Dual PanelParpadanan ni si Josafat pakon si Ahab
1Jadi dob bayak anjaha sangap si Josafat, ipungkah ma martondong hubani si Ahab.
2Dob piga-piga tahun tuad ma ia hu Samaria hubani si Ahab. Dob ai ihatahon si Ahab ma sayaton bani raja ai pakon bani hasomanni buei biribiri pakon lombu, dob ai iojur ma ia tangkog mangimbang Ramot-Gilead.
3Nini si Ahab, raja ni Israel ai ma bani si Josafat, raja ni Juda, “Ra do ham tangkog rap pakon ahu hu Ramot-Gilead?” Nini ma mambalosi, “Ia sonin ham, sonai do ahu, ai sonin bangsamu sonai do homa bangsangku. Dihut pe ahu rap pakon ham bingkat hu parmunsuhan.”
4Ambahni ai nini si Josafat do dompak raja ni Israel, “Mahua ma sungkun hita lobei hata ni Jahowa.”
5Dob ai ipatumpu raja ni Israel ma nabi-nabi ompat ratus halak, anjaha isungkun ma sidea, “Bulih do ahu bingkat marporang dompak Ramot-Gilead, barang sabonar na so bulih do?” Nini sidea ma, “Bingkat ma, ondoskonon ni Naibata ma huta ai hubagas tangan ni raja in.”
6Tapi nini si Josafat ma, “Ai seng adong be ijon age sada nabi ni Jahowa, ase ia sungkun hita?”
7Nini raja ni Israel ma dompak si Josafat, “Adong ope ijon sada halak nari, marhiteihonsi tarsungkun do Jahowa, tapi sogam do uhurhu mangidahsi, ai seng dong ongga na madear panjahaionni bangku, pitah hamagouan do tong, ai ma si Mika, anak ni si Jimla.” Nini si Josafat ma, “Ulang ma sonai hata ni raja in.”
8Dob ai idilo raja ai ma sada halak siramotkon rumahni, nini ma, “Alopi ma podas hujon si Mika, anak ni si Jimla.”
9Sanggah na hundul ai raja ni Israel pakon si Josafat, raja ni Juda, bani pardogeian, bani labah ni horbangan ni Samaria, ganup hundul bani paratasni bei marpakeian harajaon, anjaha ganupan nabi ai manjahai i lobei ni sidea,
10ipadear si Sedekia, anak ni si Kenana ma bani sada tanduk bosi, anjaha nini ma, “Sonon do hata ni Jahowa: Marhitei on ma duguonmu halak Aram, ronsi siap sidea bahenonmu.”
11Ganupan nabi ai sonai do panjahaion ni sidea, nini sidea do, “Tangkog ma ham hu Ramot-Gilead, sai na monang do ham; sai na ondoskonon ni Jahowa do ai hubagas tangan ni raja in.”
12Tapi nini suruhan, na sinuruh mangalopi si Mika ai ma hu bani, “Tonggor ma, sahata do nabi-nabi ai mangkatahon na madear hubani raja ai, on pe hatahon ham ma songon hata ni sidea ai ganup, anjaha ambilankon ham ma na madear.”
13Tapi nini si Mika ma, “Songon sintongni manggoluh Jahowa, barang aha na hinatahon ni Naibatangku, ai do hatahononku.”
14Jadi dob das ia hu lobei ni raja ai, nini raja ai ma hubani, “Atene Mika, bulih do hanami tangkog hu Ramot-Gilead barang sabonar na so bulih do?” Nini ma mambalosi, “Tangkog ma nasiam, sai na monang do nasiam! Sai na ondos do sidea hubagas tangan nasiam.”
15Tapi nini raja ai ma hu bani, “Maningon piga hali on do ham pabijaonku, paboa na so hatahononmu hubangku sobali hasintongan marhitei goran ni Jahowa?”
16Dob ai nini si Mika ma, “Domma hutatap haganup Israel, mambur merap i atas ni dolog, songon biribiri na so marparmahan. Anjaha nini Jahowa do, ʻSeng martuan be ganupan in; mulak bei ma ganup ibagas damei!ʼ”
17Dob ai nini raja ni Israel ma dompak si Josafat, “Ai lang domma hupatugah hinan bamu, na so tumaram madear panjahaionni hubangku, tapi pitah hamagouan do?”
18Nini si Mika ma, “Seng sonai! Tangihon ma hata ni Jahowa. Huidah do Jahowa hundul i atas paratas-Ni, anjaha ganup bala ni nagori atas jongjong i siamun-Ni pakon i sambilou-Ni.
19Nini Jahowa ma, ʻIse ma na ra mangojur-ojur si Ahab, raja ni Israel, ase tangkog ia hu Ramot-Gilead, ase matei ia ijai? Dob ai marsihatahon hatani bei ma sidea.ʼ
20Dob ai luar ma sada tonduy anjaha jongjong i lobei ni Jahowa, nini ma, ʻAhu ma na mangojur-ojursi.ʼ Nini Jahowa ma hubani, ʻMarhitei aha?ʼ
21Nini ma mambalosi, ʻLuar ma ahu gabe tonduy sipaoto-oto ibagas pamangan ni ganup nabini.ʼ Dob ai nini Jahowa ma, ʻHo ma na mangojursi, anjaha monang ma ho, luar ma ho anjaha bahen ma sonai!ʼ
22On pe, tonggor ma, domma inahkon Jahowa tonduy sipaoto-oto ibagas pamangan ni nabi-nabimu on, ai domma ilumbahon Jahowa hinan roh hamagouan on bamu.”
23Dob ai roh ma hun dohor si Sedekia, anak ni si Kenana, itompas ma huyum ni si Mika, anjaha nini ma, “Hun dalan ja minsah Tonduy ni Jahowa humbangku, laho marsahap hubam?”
24Nini si Mika ma mabalosi, “Tonggor ma, sampang ope idahonmu bani ari ai, sanggah na laho ho hu kamar parbagas laho manrogop.”
25Dob ai nini raja ni Israel ma, “Tangkap nasiam ma si Mika, anjaha boan nasiam ma ia mulak hubani si Amon, walikota ai, pakon hubani si Joas, anak ni raja in,
26anjaha hatahon ma, ʻSonon do hata ni raja in: Nahkon nasiam ma ia hu tutupan, anjaha bere nasiam ma bani ruti pakon bah otik-otik, paima mulak ahu mardamei-damei.ʼ”
27Nini si Mika ma, “Anggo marsonang-sonang do ham mulak, tongon ma, seng Jahowa na marsahap marhitei ahu. Tangar ma, nasiam bangsa-bangsa haganup.”
28Dob ai tangkog ma raja ni Israel pakon si Josafat, raja ni Juda hu Ramot-Gilead.
29Jadi nini raja ni Israel ma dompak si Josafat, “Paubah rupa ma ahu laho hu parporangan, tapi anggo ham pakeianmu hinan ma pakei ham.” Ase paubah rupa ma raja ni Israel, jadi laho ma sidea hu parporangan.
30Tapi domma iparentahkon raja ni Aram hinan hubani kopala ni gareta porangni, “Seng bulih dorabon nasiam atap ise, na etek barang na banggal, pitah raja ni Israel do.”
31Jadi dob iidah kopala ni gareta porang ai si Josafat, nini uhur ni sidea ma, “Seng tarbahen lang ai do raja ni Israel.” Jadi iinggoti sidea ma ia laho mandorabsi. Mandoruhi ma si Josafat, iurupi Jahowa ma ia, anjaha ipaundur Naibata ma sidea humbani.
32Dob iidah kopala ni gareta porang ai, sedo hape ia raja ni Israel, surut ma sidea humbani.
33Tapi adong ma sada halak na manembakkon panahni songon gijig-gijig borngin, gabe ihonai ma raja ni Israel bani pardomuan ni baju partahanan ai. Dob ai nini ma dompak sais ni gareta ai, “Husor, boan ma ahu hun parporangan on, ai domma ugahan ahu.”
34Halani na lambin garani do porang ai bani na sadari ai, lanjar jongjong do raja ai, itungkol ibagas garetani padompak-dompak pakon halak Aram layur ronsi bod ari; tapi sanggah parsundut ni mataniari matei ma ia.