Dual PanelPodah humbani si Lemuel
1On do hata ni si Lemuel, raja ni Massa, pinodahkon ni inangni bani,
2“Aha do ale anakku hatahononku bam! Aha do, ale sinuan tunas? aha do, ale anak bagah-bagahku?
3Ulang ma bere gogohmu bani naboru, anjaha ulang ma pasaor dirimu bani halak siparseda raja-raja.
4Seng patut bani raja-raja, ale Lemuel, seng patut bani raja-raja minum anggur, sonai homa kopala-kopala minum siinumon na koras,
5ase ulang halani haru-haru minum sidea, gabe lupa uhum hasintongan, gabe peol panguhumni bani halak na madoyuk.
6Bere ma inuman na koras bani halak na magou-magou, ampa anggur bani halak na pusokan uhur,
7ase minum sidea, gabe lupa bani hasombuhonni, anjaha seng idingat be hasunsahanni.
8Buha ma pamanganmu mangkopkop halak na longah, halani hak ni halak na tading maetek.
9Buha ma pamanganmu, anjaha sintong ma panguhummu, ondingi ma hak ni halak na madoyuk ampa na masombuh.”
Puji-pujian bani Parinangon na Madear
10Parinangon na madear, ise ma na dob jumpahan ai? Harganan do ai daoh humbani mutiha.
11Ia do tenger ni uhur ni paramangonni. anjaha pasal na dong pe seng hurangan ia.
12Na dear do ibahen hubani pargotongni, sedo na masambor, sadokah manggoluh ia.
13Sari do ia bani wol ampa bonang linnen, anjaha ringgas do tanganni marhorja.
14Songon kapal ni partiga-tiga do ia, humbani na daoh do iparroh sipanganon bani.
15Girah sogod, golap-golap ope, domma puho ia, ipatorsa ma panganon bani pangisi ni rumahni anjaha ibagihon horja bani juakjuak naboru.
16Iuhurhon do homa pasal juma, gabe dapotsi do ai; marhitei pansarian ni tanganni ipungkah pohon anggur.
17Igonditi do binongeini ase margogoh, anjaha tanganni sihap do tongtong.
18ididah do, manjadi do horjani, anjaha bani na golap pe seng miloh suluhni.
19Pandei do tanganni manjamah sorha, anjaha sihap jari-jarini manangkap tuldak.
20Layak do tanganni bani halak na masombuh, anjaha buha bani halak na hurangan.
21Seng haru uhurni pasal rumahni bani musim salju, halani haganup na i rumahni marbaju wol do.
22Ipauli do salimut bani, hiou linnen na alus ampa na marpurada do pakeianni.
23Sangap do pargotongni i partumpuan, sanggah na hundul ia rap pakon pangintuai ni nagori in.
24Itonun do pakeian linnen, ijuali do ai; gondit do jualonni bani halak partiga-tiga.
25Tunggung anjaha sangap do ia, tawa do ia managam ari na roh.
26Ibuha do pamanganni ibagas hapentaran, anjaha podah halamlamon do i atas ni dilahni.
27Ipardimata do pardalan ni horja i rumahni, anjaha seng ibotoh na marayoh.
28Roh do anakni, ipuji do ia, sonai homa paramangonni, ipatunggung do ia, nini,
29“Buei do parinangon na madear, tapi ham do siatasan humbani haganupan ai.”
30Sipaoto-oto do hajengeson, anjaha na lang do rupa na majenges, tapi parinangon na mabiar bani Jahowa, ai do sipujion.
31Bere ma hu bani buah ni na hinorjahonni, anjaha lahoanni do mambahen tarpuji ia i partumpuan.