Dual PanelBalos ni si Job hubani si Sopar; Iondoskon si Job Langkahni bani Naibata
1“Tonggor ma, haganup ai domma ididah matangku, domma ibogei pinggolhu, anjaha iarusi do ai.
2Aha na binotohnima, ai pe hubotoh do, seng talu ahu marimbang hanima.
3Tapi sihol do ahu marsahap pakon Pargogoh Na So Tarimbang in, anjaha sihol do uhurhu marsisungkunan pakon Naibata.
4Anggo hanima, ladung do ibahen hanima palemes-lemeskon, panambari na so marguna do hanima ganup.
5Dearan hanima namin sip, ai ma gabe hapentaran bannima.
6Tangar hanima ma hatoranganku, anjaha pardiateihon hanima ma panlawanan ni bibirhu.
7Mintor sahapkononnima ma na so sintong, laho mangapiti Naibata? Anjaha hatahononnima ma sipaoto-oto, laho mangkombari-Si?
8Sihol hampit Naibata hanima, anjaha hanima marnagodangkon pahara-Ni?
9Mintor tumaram ma sonang hanima anggo ipareksa hanima? Barang tartipu hanima ma Ia, songon sada halak na manipu hasomanni jolma?
10Borat do panguhum-Ni bannima, anggo songon sipangapit-apiti hanima.
11Mintor lang ma songgotan ni hamuliaon-Ni hanima, anjaha biar dompak-Si manjombai hanima?
12Hata sipaingatnima ai, doskon abuan do ai; partahanannima ai, partahanan tanoh halampung.
13Sip ma hanima anjaha palopas hanima ma ahu marsahap; paturut roh bangku atap aha pe ai.
14Sihol boanonku do sibukku i holangkolang ni iponku, anjaha nahkononku tonduyhu ibagas tanganku.
15Tonggor ma, sihol bunuhon-Ni do ahu, seng dong siarapkononku; tapi sihol patidakonku do dalanku hu lobei-Ni.
16Age on hatuahon do bangku, na so bolas ai halak parjahat roh hu lobei-Ni.
17Tangar ma hatangku pangkei-pangkei, anjaha itangihon pinggolnima ma hatoranganku.
18Tonggor ma, domma sirsir hinan hatoranganku, anjaha hubotoh pintoran-Ni do ahu.
19Mintor adong ma na pag mangaduhon ahu, ase sip namin ahu anjaha matei?
20Pitah na dua pahara on ulang bahen Ham bangku, jadi seng ponopkononku be bohingku hun lobei ni bohi-Mu:
21Padaoh Ham ma tangan-Mu humbangku, anjaha ulang ma hirjaton ahu ibahen songgot-songgot-Mu.
22Dob ai dilo Ham ma ahu, sai balosanku do; atap lopas Ham ahu marsahap, anjaha balosi Ham ahu.
23Sadiha ma gakni buei ni hajahatonku ampa dousangku? Pabotohkon Ham ma bangku panlanggaronku ampa dousangku.
24Mase ma ponopkonon-Mu bohi-Mu, anjaha ihira Ham ahu songon imbang-Mu?
25Sihol songgoton-Mu ope sada bulung ni hayu na matangtang, anjaha pardakdakon-Mu sada anggala ni omei na dob masak,
26ase ipaporsankon Ham bangku na mapaet, anjaha manginsonoh bangku hajahaton ni haposoonku,
27ase ibayangkon Ham naheihu, itulimati Ham ganup dalanku, anjaha ibahen Ham ambat-ambat i lobei ni tapak-tapak ni naheihu?
28Age pe domma bois diri songon hayu na burburon, anjaha songon hiou na pinangan ni ngitngit?”