Alkitab Mobile SABDA
[VER] : [SIMALUNGUN]     [PL]  [PB] 
 <<  Amsal 1 >> 

1On do podah ni si Salomo, anak ni si Daud, raja ni Israel,

2ase ibotoh halak hapentaran pakon pangajaran, ase iarusi hata hapantason,

3ase tarjalosi pangajaran na madear, hapintoron, uhum pakon habonaron,

4laho mambere hapantason bani halak sibulus uhur, habotohon pakon panimbangion bani anak garama.

5Halak na pentar pe itangihon ma ai, ase tambah habotohon bani, anjaha halak na maruhur dapotan pangajarion,

6laho mangartihon podah pakon limbaga, hata ni halak na pentar pakon hutinta ni sidea.

Bona ni Hapentaran

7Biar mangidah Jahowa do parmulaan ni habotohon; halak na bodoh teos do uhurni bani hapentaran pakon pangajaran.

8Tangihon ma, ale anakku, pangajarion ni bapamu, ulang ma buangkon podah ni inangmu.

9Ai rudang na majenges do ai bani ulumu, anjaha sinongkok bani borgokmu.

Lumba-lumba dompak na Pakahouhon

10Ale anakku, anggo iajar-ajari pardousa ho, ulang ma tangihon.

11Porini ihatahon sidea, “Eta, irikkon ma hanami monggop laho manduruskon daroh, gompangi hita ma halak na so marpipot, age seng dong halani.

12Bolur hita ma sidea songon pambahen ni nagori toruh, manggoluh anjaha hibul, songon halak na dob tuad hu tanoman.

13Bagei ma arta na maharga dapot hita holi, boi ma igoki hita jabunta bani barang rampasan.

14Dihut do ho marbagian rap pakon hanami, sisada parduitan do hita haganup.”

15Ale anakku, ulang ma ho ra sadalanan pakon sidea, padaoh ma naheimu humbani dalan ni sidea;

16ai dompak hasamboron do marlintun nahei ni sidea, tarolos do sidea manduruskon daroh.

17Ai soya do itaon puhot i lobei ni mata ni manuk-manuk,

18anjaha sidea ai, daroh ni sidea sandiri do nionggopanni, anjaha hosahni sandiri do ginompanganni.

19Sonai do masa bani halak na hisapan bani pansarian, hosahni sandiri do hona buat.

Dilo-dilo Hapentaran ai

20Dilo-dilo do hapentaran ai i alaman, ipamaling do sorani i tiga;

21bani ianan na ramei taur-taur do Ia, anjaha bani horbangan ni huta ai iluarhon hatani.

22Piga dokah nari do, ale halak na oto, holong uhurnima bani haotoon? Piga dokah nari do, ale halak siparrehei, marosuh hanima manrehei, anjaha halak na oto magigi bani habotohon?

23Dompakkon hanima ma pangajaranku, tonggor ma, useihononku do Tonduyhu, anjaha pabotohkononku do hatangku bennima.

24Halani dilo-dilo ahu, tapi seng ra hanima manangihon, husurdukkon tanganku, tapi sahalak pe lang na parduli,

25itulak hanima do tene haganup podahku, anjaha seng pot hanima bani pangajarionku,

26halani ai partatawaonku do hanima bani hamagouannima, anjaha mandoruni bani pangonai ni songgot-songgot bennima,

27bani na mangonai bennima songgot-songgot songon haba-haba, bani na roh bennima hasedaon songon halisungsung, bani na sogop bennima hasosakan ampa hagobiron.

28Jadi dilo-dilo ma sidea bangku, tapi seng hubalosi, pindah-pindah sidea bangku, tapi seng jumpah sidea ahu.

29Halani magigi sidea bani habotohon, anjaha seng ipilih biar bani Jahowa,

30seng pot sidea bani podahku, anjaha itulak ganup pangajarionku,

31halani ai, maningon panganon ni sidea do buah ni parlahouni, anjaha bosur sidea bani ranggianni.

32Ai panundalion ni halak na oto do gabe hamatean bani, anjaha halanseion ni halak na lontong parsedahon dirini.

33Tapi atap ise na manangihon ahu, marsonang-sonang do ia marianan, seng anjai gobir ia dompak songgot-songgot ni hamagouan.


  Share Facebook  |  Share Twitter

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.
Studi Alkitab dengan AI: Alkitab GPT.

 <<  Amsal 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel