Dual PanelLumba-lumba dompak Puang-puang Parbangkis
1Ale anakku, paruhurhon ma hapentaran na humbangku, anjaha pateleng pinggolmu hubani hauhuron na humbangku,
2ase tarramotkon ho uhur panimbangion, anjaha bibirmu manjolom habotohon.
3Mantektekkon manisan do bibir ni boru jalang, anjaha landitan do tolonanni ase minak;
4tapi dobni paetan do ai ase pogu, marot songon podang sidua mata.
5Naheini tuad hu hamatean, anjaha langkah-langkahni manuju nagori toruh;
6seng ipardulihon dalan hu hagoluhan, kahou do panlangkahni, seng panagamanni.
7Ai pe, ale anakku, tangihon hanima ma ahu, ulang ma manlembang hanima humbani hata ni pamanganku.
8Padaoh ma dalanmu hun bani, anjaha ulang ma dohori labah ni rumahni,
9ase ulang ibere ho gogohmu bani halak na legan, ampa ari-ari ni goluhmu bani halak na so parholong,
10ase ulang halak na legan marbosur-bosur humbani pansarianmu, anjaha na hinangalutkonmu laho hu rumah na legan,
11gabe morong-orong ho bani ujungni, bani parreong ni dagingmu pakon angkulamu,
12gabe ihatahon ho, “Mase ma nani huhagigihon pangajaran, anjaha itulak uhurhu pinsang-pinsang?
13Mase ma lang hutangihon sora ni gurungku, anjaha mase ma lang hupateleng pinggolhu bani na mangajari ahu?
14Otik nari mando ase magou tumang ahu, i tongah-tongah ni humpulan ni kuria in.”
15Minum ma ho humbani parigimu sandiri, humbani bah na mabaor humbani bah tubuhmu.
16Ulang ma manjalir bah na hun parigimu hu darat, gabe bah na mardalan i alaman!
17Ho ma gelah parsimada ijai, ulang dong halak na legan hasomanmu.
18Sai pinasu-pasu ma bah tubuhmu, anjaha malas ma uhurmu bani parinangon sanggah haposoonmu, na laingan songon ursa, na majenges songon balua.
19Sai hajengesonni ma na pabosurhon ho, anjaha marsombuh-sombuh ma ho marhitei holongni.
20Mase ma, ale anakku, mabuk ho bani parinangon ni halak, anjaha irohop ho naboru na legan?
21Ai talar do dalan ni ganup halak i lobei ni Jahowa, anjaha ipardiatei do ganup langkah-langkahni.
22Hajahatonni sandiri do na manangkap parjahat, anjaha ipardiatei do ganup langkah-langkahni.
23Matei do ia halani itulak pangajaran, anjaha halani banggal ni haotoonni kahou do ia.