Dual Panel(Sambatni)
1Songon salju musim milas, atap songon udan musim sabion, sonai do, seng patut hamuliaon bani halak na oto.
2Songon dingis na laho lintun meper-eper, songon hampilis na maporus habang, sonai do bura-bura na so marhala, seng mangonai.
3Bosik-bosik do talup bani huda, rantei bani halode, sonai do hotang bani gurung ni halak na oto.
4Ulang ma sampang halak na oto domu hubani haotoonni, ase ulang gabe songonsi ho.
5Marbalos ma ho bani halak na oto romban hubani haotoonni, ase ulang iagan na pentar ia.
6Halak na martonah marhitei halak na oto, na manrotap naheini do ia ai anjaha manginum na masambor.
7Songon nahei na so marguna bani halak na repat, sonai do podah bani pamangan ni halak na bodoh.
8Songon halak na mambahen mata intan batu ni umbalang, sonai do halak na mambere hamuliaon bani halak na oto.
9Songon dangkah na marduri na dapot tangan ni halak na mabuk, sonai do hata umpama bani pamangan ni halak na oto.
10Songon halak siparsior, na manembaki haganup, sonai do halak na mangupahi halak na oto atap halak sipamolus.
11Songon baliang na mangulaki utah-utahni, sonai do halak na oto mulak-ulak mangkorjahon haotoonni.
12Anggo dong ididah ho halak, na mangagan dirini pentar, bueinan ope pangarapan bani halak na bodoh ase bani.
13Hata ni halak parrayoh, “Adong do begu i darat ai, adong do singa i dalan ai!”
14Songon labah na marhusor bani engselni, sonai do halak siparrayoh bani podomanni.
15Domma ipohul siparrayoh indahanni, hape rayohan do ia mannahkon hu pamanganni.
16Pentaran do halak siparrayoh, ninuhurni, marimbang pitu halak na pandei marsampang.
17Halak na ra manampuri paringoran ni halak na legan, doskon halak na manangkap pinggol ni baliang na montas do ia ai.
18Songon halak na podouan, na manembakkon panah apuy ampa lingkit na pamatehon,
19sonai do halak na manipu hasomanni, anjaha ihatahon ope, “Gurou-guroungku do hansa ai.”
20Anggo seng dong be soban, miloh do apuy, anggo seng dong sipanukas-nukasi, maronti do paringoran.
21Arang pagajag narnar, soban pagajag apuy, sonai do dalahi sipartinggil pagara paringoran.
22Hata ni si parhusip-husip mantin do ai, anjaha masuk-masuk hubagas uhur.
23Songon pirak na nilampiskon bani hudon, sonai do parbibir na lampot, hape uhurni ibagas jahat do.
24Halak pardomdom marsipakulah-kulah do parsahapni, tapi gok pangoto-otoion do uhurni ibagas;
25age pe basar parsahapni, ulang ho porsaya, ai adong do pitu lapis hasamboron ibagas uhurni;
26age pe irungkub-rungkub domdomni marhitei sipaoto-oto, maningon talar do hajahatonni ai i tongah-tongah ni humpulan.
27Halak sihurak godung bani na legan, ia sandiri do madabuh hubagas; halak na manggulangkon batu bani na legan, ia sandiri do hona gulangan.
28Dilah parladung mambahen hasedaon, pamangan na landit parohkon hamagouan.