Dual Panel(Sambatni)
1Harganan do goran na madear ase habayakon na buei, anjaha dearan do anggo gabe harosuh diri humbani pirak atap omas.
2Saor do halak na bayak pakon na masombuh, tapi Jahowa do na manjadihon sidea haganup.
3Halak na pantas mangidah parmaraan, jadi marponop ma ia; tapi halak na oto itoruskon do langkahni, gabe manaron.
4Upah ni uhur na toruh ampa biar bani Jahowa, ai ma habayakon, hamuliaon ampa hagoluhan.
5Duri pakon siding do bani dalan ni halak pargeduk, halak na mangkargahon hosahni, ipadaoh ma dirini hunjai.
6Pasomal-somal ma dakdanak mardalan bani dalan sidalanonni, ia dob matua ia, seng manlembang ia hunjai.
7Halak na bayak do na manrajai bani na masombuh, anjaha sipanginjam gabe jabolon ni na painjamkonsi.
8Halak na manabur hagedukon maningon sabionni do hamagouan, anjaha sai maripuk do tungkot hajungkatonni ai.
9Halak na lamlam pangkawahni dapotan pasu-pasu do; ai ibere do humbani sipanganonni hubani na masombuh.
10Usir siparrisai, jadi lang dong be paringoran, anjaha parsalisihan ampa panreheion pe maronti ma.
11Halak na mangkarosuhkon uhur na pitah, anjaha parsahapni pe basar, raja ma na gabe huan-kuanni.
12Mata ni Jahowa do na manramotkon habotohon, tapi ibalikkon do hata ni sipangeluk.
13Hata ni siparrayoh, “Adong do singa i darat ai, ibunuh holi ahu i dalan ai!”
14Godung na bagas do sahap-sahap ni naboru parbangkis, halak na pinapaan ni Jahowa do madabuh hujai.
15Haotoon do longkot ibagas uhur ni dakdanak, tapi hotang sipangajari do palahohon ai hun bani.
16Halak na mangodoh-odoh na masombuh laho paganda untungni, anjaha marsibere-bere bani halak na bayak, mambahensi marhahurangan.
Podah ni Halak na Pentar-pentar
17Paeleng ma pinggolmu anjaha tangihon ma hata ni halak na pentar anjaha paruhurhon ma podahku;
18ai dear do ai, anggo ra ho marimbagaskon ai, anjaha totap ai marianan bani bibirmu.
19Andohar martenger ni uhur ho bani Jahowa, ai do ase hupatugah ai bam sadari on, hubam tongon.
20Ai lang domma husuratkon bam hata na maharga, podah pakon habotohon,
21laho paidahkon bam na sintong ampa na tongon, ase ibotoh ho sintong marbalos bani halak na marsuruh ho?
22Ulang ma rampas halak na masombuh, halani masombuh ia; anjaha ulang ma odoh-odoh halak na madoyuk i paruhuman;
23ai Jahowa do siparlulu bani sidea, anjaha Ia do na mambuat hosah ni sibuat hosah ni sidea.
24Ulang ra ho marhuan-kuan pakon halak siparringis, anjaha ulang ma saorhon dirimu bani halak pargila-gila,
25ase ulang gabe hasomalan ho bani parlahou ni sidea, anjaha itaon ho siding bani dirimu.
26Ulang ma ra ho gabe halak sipanjamini, na ra mananggung pasal utang-utang,
27ai anggo seng dong panggalarmu, podomanmai ma holi ibuat humbam.
28Ulang ma paosor batu parbalogan na dob pinasuk ni ompungmu hinan ijia.
29Halak na pongut bani horjani, boi do marhorja ia i lobei ni raja-raja; seng bani halak na malumat ia marugas.