Dual PanelParlajouan na Paduahon
1Dob ai bani na sadari use roh bei ma anak ni Naibata jongjong hu lobei ni Jahowa, anjaha sibolis ai pe roh do hu tongah-tongah ni sidea jongjong i lobei ni Jahowa.
2Dob ai nini Jahowa ma dompak sibolis ai, “Roh hunja do ho?” Jadi nini sibolis ai ma mambalosi Jahowa, “Roh hun paradou-adouan i tanoh ai, roh medang-edang hunjai.”
3Dob ai nini Jahowa ma dompak sibolis ai, “Domma ididah ho juakjuak-Ku si Job ai? Ai seng dong halak na marparuhuran songonsi i tanoh ai, daulat, pintor, sada halak na mangkabiari Naibata, anjaha ipadaoh do uhurni humbani hajahaton. Sai tong do ia marsijoloman hubani hadaulatonni, age pe iojur ho Ahu mangagousi, seng marhala.”
4Dob ai nini sibolis ai ma mambalosi Jahowa, “Hulingkuling gantih ni hulingkuling. Sagala na dong bani jolma in ra do ia mambere gantih ni hosahni.
5Tapi porini idurdurhon Ham tanganmu, laho manjamah holiholini ampa dagingni mintor buraanni do Ham torang-torang.”
6Dob ai nini Jahowa ma dompak sibolis ai, “Tonggor ma, ondos hubagas tanganmu ma ia; pitah hosahni ulang kahua.”
7Dob ai luar ma sibolis ai hun lobei ni Jahowa, gabe hona puru na parah ma si Job ai ibahen, hubani jampal ni naheini das humbani pakpak ni uluni.
8Dob ai ibuat si Job ma sanga-sanga mangkabusi dagingni, lanjar ihundulhon ma dirini ibagas abuan.
9Dob ai nini parinangonni ai ma dompaksi, “Sai tong ope marsijoloman uhurmu bani hadaulatonmu? Burai ma Naibata, ase matei ho!”
10Tapi nini ma dompaksi, “Songon hata ni naboru na lontong do parsahapmu. Domma ijalo hita na matobu humbani Naibata, ia na mapaet seng jaloonta?” Ibagas haganupan ai seng mardousa si Job marhitei parsahapni.
Tolu Halak Hasoman ni si Job na Roh Manorihsi
11Jadi dob ibogei hasoman ni si Job haganupan sitaronon na mangonai hubani ai, roh bei ma sidea, ganup humbani iananni bei, si Elipas hun Teman, si Bildad hun Sua ampa si Sopar hun Naama, anjaha manriah ma sidea laho hujai, laho manorih ampa mangapohisi.
12Jadi dob itatap sidea ia humbani na daoh, seng itanda sidea be ia, gabe ipagogoh sidea ma sorani tangis-tangis, iparrigat ma hiouni bei, anjaha ipasaburhon sidea ma orbuk dompak babou ampa bani uluni.
13Dob ai hundul ma sidea rap pakonsi i tanoh pitu ari pitu borngin dokahni, seng dong na marsahap pakonsi, halani ididah sidea parah ni sidageionni ai.