Dual PanelMarjaga ma dompak Akal-akal ni Naboru Parbangkis
1Ale anakku, ramotkon ma hatangku, anjaha simpan ma bahen parentahku;
2jaga ma parentahku ase manggoluh ho, ampa titahku songon anak ni matamu.
3Sangkutkon ma ai bani jari-jarimu, bani uhurmu ma suratkon ai.
4Hatahon ma bani hapentaran, “Botouhu do ham” anjaha huanmu ma goran hauhuron ai,
5ase ia ma na manramotkon ho dompak parinangon ni halak, dompak parinangon na legan siparsahap na landit.
6Mangkawah do ahu sahali humbani jendela ni rumahku, humbani jaring-jaringni ai,
7gabe huidah ma sahalak na so maruhur, dapot panonggorhu ma sada garama, na so marpangartian,
8montas i pasar, dohorhon suhi-suhi ni rumahni, mardalan bani dalan hu rumahni ai,
9sanggah samun ari, sanggah bodari, sanggah borngin anjaha golap ari.
10Anjaha tonggor ma, sada naboru roh manjumpahkonsi, marpakeian boru jalang, maruhur akal-akal.
11Seng marhatontuan panlangkahni, garang do ia, seng tarsohkonsi be naheini i rumahni;
12tongkin ia i alaman, tongkin nari domma i tiga, bani ganup sirpang ni dalan do ia manggompangi.
13Itangkap ma parana ai anjaha isummah, marhasoman bohi na so maila iparsahapkon ma ia, nini,
14“Marutang galangan banggal ni uhur do ahu, sadari on do hugalar bagah-bagahku.
15Ai do ase luar ahu manjumpahkon ham, laho mangindahi bohimu, gabe jumpah do ham.
16Domma huamparhon apei bani podomanku, marhasoman linnen Masir sibagei rupa.
17Domma hupamisbou podomanku marhitei mir, aloe ampa kulit manis.
18Laho ma hita pasombuh-sombuh uhurta ronsi patar.
19Ai seng i rumah dalahingku, bani pardalanan na madaoh do ia nuan.
20Iboan do ranjut parduitanni, bani bulan tula pe ia mulak.”
21Taroto do ia ibahen marhitei buei ni hatani, teleng do uhurni marhitei landit ni parsahapni.
22Iihutkon ma ia torus songon lombu na tinogu hu pamotongan, songon ursa na masuk hubagas jarot,
23ronsi hona tiham atei-ateini ibahen tanja; songon manuk-manuk do ia mandorab sambil, seng ibotoh hosahni sandiri do na niagouni ijai.
24Ai pe, ale anakku, tangihon ma ahu anjaha paruhurhon ma hata ni pamanganku.
25Ulang ma manirpang uhurmu dompak dalanni ai, ulang ma kahou ho bani dalanni.
26Ai buei ma halak matei na niraseihonni, anjaha bahat ma na nibunuhni.
27Dalan manuju dompak nagori toruh do rumahni, tuad hu kamar ni hamatean.