seng mardalan ia ibagas dalan ni Jahowa.
23Jadi mambahen partahi-tahian ma juakjuak ni si Amon dompaksi, gabe ibunuh sidea ma raja ai ibagas rumahni.
24Tapi ibunuh bangsa parnagori in ma haganup halak na martahi-tahi ai dompak Raja Amon. Jadi ipabangkit bangsa parnagori in ma si Josia, anakni ai gabe raja manggantihsi.
25Barita na legan ai ope pasal si Amon ampa ganup nahinorjahonni, ai lang tarsurat do ai ibagas buku Barita ni Raja-raja Juda?
26Jadi itanom ma ia ibagas tanomanni, ibagas pohon ni si Usa, anjaha si Josia, anakni ai ma bangkit raja manggantihsi.