Dual PanelBalos ni si Job hubani si Bildad: Aha do Nani Sura-sura ni Naibata ase Buei Sitaronon?
1“Domma sobalan ahu bani hagoluhan on; hupapuas ma tangis-tangisku, marsahap ibagas hapaeton ni tonduyhu.
2Hatahononku ma hubani Naibata, ʻUlang ma papai Ham ahu! Pabotohkon Ham ma bangku, mase ma gilaan-Mu ahu?
3Ai marguna do Bamu, ase mangarsik-arsik Ham, ase ibuang Ham jadi-jadian ni tangan-Mu, tapi itumpaki Ham riah ni halak parjahat?
4Tor parmata songon jolma ma Ham? Tor songon pangidah ni manisia do pangidang-Mu?
5Tor songon ari-ari ni manisia simatei-matei ma ari-ari-Mu, barang bilangan ni tahunmu doskon tahun ni sada halak dalahi,
6ase sonai pangindahi-Mu bani salahku, anjaha ipareksai Ham dousangku,
7age pe domma ibotoh Ham hinan seng parjahat ahu, anjaha seng dong halak na boi paluahkon ahu hun tangan-Mu?
8Domma itompa anjaha ijadihon tangan-Mu ahu, gok jengesni, tapi sonari sihol parsedaon-Mu ahu?
9Dingat Ham ma na dob binahen-Mu ai ahu humbani tanoh halampung, anjaha paulakon-Mu ma ahu use gabe orbuk?
10Ai lang domma iuseihon Ham ahu songon dadih, anjaha songon dadih nialhotan ahu ibahen Ham?
11Ihioui Ham do ahu bani hulingkuling pakon sibuk, anjaha isirat Ham ahu marhitei holiholi ampa urat-urat.
12Ilayak-layakkon Ham do bangku goluh ampa idop ni uhur, anjaha iramotkon panatap-Mu do ahu.
13Tapi iponopkon Ham do on ibagas uhur-Mu, hubotoh sonon do sura-sura-Mu:
14Anggo mardousa ahu, iingat Ham do ai, anjaha seng paluahon-Mu ahu humbani hajahatonkai.
15Anggo marsalah ahu, magou ma ahu! Anggo pintor ahu, seng tarpadurgak ahu ulungku, ai domma gok habadoron ahu, paidah-idah sitarononku.
16Porini pe na padurgak, mintor dorabon-Mu do ahu songon singa, anjaha ulakan-Mu do patuduhkon kuasa-Mu bangku.
17Mardapot-dapot saksi-Mu idilo Ham manalahkon ahu, anjaha ipaganda Ham ringis-Mu dompak ahu; iparoh Ham do bala mandorab ahu.
18Mase ma padaraton-Mu ahu hun partapaan? Mase ma lang mintor rotap hosahku, ase ulang dong mata na mangidah ahu?
19Doskon halak na so ongga adong do ahu, na mintor iusung hun partapaan hu tanoman.
20Ai lang otik do ari-ari ni goluhku? Mahua paturut Ham ma ahu, ase boi marmalas ni uhur ahu tongkin,
21paima laho ahu, anjaha seng sinmulak-mulak be, hu tanoh na golap anjaha na lotir,
22hu nagori na lotir anjaha na geor, na lihar ijai doskon na golap.ʼ”