Dual PanelParpadanan ni si Asa pakon Halak Aram Mangimbang Israel; Parmatei ni si Asa
1Patolupuluhonom-tahunkon dob manrajai si Asa, tangkog ma si Baesa, raja ni Israel mandorab Juda, anjaha ipatoguh ma Rama, ase ulang boi atap ise hujai-hujon marayak si Asa, raja ni Juda.
2Dob ai ibuat si Asa ma humbani parartaan na i Rumah ni Jahowa pakon na i rumah ni raja ai omas pakon pirak, anjaha itongoshon ma ai hubani si Benhadad, raja ni Aram, na marianan i Damaskus, nini ma,
3“Domma adong hinan i tongah-tongahta parpadanan, sonai homa i tongah-tongah ni bapanta; tonggor ma, na manongos pirak pakon omas do ahu bamu; ai pe, putushon ham ma padanmu pakon si Baesa, raja hun Israel, ase surut ia humbangku.”
4Jadi itangihon si Benhadad ma hata ni raja Asa ai, anjaha isuruh ma pambobai ni balani mandorab huta-huta ni Israel, gabe itaban sidea ma huta Iyon, Dan, Abelmaim pakon ganup huta parbohalan na i Naptali.
5Dob ibogei si Baesa ai, maronti ma ia patoguhkon Rama, ipasaran ma horjani ai.
6Dob ai iharah raja Asa ma ganup Juda, anjaha ibuat sidea ma ganup batu pakon parhayu ni huta Rama, na pinakei ni si Baesa patoguh Rama, anjaha ipakei raja ai ma ai pauli huta Geba pakon Mispa.
7Ijia ma roh Nabi Hanani marayak si Asa, raja ni Juda, anjaha nini ma hu bani, “Halani marpangunsandeian ham hubani raja Aram, seng marpangunsandeian ham hubani Jahowa, Naibatamu, maluah ma bala ni raja Aram hun tanganmu.
8Ai lang buei tumang do bala ni halak Etiopia pakon halak Libia na ijia marhasoman buei tumang gareta porang pakon bala siparhuda? Tapi halani na marpangunsandeian ham bani Jahowa, iondoskon Jahowa do sidea hubagas tanganmu.
9Ai manatap manonggor do mata ni Jahowa hu sab tanoh on, laho mambere gogoh hubani halak paruhur na marsijoloman hu Bani. Halani ai, horja haotoon do na binahenmu on, ai hunjon hujanan masa ma hamunsuhon tong dompak ham.”
10Jadi manringis ma si Asa bani halak na marpanonggoran ai, ibayangkon ma ia ibagas tutupan, ai manggila do ia bani halani pahara ai; ambahni ai iarsik si Asa do piga-piga halak ijia humbani bangsa ai.
11Tonggor ma, barita ni si Asa humbani mungkahni das hubani ujungni, tarsurat do ai ibagas Buku ni Raja-raja Juda pakon Israel.
12Patolupuluhsiah-tahunkon dob marrajai ia boritan ma si Asa bani naheini anjaha parah tumang do naboritni ai; age sanggah naboritan ai, seng ipindahi uhurni Jahowa, tapi sipanambari do.
13Dob ai modom ma si Asa rap pakon ompungni; paompatpuluhsada-tahunkon dob manrajai ia, matei ma ia.
14Itanom ma ia ibagas tanoman na pinahurakkonni bani sandiri i huta ni si Daud. Itibalhon ma ia bani apeini, na dob nigokan marhitei rium-riuman na marbagei-bagei, na pinasirsir ni tukang pulung; anjaha ipagara sidea do homa apuy bolon laho pasangapkonsi.