Dual PanelParlahou Hasamboron ni Jolma bani Panorang Parpudi
1Tapi botoh ma, na roh ma ari hasunsahan bani panorang parpudi.
2Ai mangkaholongi dirini ma jolma ijai, paruhur duit, parhata toal, paruhur gijang, panrisai, seng pambalosi bani na matorasni, na so mambotoh martarima kasih, parhabutakon,
3seng parholong, na so ra mardear, na so ra mardamei, sipanukas-nukasi, seng ibotoh mangorom, parringis-ringis, magigi bani na madear,
4sipartahi-tahi, na hampung maruhur, na pajuntul-juntulhon diri, na holongan bani hisap ni daging ase bani Naibata.
5Songon-songon na daulat do sidea, tapi iparnalang sidea do gogoh ni ai. Ai pe simbili ma sisonai ai.
6Halak sisonai do na ra marponop-ponop mammasuki rumah ni halak, mandormai naboru, na dob boratan ibahen dousa, na niarsik-arsik ni bagei ni hisap-hisap,
7na tongtong marlajar, tapi lanjar seng boi mananda hasintongan in.
8Songon si Jannes ampa si Jamberes panlawan bani si Musa, sonai do homa sidea panlawan bani hasintongan in, ai ma halak, na dob seda pingkiranni anjaha na talu ibagas haporsayaon.
9Tapi seng anjai tarpasaud sidea ai torus, ai idahon ni ganup halak do haotoon ni sidea ai, songon na bani sidea halak ondi.
Marsijoloman bani Hata ni Naibata
10Tapi iihutkon ham do ahu bani podah, parlahou, tujuan, haporsayaon lumbang ni uhur, holong ampa hasabaron,
11bani parburuon, sitaronon, na mangonai bangku i Antiokia, Ikonium ampa Listra. Ai ma pangayak-ayakon na hutaron, tapi ipaluah Tuhan in do ahu humbani haganupan in,
12tapi sagala na sihol daulat marparlahou ibagas Kristus Jesus, hona parburu do.
13Ia halak parjahat ampa sipangoto-otoi sai na lambin jahat do, na mangoto-otoi do sidea anjaha hona oto-otoan.
14Tapi anggo ham, totap ma ham bani na dob ginuruhonmu ampa na hinaporsayaanmu, ai ibotoh ham do ise na mangajarhonsi bamu,
15anjaha ibotoh ham do humbani haetek-etekonmu nari, Surat Na Pansing in do, na margogoh papentarhon ham, ase marulih ham bani haluahon marhitei haporsayaon bani Kristus Jesus.
16Ai sagala Surat in sinahapkon ni Naibata do, anjaha marguna mamodahi, maminsang, pauli-ulihon ampa manogu-nogu hu hapintoron,
17ase gokan dear siminik ni Naibata, mangasup bani sagala horja na madear.