Alkitab Mobile SABDA
[VER] : [SIMALUNGUN]     [PL]  [PB] 
 <<  Amos 5 >> 

Tangis-tangis Pasal Halak Israel

1“Tangar hanima ma hata on, na Hutangiskon pasal hanima, ale ginompar ni Israel.

2Domma dabuh boru Israel, seng tarjongjongkonsi be; jorgong tibal ia i tanohni, seng dong na pajongjongkonsi.

3Ai sonon do hata ni Tuhan Jahowa, ʻHuta na pabingkatkon saribu, tading hunjai saratus, na pabingkatkon saratus, tading hunjai sapuluh bani ginompar ni Israel.ʼ”

Dalan hu Hagoluhan

4Ai sonon do hata ni Jahowa bani ginompar ni Israel, “Pindahi Ahu, ase manggoluh hanima!

5Tapi ulang ma pindahi Betel, anjaha ulang ma laho hu Gilgal barang mandipar hanima hu Berseba; ai maningon buangkononkon do Gilgal, anjaha gabe na lang do Betel.

6Pindahi nasiam ma Jahowa, ase manggoluh nasiam, ase ulang idorab rumah ni si Josep marhasoman apuy, bois ipangan, anjaha sahalak pe lang adong na mangintopi i Betel.

7E nasiam na pagolingkon uhum gabe pogu, anjaha na mangambukkon hapintoron hu tanoh!

8Ia, sijadihon bintang pariama ampa bintang sidongdong, na paubahkon na lotir gabe sogod ni ari, na pagolapkon ari gabe borngin, na mandilo bah ni laut laho manguseihon ai hu atas tanoh, Jahowa do goran-Ni.

9Ia do na parohkon hasedaon bani halak na gogoh, gabe sogop hasiapon bani benteng.”

Pinsang-pinsang Pasal Hajungkaton ni Israel

10Ihasogamkon sidea do sidalankon uhum i horbangan, anjaha magigi sidea mangidah halak sihatahon na sintong.

11Halani ai, ibahen na idogei-dogei hanima halak na musil, anjaha iporoh hanima humbani sidea sibere-bere gandum, age pe ipauli hanima rumah humbani batu na binarbar seng anjai ianannima ai; sonai homa, age pe isuani hanima pohon anggur na dear-dear, seng inumonnima anggurni.

12Ai Hubotoh do buei ni panlanggaronnima, ampa sonaha banggal ni dousanima manosak halak parpintor, manjalo sisip, anjaha mangodohkon halak na musil i paruhuman.

13Halani ai sip ma halak paruhur bani panorang on; ai panorang na jahat do on.

Ojur-ojur hu Hamubahon ni Uhur

14Pindahi nasiam ma na madear, ulang ma na jahat, ase manggoluh nasiam; ase tongon ma Jahowa, Naibata Zebaot hasoman nasiam, songon na hinatahon nasiam.

15Hagigihon nasiam ma na jahat, haholongi nasiam ma na madear, anjaha pajongjong nasiam ma uhum i horbangan, andohar marpangulaki uhur ni Jahowa, Naibata Zebaot mangidah simasima ni si Josep.

Lumba-lumba Pasal Ari ni Jahowa

16Halani ai sonon do hata ni Jahowa, Naibata Zebaot, Tuhan In, “Bani haganup alaman masa tangis-tangis; anjaha bani haganup dalan hatahonon ni sidea, ʻAih, aih!ʼ Diloon ni sidea do parjuma-juma laho manangisi, ampa na pandei tangis laho manjojori.

17Anjaha bani haganup pohon anggur masa doruh-doruh, anggo montas Ahu hun tongah-tongahnima,” nini Jahowa!

18“Bursik ma hanima na mangkasiholi ari ni Jahowa! Ai aha do ari ai bannima? Hagolapan do ai, seng haliharon.

19Songon sada halak na bansah humbani singa, hape roh gipul manjumpahkonsi; barang masuk hu rumah anjaha itungkolhon tanganni bani dingding, hape roh ulog mamagutsi.

20Ai halotiron do tongon ari ni Jahowa, sedo haliharon, hagolapon do, seng dong haliharon ibagas.”

Gigi ni Uhur ni Naibata Mangidah Ugama Pardarat Tumang

21“Sogam anjaha magigi do uhur-Hu mangidah ari rayanima, anjaha seng iharosuhkon uhur-Hu tumpuannima.

22Age pe igalangkon hanima Bangku galangan situtungon ampa galangan sipanganon, seng marosuh Ahu bani ai, anjaha galangan pardearan humbani pinahan na pinamombur pe, seng ra Ahu mangkawahkon ai.

23Padaoh hun Bangku hageoron ni dodingnima, anjaha logu ni husapinima pe seng marosuh Ahu manangar ai.

24Tapi mabaor ma bahen hanima uhum songon bah, anjaha hapintoron songon bah na totap marbanggal.

25Ai adong do iboan hanima galangan sisayaton ampa sibere-bere Bangku i halimisan sadokah siompat puluh tahun ai, ale ginompar ni Israel?

26Halani ai usungonnima ma Sakut, rajanima ai, ampa Kiwun, bintang ni naibatanima ai, gana-gananima, na binahennima bannima.

27Jadi toguon-Ku ma hanima tarbuang, daoh hu dipar ni Damaskus,” nini Jahowa, na margoran Naibata Zebaot.


  Share Facebook  |  Share Twitter

 <<  Amos 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran