Alkitab Mobile SABDA
[VER] : [SIMALUNGUN]     [PL]  [PB] 
 <<  Amsal 19 >> 

(Sambatni)

1Dearan do halak na masombuh, na pitah marparlahou, humbani halak parbibir ladung, age pe bayak ia.

2Anggo seng marhasoman pamingkirion, seng marguna haringgason, anjaha halak na mangolos-olos mandalankon horjani, maningon lepak do.

3Haotoon ni jolma do parseda dalanni, hape dompak Jahowa marungut-ungut uhurni.

4Habayakon do pabuei huan-kuan, tapi halak na masombuh, gari diha-dihani manadingkonsi.

5Saksi palsu seng tarbahen lang hona uhum, anjaha sisahapkon ladung seng anjai maluah.

6Buei do halak na mamuji-muji na sangap, anjaha ganup do halak gabe huan ni halak siparlayak,

7Halak na masombuh, saninani pe haganup sogam do uhurni bani, samintolah ma diha-dihani lang padaoh diri hun bani?

8Halak na jumpahan uhur hapantason, holong do uhurni bani goluhni, halak siramotkon pangarusion dapotan tuah do.

9Saksi palsu seng anjai lang hona uhum, anjaha sisahapkon ladung magou do.

10Lang patut halak na oto marsonang-sonang manggoluh, lobih hunjai seng patut jabolon manrrajai raja-raja.

11Hapentaran ni jolma mambahensi nanget manringis, anjaha hamuliaon do ai bani, manalpuhon hasalahan,

12Songon paraum ni singa do ringis ni raja, tapi dear ni uhurni songon namur na bani poyon-poyon.

13Hasedaon ni bapa do anak na oto, anjaha naboru siparingor songon tiris na manektek torus.

14Rumah pakon arta, ai ma tading-tadingan humbani na matoras, tapi humbani Jahowa do parinangon na maruhur.

15Harayohon mambahen dokah modom, anjaha uhur na rahanan soh mambahen gayuran.

16Halak na mandalankon parentah, ai ma na manramotkon goluhni, tapi maningon matei do na so parduli bani langkah-langkahni.

17Na papinjamkon bani Jahowa do halak, na maridop ni uhur bani halak na masombuh, anjaha Ia do na mambaloskon ai bani.

18Ajar ma anakmu, ai adong ope arapan, tapi ulang roh uhurmu pamatehonsi.

19Halak siparringis banggal, ia sandiri do na manaron, anggo sihol urupanmu ia, paparahkon do ai.

20Tangihon ma podah, anjaha jalo ma sipaingat, ase lambin pentarni ho use.

21Buei do ranggian ibagas uhur ni jolma, tapi sura-sura ni Jahowa do na saud.

22Hisap-hisap ni jolma pindah-pindah bani paruntungan; tapi dearan do masombuh humbani na gabe siparladung.

23Biar bani Jahowa do na pagoluhkon, bosur do halak anjaha sonang modom, seng mangonai hamagouan bani.

24Domma ipohul siparrayoh indahanni, tapi rayohan do ia mannahkon ai hu pamanganni.

25Maningon lonsingon do sipanrisai, ase maruhur halak na oto, tapi anggo halak na pantas, ipinsang gelah domma jumpahan habotohon.

26Ise na mangarsik bapani anjaha iusir-usir inangni, ai ma anak sibahen hasamboron ampa habadoron.

27Anggo iparontihon ho, ale anakku, manangihon podah, jadi kahou ma ho humbani hauhuron.

28Saksi paruhur jahat mapas do bani uhum, anjaha mantin do hagedukon bani pamangan ni halak parjahat.

29Sirsir do uhum bani halak sipanrisai, sonai lonsing-lonsing bani gurung ni halak na oto.


  Share Facebook  |  Share Twitter

 <<  Amsal 19 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel