Dual PanelParugas-parugas i Rumah Panumbahan
1Ipauli do homa sada anjapanjap tombaga, dua puluh asta ganjangni, dua puluh asta bolagni anjaha sapuluh asta gijangni.
2Dob ai ipauli ma laut tuangan ai; gemong do ai, sapuluh asta hun bibir na sada hu na sada nari, gijangni lima asta, anjaha tolu puluh asta do ganjang ni panlilitini inggot.
3Anjaha i toruh ni bibirni ai adong do gambaran ni lombu, tolu puluh asta ganjangni, inggot laut ai; dua baris do lombu ai, rap ituang pakon laut tuangan ai.
4Jongjong do ai i atas ni sapuluh dua lombu, tolu mandompakkon utara, tolu mandompakkon hasundutan, tolu mandompakkon dangsina, tolu mandompakkon hapoltakan; i atas ni lombu ai do inahkon laut tuangan ai, anjaha dompak bagas do ihur ni lombu ai.
5Ia hapalni santopak do; bibirni ai songon bibir ni panginuman do, songon bunga ni silundat, siat do ijai tolu ribu bat.
6Ipauli do homa sapuluh tong parburihan, anjaha inahkon ma ai lima hampit siamun, lima hampit sambilou, ijai ma iburihi sidea sipakeion bani galangan situtungon; ia laut ai bahen parburihan ni malim do.
7Ipauli do homa sapuluh parpalitaan omas, mardomu hubani na dob niaturhon hinan, anjaha inahkon ma ai hubagas rumah panumbahan ai, lima hampit siamun anjaha lima hampit sambilou.
8Ipauli do homa sapuluh meja, anjaha inahkon ma ai hubagas rumah panumbahan ai, lima hampit siamun anjaha lima hampit sambilou. Ipauli do homa saratus mangkuk pangurasan omas.
9Ipadear do homa alaman bani malim ampa alaman bolag, sonai homa labah laho hu alaman ai ipauli do, anjaha ilampis ma ai bani tombaga.
10Ia laut ai inahkon do ai hampit suhi-suhi paranggoni ni rumah ai.
11Ipauli si Huram do homa hudon, suyuk-suyuk ampa mangkuk pangurasan. Jadi salosei ma ibahen si Huram horja silahoanni ai bani Raja Salomo pasal Rumah ni Naibata:
12Na dua tiang ai ampa na dua ulu na i atas ni tiang na dua ai; na dua jala-jala ai, na manrungkub na dua ulu na i atas ni tiang ai;
13siompat ratus buah ni dalima, na bani jala-jala na dua ai, dua baris buah dalima bani sada jala-jala, bahen panrungkub ni ulu na dua i atas ni tiang na dua ai.
14Ipauli do homa panatang ampa tong na i atas ni ai,
15pakon laut na sada ai, ampa lombu sisapuluh dua na i toruh ni ai.
16Sonai homa hudon, suyuk-suyuk pakon garpu ampa haganup parugas na masuk hujai ipauli si Huram-Abi humbani tombaga bani Raja Salomo, ai ma haporluan bani Rumah ni Jahowa.
17Bani pamah ni Jordan do isuruh raja ai tuangon ai bani tuangan na humbani tanoh halampung, i holang-kolang ni Sukot pakon Sartan.
18Buei tumang do parugas na pinauli ni si Salomo ai, pala seng tartimbang borat ni tombaga ai.
19Ihatahon si Salomo do homa paulihon ganup parugas na i Rumah ni Naibata; anjapanjap omas, meja ni ruti sigalangkonon ai,
20parpalitaan ai ampa palitani humbani omas pitah, sipagaraon i lobei ni kamar na pansing sahalian ai, songon na dob tinonahkon hinan,
21pakon bungani, palitani ampa rasipni humbani omas pitah;
22ambah ni ai pisou, mangkuk pangurason, pinggan pardahupaan, ampa balanga parapuyan humbani omas pitah; sonai homa engsel ni rumah ai, na bani labah parbagas laho hu kamar na pansing ai pakon na bani labah ni kamar na pansing ai humbani omas do.