Dual PanelUjung ni Goluh ni si Joyakim
1Bani panorang ai tangkog ma si Nebukadnesar, raja ni Babel, jadi mangaku tunduk ma si Joyakim bani tolu tahun dokahni; dob ai marbalik ma ia anjaha mangalo dompaksi.
2Dob ai isuruh Jahowa ma dompaksi garombolan ni halak Kasdim pakon garombolan ni halak Aram pakon garombolan ni halak Moab pakon garombolan ni halak Ammon, isuruh sidea mangimbang Juda laho parsedahon ai, romban hu bani hata ni Jahowa, na hinatahon-Ni marhitei nabi, juakjuak-Ni ai.
3Masa do sonai hu bani halak Juda halani ringis ni Jahowa, laho padaohkon sidea hun lobei ni bohi-Ni, halani dousa ni si Manasse, romban hu bani ganup na hinorjahonni ai.
4Sonai homa halani daroh na so marpipot na niduruskonni ai; ai igoki do Jerusalem bani daroh ni halak na so marpipot. Seng ra be Jahowa manasap ai.
5Barita na legan ai ope pasal si Joyakim ampa haganup na hinorjahonni, ai lang tarsurat do ai ibagas buku Barita ni Raja-raja Juda?
6Dob ai modom ma si Joyakim rap pakon ompungni, anjaha si Joyakin, anakni ai ma bangkit raja manggantihsi.
7Seng be luar raja ni Masir hun tanohni, ai domma ipatunduk raja ni Babel ganup tanoh na masuk hu bani raja ni Masir hinan, singgan ni Bah Masir das hu Bah Eufrat.
Si Joyakin Raja ni Juda
8Marumur sapuluh ualuh tahun do si Joyakin sanggah bangkit raja ia, anjaha tolu bulan do dokahni manrajai i Jerusalem; si Nehusta do goran ni inangni, boru ni si Elnatan, hun Jerusalem.
9Ihorjahon do sogam ni uhur ni Jahowa, usih songon na binahen ni bapani.
10Bani panorang ai tangkog ma bala ni si Nebukadnesar, raja ni Babel dompak Jerusalem, lanjar ihubu ma huta ai.
11Roh do si Nebukadnesar sandiri, raja ni Babel, hu huta ai, sanggah ihubu balani huta ai;
12gabe luar ma si Joyakin, raja ni Juda marayak raja ni Babel rap pakon inangni pakon juakjuakni pakon pambobai ni balani ampa siramotkon rumahni; lanjar iboban raja hun Babel ma ia paualuhtahunkon dob bangkit raja ia.
13Iboan do homa ganup arta na i rumah ni raja ai; anjaha itanggali do omas ai hun bani haganup parugas na pinauli ni si Salomo, raja ni Israel, ibagas Rumah ni Jahowa, songon na dob nilumbahon ni Jahowa hinan.
14Anjaha iboan ma hu habuangan haganup pangisi ni Jerusalem, haganup kopala-kopala, haganup halak parkuasa, sapuluh ribu halak na tarbuang, haganup tuhang hayu pakon tuhang bosi; sahalak pe lang na tading sobali halak sisombuhan i tanoh in.
15Jadi ibuangkon ma si Joyakin hu Babel rap pakon inang ni raja ai, parinangon ni raja ai, haganup siramotkon rumahni ampa halak na markuasa i nagori in, ibuangkon raja ai ma sidea hu habuangan, hun Jerusalem hu Babel.
16Haganup halak siimbang munsuh, pitu ribu halak bueini sonai homa tuhang hayu pakon tuhang bosi, saribu halak bueini, ampa haganup puanglima na gogoh, iboan raja ni Babel ma haganupan ai laho mambuangkon ai hu Babel.
17Dob ai ipabangkit raja ni Babel ma si Matanya, bapanggi ni si Joyakin ai, gabe raja manggantihsi, anjaha ipaubah ma goranni gabe si Sedekia.
Si Sedekia Raja ni Juda; Parseda ni Harajaon ai
18Marumur dua puluh sada tahun do si Sedekia sanggah na bangkit raja ai ia, anjaha sapuluh sada tahun do dokahni ia marrajai i Jerusalem; si Hamutal do goran ni inangni, boru ni si Jeremia, hun Libna.
19Ihorjahon do sogam ni uhur ni Jahowa, usih songon na binahen ni si Joyakin.
20Ai halani ringis ni Jahowa do, ase masa sonai hu Jerusalem pakon hu Juda, laho mangambukkon sidea hun lobei ni bohini. Dob ai marbalik ma si Sedekia mangimbang raja ni Babel.