Alkitab Mobile SABDA
[VER] : [SIMALUNGUN]     [PL]  [PB] 
 <<  Amsal 4 >> 

Sipaingat ni Bapa bani Anak, ase Ipindahi Hapentaran

1Tangar ma, ale anakku, pangajarion ni bapanima, paruhurhon ma, ase dapotan pangarusion.

2Ai ajaran na madear do sihol bereonku bennima, podahkai ulang ma tadingkon hanima.

3Sanggah poso ope ahu i lobei ni bapa, etek anjaha anak sasada i lambung ni inang,

4iajari do ahu, nini hu bangku, “Sai marsijoloman bani hatangku ma uhurmu, dalankon parentahku, ase manggoluh ho.”

5Pindahi ma hapentaran, pindahi hauhuron, ulang lupa ho pasal ai, ulang ho manlembang humbani hata ni pamanganku.

6Ulang ma tadingkon ai, ase iramotkon ho, haholongi ma ai, ase ijaga ho.

7Parjadi ni hapentaran, ai ma, sari ma hapentaran, sari ma hauhuron marhitei sagala na dong bam.

8Harga ma bahen ai, jadi patimbulonni ma ho, rohop ma ai, ase ipasangap ho.

9Nahkononni do bani ulumu rudang na majenges, anjaha sortali na majagar do berehononni bam.

10Tangihon ma, ale anakku anjaha jalo ma hatangku, ase tambah ari-ari ni goluhmu.

11Sihol do ajarhononku bam dalan hapentaran, anjaha togu-toguonku ho bani dalan na pintor.

12Bani pardalanmu, seng dong na mangolat langkah-langkahmu, anjaha marlintun pe ho, seng anjai tartolsu.

13Jolom ma ho bani podah ulang paluah, ramot bahen, ai hagoluhan do ai bam.

14Dalan ni parjahat ulang masuki, anjaha ulang ma dalani dalan ni halak na jahat.

15Lembangi ma ai, ulang montas hunjai, simbili ma ai, toruskon dalanmu.

16Seng tarpodom sidea anggo lang palobei manjahati, seng ra sinok matani, anggo lang lobei dong na targompang ibahen.

17Hajahaton do ruti bani sidea, anjaha pangodoh-odohon anggur ni sidea.

18Tapi dalan ni halak parpintor songon sinalsal sogod-sogod do, lambin torang marsinondang paima tongah ari.

19Dalan ni halak parjahat lotir do, seng ibotoh sidea ija partolsuan.

20Ale anakku, parimbagaskon ma hatangku, bani sahapku ma pateleng pinggolmu.

21Ulang ma sasap ai humbani matamu, simpan ma ai ibagas uhurmu.

22Tongon, hagoluhan do ai bani na jumpahan ai, tambar bani haganup angkulani.

23Tang siporlunan, jaga ma uhurmu, ai hunjai do luar hagoluhan.

24Ambukkon ma humbam pamangan siparladung, anjaha sahap na marputor-putor daoh ma ai humbam.

25Pintor ma panonggor ni matamu hu lobei, anjaha dompak lobei ma pangkawahmu.

26Pardiateihon ma panlangkah ni naheimu, ase tarjamin ganup dalanmu.

27Ulang ma manlembang hu siamun atap hu sambilou, pasurut ma naheimu humbani hajahaton.


  Share Facebook  |  Share Twitter

 <<  Amsal 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel