Dual PanelBalos ni si Job. Si Job Martenger ni Uhur bani Naibata, Age Seng Dong Pangarapanni
1Dob ai nini si Job ma mambalosi,
2“Domma buei hubogei parsahapan na sonai, pangapoh sigandai hasunsahan do hanima.
3Sadihari pe marujung hata sisoya-soya in? Aha gakni mangonjar uhurmu marbalos sonai bangku?
4Ahu pe tarbahen do marhata-hata songon hanima, anggo songon partibalhon partibalnima; buei hata-hata na mantin hatahononku bannima, anjaha mupir-upir ulungku bahenonku bannima.
5Tarbahen ahu do patenger uhurnima marhitei pamanganku, anjaha apoh-apoh ni bibirhu palamlam pangahapnima.
6Anggo marsahapi ahu, seng lambin lamlamni pangahapanku, anjaha anggo sip ahu, lambin hampungni do?
7Tapi sonari, domma ibuat Naibata ganup gogoh humbangku, maseda ganup sindohorhu.
8Idorab ham do ahu, gabe hasaksian do ai dompak ahu, iaduhon hamerungonku do ahu songon na boi idahon bani bohingku.
9Iparrigat anjaha imunsuhi ringis-Ni do ahu, harat-harat ipon Ia dompak ahu, anjaha imbangku pamarot panonggor dompak ahu.
10Ipangangang halak do babahni dompak ahu, itompas sidea huyumku marhasoman panreheion, sauhur sidea mangimbang ahu.
11Iondoskon Naibata do ahu bani halak pargeduk, anjaha ipadas do ahu hubagas tangan ni halak parjahat.
12Sonang hinan do ahu, tapi sompong do iropukkon ahu; itangkap do borgokku anjaha itompaskon, anjaha ipajongjong do ahu bahen panonjolanni.
13Marngongos-ngongos do sior-Ni hun lambungku, anjaha seng maralang-alangan Ia manolpus piah-piahku; iuseihon do pogungku hu tanoh.
14Martambah-tambah do panluhai-Ni bangku, anjaha idorab do ahu songon pandorab ni puanglima.
15Domma husorungkon hiou bani angkulangku, anjaha domma hutibalhon gogohku bani orbuk.
16Bosol do bohingku halani tangis-tangis, anjaha golap do pangidah ni matangku,
17age pe seng dong longkot hajahaton ibagas tanganku, anjaha pitah do partonggongku.
18O ale tanoh, ulang rungkub darohku, anjaha ulang ma jumpah parsaranan bani doruh-doruhku.
19Gari nuan, tonggor ma, i surga do saksingku, anjaha na mangapiti ahu i nagori atas.
20Irehei hasoman-hasomanku do ahu; gok iluh mangkawah do matangku dompak Naibata,
21ase iapiti dalahi on i lobei ni Naibata, anjaha ipintori halak on dompak hasomanni.
22Halani lang piga tahun nari be, seng boi lang, dalananku dalan na so tarulaki be.”