Dual PanelBalos ni si Job:; Isurahon si Job Martahankon Diri i Lobei ni Naibata
1Dob ai nini si Job ma mambalosi,
2ʻAge sadari on adu-adu ope ahu, borat do pandondon ni tangan-Ni bangku na morong-orong on.
3Ambit hubotoh ma namin, ija Ia boi jumpahkononku, ambit boi ma namin das ahu bani paratas-Ni.
4Patibalonku ma hu lobei-Ni paharangku, anjaha gok balos bahenonku pamanganku.
5Sihol botohonku, naha balos-Ni bangku, anjaha inteihononku barang aha sihatahonon-Ni bangku.
6Mintor marhitei gogoh-Ni na banggal in ma imbangon-Ni ahu? Lang tene, sai na pardiateihonon-Ni do ahu.
7Marsibalosan ma ijai halak parpintor pakon-Si, gabe maluah ma ahu humbani Siuhum ahu ronsi sadokah ni dokahni.
8Tapi tonggor ma, porini laho ahu dompak purba, seng ijai Ia; dompak hasundutan, seng jumpah ahu Ia ijai;
9hupindahi Ia i utara, seng dong huidah Ia, laho ahu hu dangsina, seng ijai Ia.
10Tapi ibotoh do dalan na hudalani, anjaha anggo iuji ahu, gabe doskon omas ahu luar.
11Totap do naheihu mardalan bani bokas-Ni, dalan-Ni do huihut-ihut, seng manlembang ahu.
12Seng ongga hulanggar titah na luar hun pamangan-Ni, huparimbagaskon do hata na luar hun pamangan-Ni.
13Seng mubah-ubah Ia, ise ma na boi pagolingkon-Si? Aha na sinurahon-Ni, ai do ipasaud.
14Sai na paujungon-Ni do na dob pinutuskon-Ni bangku, anjaha buei ope na sonai ai ibagas uhur-Ni.
15Halani ai do ase songgotan ahu i lobei-Ni, anggo hupingkiri ai, hitir-hitir do ahu mangidah-Si.
16Naibata do na patunduk uhurhu, anjaha Pargogoh Na So Tarimbang in do mangkirjati ahu.
17Tapi seng magou jomba ahu binahen ni halotiron, barang halani hagolapon na manrungkub bohingku.”