Dual PanelBalos ni si Job Paduahalihon bani si Elipas; Seng Dong Siarapkononni humbani Goluh on
1“Domma mandatei tonduyhu, domma mintop ari-aringku, domma ranggak tanoman bangku.
2Hape tong ope rehe-rehe bagianku, anjaha matangku manaron panreheion ni sidea.
3Ham ma gabe jaminan bangku i lambung-Mu, anggo lang, ise ma na ra gabe jaminan bangku?
4Ai domma ilingodkon Ham panimbangion humbani uhur ni sidea, halani ai seng tumaram pamonangon-Mu sidea.
5Barang ise na mantahihon hasomanni laho mambuat untung, maningon horlom mata ni anakni holi.
6Domma ibahen Ham ahu gabe umpama ni deba, gabe halak sitijuran ni deba do bohingku.
7Horlom do matangku halani pusok ni uhurhu, anjaha ganup pagoringku doskon halinoh tumang.
8Pala tarsonggot halak parpintor halani ai, anjaha sungkun-sungkun halak na so marpipot pasal halak parjahat.
9Tapi tene tong do marsijoloman uhur ni parpintor mandalani dalanni, lambin tambah tene gogoh ni halak siborsih tangan.
10Mulak-ulak pe hanima roh, halak na pentar lang jumpah ahu i tongah-tongahnima.
11Domma sayop ari-aringku, domma seda sura-surangku, pangindoan ni uhurhu.
12Sihol do bahenon ni sidea borngin gabe arian, dohoran mando na siang humbani na golap.
13Porini pe marpangarapan ahu hujai, nagori toruh mando rumahku, anjaha ibagas hagolapan huamparhon apeihu.
14Dilo-dilo pe ahu hubani tanoman ai, ʻBapa!ʼ Ampa hubani goya ai, ʻInang!ʼ Atap, ʻBotou!ʼ
15ija ma pangarapan-pangarapankai? Anjaha tuahkai, ise ma na boi patuduhkon ai?
16Turun do ai rapkon ahu hu nagori toruh, rap do hanami tuad hubagas orbuk.