Dual PanelMarsahap si Bildad Paduahalihon:; Maningon Magou do Halak Parjahat
1Dob ai nini si Bildad na hun Sua ma mambalosi,
2“Antigan pe ase marsaran ho na marsahapi in? Pardiateihon, anjaha lopas ma hanami sonari marsahap.
3Mase ma songon pinahan hanami hiraon? Mase ma songon halak na oto hanami iahap ho?
4Ho sandiri do na marsirak dirimu ibagas ringismu; tumaram ma tarulang tanoh on halani ho, barang mosor dolog batu humbani iananni?
5Tongon tene, maningon mintop do parsuluhan ni halak parjahat, anjaha seng marsinalsal dilah ni apuyni.
6Haliharon ai golap do ibagas lampolamponi, anjaha suluhni i babouni mintop.
7Hona sosak do langkah-langkahni na gogoh ai, anjaha tahi-tahini mangonai hubani sandiri.
8Naheini sandiri patongon-tongonkonsi hubagas tirangkap, anjaha mardalan ia i babou ni siding ni godung.
9Hona gansip do tambihulni ibahen ragom, anjaha siding manjorotisi.
10Hona taon do siding bani ibagas tanoh, anjaha hona baen godung i abalanni.
11Hamagouan do manonggotisi inggot, anjaha ipardakdak ia bani langkah-langkahni.
12Sihol-siholan do hasedaon mambondutsi, anjaha hamagouan ai tagang mandabuhkonsi.
13Domma bois ibahen naborit hulingkulingni, anjaha bunga tubuh ni hamatean mamangani pagorini.
14Hona sarad do ia humbani lampolamponi, hatengeran ni uhurni hinan, anjaha tarboban hu lobei ni raja sipanonggoti.
15Halak na legan mando marianan ibagas lampolamponi, anjaha hirtah itirtirhon bani iananni.
16Horah do uratni hun toruh, anjaha melus dangkahni hun datas.
17Masab do pardingatan bani hun tanoh on, anjaha seng hona singatan be goranni i alaman.
18Hona onjar do ia hun haliharon hu hagolapan, anjaha ipabali do ia hun tanoh on.
19Seng tubuhan anak barang pahompu ia i tongah-tongah ni bangsani, sabonar seng dong simasimani tading bani iananni.
20Songgotan tumang ma halak na maposo mangidah ari hamagouanni ai, anjaha gobir halak na matua.
21Tongon, sonai ma masa bani rumah ni halak pargeduk, anjaha sonai do ianan ni halak na so mananda Naibata.”