Dual PanelHata Lumba-lumba bani Halak Sijamini Hasomanni, bani Halak Siparrayoh ampa bani Halak Pargeduk
1Ale anakku, anggo ra ho manjamin hasomanmu, pala marjabat tangan ho mangkopkop halak na legan.
2Jadi anggo sangkut ho marhitei sahap ni bibirmu, tartangkap ibahen hata ni pamanganmu,
3on ma bahen, ale anakku, paluahkon dirimu, ai domma madabuh ho hubagas tangan ni hasomanmu. Laho ma, patoruh dirimu, elek-elek ma hasomanmai!
4Ulang ma lopas matamu modom, atap salibonmu tartunduh;
5sai paluah ma dirimu, songon balua hun tangan ni parburu, songon manuk-manuk hun tangan ni parsambil.
6Laho ma bani porkis, ale parrayoh, pardiatei ma pambahenanni, anjaha maruhur ma!
7Age pe lang dong bani sidea pangulu, mandur atap raja,
8ipasirsir do sipanganonni bani musim logou ni ari, ipatumpu do sipanganonni bani musim sabion.
9Sadiha dokah ho modom-modom, ale parrayoh? Andigan pe ho puho humbani na modom?
10Nim, “Tongkin nari modom, tongkin nari tartunduh, tongkin nari tibal-tibal anjaha marlompit tangan,”
11jadi roh ma bam hamiskinon songon panamun, anjaha hahurangan songon halak parsinjata.
12Jolma na so margagan, halak sihorjahon hajahaton, ai ma na mansahap-sahapkon hata ladung,
13ai ma na pahirdop-hirdop matani, sibere partanda marhitei naheini, anjaha na patuduhkon marhitei jari-jarini,
14ai ma na manranggihon na masambor marhitei akal-akal ampa na torus manuan paringoran.
15Halani ai sompong do roh hasedaon bani; podas do ia maropuk, seng hatambaran.
16Na onom on ihasogamkon Jahowa, na pitu on tene ihagigihon:
17Mata na mangenjeng, dilah siparladung, ampa tangan siduruskon daroh na so marpipot,
18uhur na paranggi-ranggi hajahaton, ampa nahei na sihap marlintun bani na masambor,
19saksi palsu siluarhon ladung, ampa na manuan parbolah-bolahan i tongah-tongah ni na marsanina.
Lumba-lumba Pasal Parbangkison
20Ale anakku, ramotkon ma parentah ni bapamu, anjaha ulang ma ambukkon pangajaran ni inangmu.
21Sangkutkon ma ai tongtong ibagas uhurmu, anjaha parsinongkok bani borgokmu.
22Anggo mardalani ho, ai ma na manogu-nogu ho, anggo modom ho, ai ma na manjagai ho; anjaha anggo puho, ai ma na marsahapkon ho.
23Ai suluh do titah ai, anjaha pangajaran ai panondang; dalan hu hagoluhan do pinsang-pinsang ampa lumba-lumba,
24na manjaga ho humbani naboru na jahat, humbani naboru na legan silandit dilah.
25Ulang oji ho mangidah hajengesonni ibagas uhurmu, anjaha ulang ma tartangkap ho ibahen hirdop ni matani.
26Ai halani boru jalang rugi do halak sansayat ruti, tapi halani parinangon ni halak na legan magou tonduy na maharga ai.
27Ai boi do halak mamboan apuy bani abinganni, anjaha hiouni ai seng mosog?
28Atap tarbahen halak do mardalan i atas ni narnar, anjaha naheini ai seng matutung?
29Sonai do halak na mandohori parinangon ni hasomanni; seng anjai lang hona uhum na manjamahsi.
30Ai lang bador do panangko, anggo manangko ia laho pasombuh hisapni, halani loheian ia?
31Anggo tardapot ia, maningon paulakonni do pitu hali lompit, ronsi haganup ugas-ugas na i rumahni maningon berehononni do.
32Tapi halak na lontong do halak sihorjahon parbangkison; na mansedahon dirini do halak na mangkorjahon ai.
33Pukul-pukul pakon habadoron do rupeini, anjaha seng tarsasap be habadoronni ai.
34Ai parsimburuon do mamuhoi ringis ni dalahi, anjaha seng maralang-alangan uhurni bani ari pambalason.
35Pardearan aha pe lang martarima bani, sadiha pe ibere ho, seng ra ia manjalosi.