Dual PanelMarsahap si Elipas; Ipartahankon, Maningon Magou do Halak na Ilat
1Dob ai nini si Elipas, halak Teman ai ma mambalosi,
2“Patut ma sada halak na maruhur marbalos marhitei habotohon na soya-soya, anjaha ipaburnang dirini marhitei logou na hun purba?
3Patut ma maminsang ia marhitei parsahapan na so marguna, atap marhitei hata na so marhagogohon?
4Tapi anggo ho, ilangkon ho do biar dompak Naibata, anjaha iorui ho tonggo i lobei ni Naibata.
5Ai hajahatonmu sandiri do mangajari pamanganmu, anjaha ipilih ho do hata ni halak na pantas.
6Pamanganmu sandiri manguhum ho, seng ahu; bibirmu sandiri manaksii dompak ho.
7Ai ho do jolma na parlobei tubuh? Barang parlobei do ho jadi humbani dolog-dolog?
8Ongga do ho manangi-nangi i karapatan ni Naibata, gabe marhiteihon ai marhapentaran ho?
9Aha ma na binotohmu, na so binotohnami? Aha ma na niarusanmu, na so niarusannami?
10Bennami pe dong do halak na dob ubanon anjaha sayur matua, torasan humbani bapamu.
11Hurang maharga do iahap ho pangapohon ni Naibata, barang hata na lamlam na dob ondos bam?
12Mase ma ipaboan-boan uhurmu ho, anjaha mase ma jawar-jawar pangkawahmu,
13gabe pag ho marringis dompak Naibata, anjaha sonai toal ni parsahap ni pamanganmu?
14Aha ma jolma manisia ase boi borsih ia? Barang tubuh ni sada naboru, gabe boi bonar ia?
15Tonggor ma, seng marhatengeran Naibata bani halak na pansing na rap pakon-Si, anjaha langit ai pe seng pansing bani panonggor-Ni.
16Lambin naha ma dompak sada halak paruhur magou anjaha na masik-masik, jolma na manibur hajahaton songon bah?
17Sihol patuduhonku do bam, tangihon ma ahu, anjaha barang aha na dob huidah, sihol do baritahononku,
18ai ma na dob ipatugah halak na pentar, na dob binogeini humbani ompung ni sidea, lang ihurang-hurangi,
19bani sidea tumang iondoskon tanoh in, anjaha seng dong halak partoloh manginsolat i tongah-tongah ni sidea.
20Sadokah manggoluh halak parjahat parngit do pandageianni, manipat bilangan ni tahun na dob binuhul bani siunsagahkon gogoh.
21Sora songgot-songgot maraloling tong ibagas pinggolni; sanggah hadoharonni roh pangagou bani.
22Seng ihaporsayai, paboa tarbahensi ope maluah hun hagolapan, ai domma itontuhon, sipanganon ni podang mando ia.
23Sai madou-adou do ia mangindahi sipanganon atap ija do ai. Ai ibotoh, domma sirsir bani ari hagolapan.
24Pusok uhurni ibahen hasunsahan ampa hasosakan; idorab do ia, songon raja na dob gopas hu parporangan.
25Halani na dob pinagostongni ai tanganni mangimbang Naibata, anjaha oga-oga ia dompak Pargogoh Na So Tarimbang ai,
26marpojong ia dompak-Si marhitei borgok na durgak, marhitei gantar na hapal latapni.
27Halani domma iminaki bohini, anjaha inahkon taboh-taboh bani hae-haeni,
28anjaha marianan ia ibagas huta na dob tarulang, ibagas rumah na so patut siianan, na dob tinontuhon sireongkononkon;
29seng anjai bayak ia, seng anjai totap haadonganni, anjaha seng anjai ganda artani i tanoh on.
30Seng anjai maluah ia humbani hagolapan, melus do tumborni ibahen dilah ni apuy, anjaha mapurpur do bungani ibahen logou.
31Ulang ma marhatengeran ia bani na lumei, laho paoto-otohon dirini, ai sisoya-soya do upah ni pambahenanni ai.
32Seng jumpah ope panorangni domma bois ia, anjaha seng ra be ratah dangkahni.
33Songon hayu anggur mardabuhan buahni, seng mabei ope, anjaha songon hayu jetun mangkarurus bungani.
34Ai seng anjai manggargar ginompar ni halak silupahon Naibata, anjaha boiskonon ni apuy do lampolampo ni halak sijalo sisip.
35Boratan rumah do sidea bani hangaluton, anjaha itubuhkon hamagouan, ijullak-jullakkon uhur ni sidea do sipaoto-oto.”